كم المدة المسموح بها للبقاء بدون دراسة مابين كورس اللغة والماستر

لو الطالب اكمل دراسة اللغة فى شهر 7 والاكاديمى يبدا فى شهر 9 هل يسمح للطالب البقاء لمدة شهرين بدون دراسة ... او الامور عادية مافيش مشكلة

علما بان لديه تاشيرة تاير 4

فى حالتى انا (قبل الثورة) تم ايقاف الصرف عليا الى ان بدا كورس الماستر لكن ممكن توا الامور تغيرت ..

واالله معاش عرفت امتى نبدا القراية
من جهة تواريخ بداية الدراسة ومن جهة التفويض والتاشيرة

هل قصدك مع الإنجليز أو مع السفارة الليبية والمنحة ؟
أعتقد مافيش مشكلة مع الاثنين يعني الإنجليز ما أعتقدش أنه حد يبي يدورك وخاصة أنك تبي تبدي بعد شهرين الأكاديمي والليبيين حتى هم لو أعطيتهم قبول أكاديمي غير مشروط والدراسة مش بعيدة يعني شهرين حتى هو المفروض مافيش مشكلة مع أن اللي قاعدين توة في السفارة توقع منهم كل شئ وممكن تأخذي كورس لغة شهرين إضافيتين في الجامعة (أو في المعهد لومافيش في الجامعة) عشان تقوي اللغة متاعك لو مدة اللغة تسمح.

عدل سابقا من قبل Abu Mohamed في الثلاثاء 22 أكتوبر 2013, 10:01 pm عدل 1 مرات

وادا كانت المدة تزيد عن الشهرين بدون دراسة فى هده الحالة مادا سوف يكون وضع الطالب ....
هل يرجع الى ليبيا الى حين بدأ دراسة الماستر او يبقى فى بريطانيا ...

بارك الله فيكما اختى الواثقة بالله واخى ابو محمد

نفس السوال بالله لو المدة اربع شهور
و قبول مضمون يرجع لليبيا او يبقى ؟ ولو يرجع لليبيا كيف الاجراء هل ياخد معاه رسالة من السفارة ويسكر ملفه و يرجع بعد تلاتة شهور ويفتح الملف ؟ او انه مافيش مشكلة السفارة تتصرف من تلقاء نفسهم؟

قرارك بالرجوع او البقاء حيتوقف على موقف السفارة .. اذا لم يتم ايقاف الصرف فلا داعي للرجوع الى ليبيا اما فى حالة ايقاف الصرف من قبل السفارة فممكن تضطر ترجع (من غير قفل الملف )لو ما عندك مصدر دخل آخر...

الواثقة بالله كتب:

قرارك بالرجوع او البقاء حيتوقف على موقف السفارة .. اذا لم يتم ايقاف الصرف فلا داعي للرجوع الى ليبيا اما فى حالة ايقاف الصرف من قبل السفارة فممكن تضطر ترجع (من غير قفل الملف )لو ما عندك مصدر دخل آخر...

من يعرف ياشباب

ِAbu Mohamed كتب:

libi كتب:

بارك الله فيك دخل تاني لا للاسف و لكن لازم نقعد على خاطر دراسة الاطفال لان سجلتهم في المدرستين الانكليزية و الليبية كيف بدوا يعني مافيها الرجعة الى ليبيا وخصوصا ليبيا بدت المدرسة من فترة بنرجع لوحدي لتدبير بعض الاموال او اضطرر الى اخد سلفة او شراء سيارة من مصرف وبيعها لتدبير اموري
-----
سوالي اخي الكريم
بعد ان تم ايقاف المنحة ودراستي الاكاديمية تبداء في شهر 3
هل متاكد اني مش لازم نسكر ملفي في ادارة البعتات؟
و عندما نبداء الاكاديمي هل يفرجوا على مرتبي او لازم نحضر رسالة من البعتات؟
سوال تاني لو سمحت
ماذا بخصوص الشهور الموقوفة فيهم المنحة اي من شهر عشرة سنة 2012الى غاية شهر 2 سنة 2013 هل سيتم احتسابهم في نهاية المدة ام سيتم دفعهم لي في مرة واحدة؟

جزالكم الله مني الف خير
==============================

أخي الكريم إذا أقفلت ملفك في البعثات معناها خلاص معدش عندك إيفاد المقصود باقفال الملف هو في السفارة في لندن وهو بشكل مؤقت حتى ترجع من ليبيا وحتى يتم حفظ مدة الدراسة وبخصوص المرتبات تعطى لك شهر بشهر حتى نهاية المدة وإذا لم تكمل المدة لايعطوك أي تعويض بمعنى أن المنحة تعطى لك كل شهر تكون فيه في بريطانيا ويكون ملفك مفتوحا أي تدرس.
لذلك حذاري من أي طالب يقفل ملفه في البعثات قبل أن يكمل دراسته ولاتحتاج إلى أي رسالة من البعثات لفتح ملفك.

السلام عليكم .........بعد التحيه أخي ابو محمد أنار الله دربك وجعل الجنة مستقرك استفساري بخصوص إقفال الملف في السفارة الليبيه في لندن فنفترض أني أنهيت مدة العام المخصص لدراسة اللغه في شهر 1 بإذن الله وتحصلت على قبول في الجامعه في شهر 9 ((فالمد ة الفاصله بين إنهائي كورس اللغه بإذن الله وبداية الدراسة حوالي سبعة شهور ))
1:-فهل نقدر نقفل الملف في السفارة ونعتمد على نفسي ونقعد على حسابي الخاص في بريطانيا طيلة سبعة الشهور المدة الفاصله
2:- السؤال المهم مدة السبعة الشهور لحنقعدها على حسابي الخاص هل لاتدخل في مدة 36 شهر للماجستير أي هل يتوقف إحتساب المدة 36 شهر بمجرد إقفال الملف في شهر 2 الى حين اعادة فتح الملف في شهر 9 لأن هذا السؤال مهم وخاصه فيما يتعلق بموضوع التمديد من ماجستير لدكتوراه
...........................................أفيدونا أفادكم الله ...................................................

libi كتب:

بارك الله فيك خونا ابومحمد
حاجة واحدة مازالت غامضة عندي ولم افهمها بالزبط

الشهور التي لم تنزل فيهم منحتي الدراسية وهنا نقصد من شهر 10 الى غاية شهر 3 هل سيتم تعويضهم لي في نهاية المدة؟

لان بصراحة عندي قبولين واحد في شهر 1 و التاني في شهر 3 سنة 2013و الجامعة المتحصل منها قبول في شهر 3 قوية وعاجبتي ووعندي رغبة اني ننتظرهم الى شهر 3

بالله خونا محمد ممكن توضحلي النقطة هذه بخصوص الفترة المتوقف فيها مرتباتي كيف ومتى سيتم تعويضها؟

وهل نقدر نحصل على تذاكر سفر من السفارة الى ليبيا ام لا ؟

أخي الكريم أعتقد أني أجبتك بخصوص المرتبات
(وبخصوص المرتبات تعطى لك شهر بشهر حتى نهاية المدة وإذا لم تكمل المدة لايعطوك أي تعويض بمعنى أن المنحة تعطى لك كل شهر تكون فيه في بريطانيا ويكون ملفك مفتوحا أي تدرس.)

بعني من الأخير مافيش حاجة اسمها تعويض ولكن توقف المنحة وخصم مدة الدراسة إلى حين رجوعك ويتم استئناف الصرف وخصم المدة بعد رجوعك
مثلا عندك 30 شهر وكملت منهم 12 شهر ووقفت، بعد ماتجي يبقى مازال عندك 18 شهر ولو كملت 12 شهر منهم مثلا وبعدين سكرت ملفك نهائي خلاص يتم إيقاف الصرف عليك.
أرجو أن تكون الإجابة واضحة الآن.

الله يبارك فيك اخوي ابو محمد

نفهم من كلامك انه المعاملة وكأنك تشتغل ويعطوك مرتب يعني الشهر اللي تواجدت فيه في بريطانيا تاخد عليه مرتبك والا فلا

المهم انك تكون داخل المدة المحدد لك

واذا اكملت دراستك قبل ما تستنفد المدة يوقف الصرف مع اخر شهر كملت فيه حتى وان كان مازال المدة فيها اشهر

بارك الله فيك

almokased كتب:

السلام عليكم .........بعد التحيه أخي ابو محمد أنار الله دربك وجعل الجنة مستقرك استفساري بخصوص إقفال الملف في السفارة الليبيه في لندن فنفترض أني أنهيت مدة العام المخصص لدراسة اللغه في شهر 1 بإذن الله وتحصلت على قبول في الجامعه في شهر 9 ((فالمد ة الفاصله بين إنهائي كورس اللغه بإذن الله وبداية الدراسة حوالي سبعة شهور ))
1:-فهل نقدر نقفل الملف في السفارة ونعتمد على نفسي ونقعد على حسابي الخاص في بريطانيا طيلة سبعة الشهور المدة الفاصله
2:- السؤال المهم مدة السبعة الشهور لحنقعدها على حسابي الخاص هل لاتدخل في مدة 36 شهر للماجستير أي هل يتوقف إحتساب المدة 36 شهر بمجرد إقفال الملف في شهر 2 الى حين اعادة فتح الملف في شهر 9 لأن هذا السؤال مهم وخاصه فيما يتعلق بموضوع التمديد من ماجستير لدكتوراه
...........................................أفيدونا أفادكم الله ...................................................

وعليكم السلام أخي وجزاك الله خيرا

ج1 تقدر بس حاول تخلي السفارة مايوقفوش عليك المنحة ومش مشكلة لو حسبوهن لك من المدة
ج2 إذا وقفت ملفك وقعدت على حسابك لن يتم احتسابهم من مدة 36 شهر وأنا نصيحتي ألا تفعل ذلك بعنب ول قدرت تقعد من عير دراسة والمنحة ماشية باهي ولو ماقدرتش روح غلى ليبيا ومدة 36 شهر كافية للماجستير بزيادة.

بارك الله فيك أخي أبو محمد .....أسأل الله أن يوفقك وأن يعينك وأن يرزقك كل مافي بالك من خير ......وأعلم أن الله في عون العبد ماكان العبد في عون أخيه ....مشكور أخي أبو محمد مرة تانيه.

بالنسبة الى احترت ومعاش عرفت امتى نحدد موعد للدراسة ... لانه لوقريت مدة 8 شهور راح نقعد قريب 10 شهور من غير دراسة ... ولو بندرس لغة 5 شهور مش عارفة حتكون كافية او لا .... ربي يستر وخلاص

اخوتي لدي استفسا ر ارجو الاجابه انا دخلت لبريطانيا بفيزا طالب زائر 6 شهور وتكمل في شهر 3 بعد ما نكون كملت ILETS وان نشاء الله نعدي ليبيا بعد ما نكون درت الامتحان عشان نقدم علي T4 وندخل لبريطانيا من جديد, سؤالي شن حيكون وضع ملفي في السفاره ؟ وهل سيقفلوا لي ملفي ويوقفو علي المنحه ام منحه ستستمر في حسابي حتي بعد سفري لاني مده ايفادي 6 سنوات انتظر ردكم بفارغ السفر

ام حبيب كتب:

اخوتي لدي استفسا ر ارجو الاجابه انا دخلت لبريطانيا بفيزا طالب زائر 6 شهور وتكمل في شهر 3 بعد ما نكون كملت ILETS وان نشاء الله نعدي ليبيا بعد ما نكون درت الامتحان عشان نقدم علي T4 وندخل لبريطانيا من جديد, سؤالي شن حيكون وضع ملفي في السفاره ؟ وهل سيقفلوا لي ملفي ويوقفو علي المنحه ام منحه ستستمر في حسابي حتي بعد سفري لاني مده ايفادي 6 سنوات انتظر ردكم بفارغ السفر

لن يتم توقف المنحة و ستظل مستمرة بس بشرط
يكون عندك قبول اكاديمي مشروط او غير مشروط وتقدميه للسفارة خلال مدة لا تزيد عن 8 او 9 اشهر
لانه بعد هذه المدة سيتم ايقاف المنحة الى ان يتم توفير قبول اكاديمي
غير ذلك فالمنحة مستمرة بأذن الله تعالى

السلام عليكم

حاليا انا وزوجتي موجودين في بريطانيا كطالب زائر. في شهر رمضان القادم حنرجعو لليبيا ،  وقتها حنكونو درسنا حوالي 6 شهور لغة  وبنقدمو  عالتاير 4 ان شاء الله.

أول حاجة بنسألها هي ان لما بنقدمو عالتاير 4 بيكون مازاللنا للغة حوالي 6 شهور. يعني لو رجعنا لبريطانيا في شهر 9 وكملنا باقي شهور اللغة بنكملوها في شهر 3.

بما أن الدراسة الجامعية بتبدأ في شهر 9 ، فكيف بيكون وضع التأشيرة اللي بيعطوها لينا ؟  هل نحتاجو نطلعو مرة ثانية من بريطانيا والا كيف الحل ؟

انا مرات نفكر ان لما نروح في شهر 6 منرجعش لغاية شهر 3 مثلا ، باش نكمل اللغة ونبدأ في الماجستير علي طول.

ياريت تعطونا فكرة علي مرونة التأشيرة ، وهل هي مربوطة بالدراسة فقط والا فيه مجال ان الواحد يقعد شهور فري في بريطانيا بعدما يكمل اللغة لغاية ماتبدأ قراية الماجستير ؟

عليكم السلام
المدة المسموح بها للبقاء في بريطانيا بدون دراسة اعتقد شهر وبالتالي لكي تحصل على فيزا في بريطانيا
يجب ان تدرس على حسابك الخاص في اي معهد لغة مثلا من شهر4 الى شهر8 على وهذا
حيكلفك ...

سامي الهاشمي كتب:

السلام عليكم

حاليا انا وزوجتي موجودين في بريطانيا كطالب زائر. في شهر رمضان القادم حنرجعو لليبيا ،  وقتها حنكونو درسنا حوالي 6 شهور لغة  وبنقدمو  عالتاير 4 ان شاء الله.

أول حاجة بنسألها هي ان لما بنقدمو عالتاير 4 بيكون مازاللنا للغة حوالي 6 شهور. يعني لو رجعنا لبريطانيا في شهر 9 وكملنا باقي شهور اللغة بنكملوها في شهر 3.

بما أن الدراسة الجامعية بتبدأ في شهر 9 ، فكيف بيكون وضع التأشيرة اللي بيعطوها لينا ؟  هل نحتاجو نطلعو مرة ثانية من بريطانيا والا كيف الحل ؟

انا مرات نفكر ان لما نروح في شهر 6 منرجعش لغاية شهر 3 مثلا ، باش نكمل اللغة ونبدأ في الماجستير علي طول.

ياريت تعطونا فكرة علي مرونة التأشيرة ، وهل هي مربوطة بالدراسة فقط والا فيه مجال ان الواحد يقعد شهور فري في بريطانيا بعدما يكمل اللغة لغاية ماتبدأ قراية الماجستير ؟

شوف هذا الموضوع وسيتم نقل مشاركتك إليه

كم المدة المسموح بها للبقاء بدون دراسة مابين كورس اللغة والماستر

http://www.almofad.com/t13076-topic