مشكلة الحساب المصرفي بالبنوك البريطانية

السلام عليكم ورحمة الله وبركاته.........
من المعروف اني المشكلة الوحيدة عند بداية فتح ملف بالملحقية ببريطانيا هي مشكلة الحساب المصرفي.... فما هيا الوسيلة المناسبة للخروج من هذه المشكلة.... وخاصة في حالتي بمدينة ليدز ... حيث ان الشخص الوحيد الذي اعرفه سيرجع لليبيا في نفس وقت قدومي للمدينة بعد ايام قليلة جدا....... الرجاء المساعدة العاجلة.... تحياتي

السلام عليكم

اخوي محمد مش على اساس ان فتح الحساب في مصرف الأمان والحصول على بطاقة السحب يحل مشكلة على الأقل الفترة الأولى

ويكون على الأقل مصروف الفترة الأولى إلى غاية ما يوصلوا فلوس المنحه

؟؟

هذا ما نصحني به بعض الزملاء ، ومشيت أمس فتحت الحساب في المصرف ، وبكرة إن شاء الله بنمشي نستلم بطاقة السحب !!!

الصراحة اني رافع معاي 2000باوند ... لكن الواحد مايعرفش الظروف غاذي كيف تكون ...... مرات تكملهم في اسبوع ومرات في شهر..... لذلك نحاول نحصل المنحة باسرع وقت.
اخي(mohab) نتمنى لو عندك خبرة تعطيني اسم مصرف بليدز يتم اجراءات فتح الحساب بسرعة... الله يرحم والديك
ياخوي زميلي المدينة 1982 بطاقة مصرف الامان تساعد في حالة انك عندك مبلغ بالمصرف وتحمله عن طريق البطاقة... لكن بالملحقية اكيد يبوا حساب بمصرف بالمملكة ضروري

نعم بطاقة مصرف الأمان تفيدك لو ما تبيش ترفع الفلوس كاش معاك ، تقدر تودعهم في حسابك هني وتسحبهم غادي بالبطاقة ،،، والملحقية صحيح ضروري تحتاج رقم حساب باش تنز لك فيه منحتك ،،،

لو أنك مش معاك عائلة ، أعتقد أن مبلغ 2000 باوند يكفوك لعند ما تنزل منحة الاستقرار !!!

بالتوفيق !!!

الله يبارك فيكم

اوكي خوي محمد ان شاء الله اي حد بليدز يساعد ويعطيك اسم مصرف سريع وبسيط بيش تفتح فيه حساب

وعلى الأقل نلقوا الخريطة مرسومة

وموفق ان شاء الله يا رب

واكيد الشباب مش حيبخلوا عليك

وشكرا خونا المتوكل

انشاء الله ياخوي 1982... وانت شن صاير فيك ياحر بخصوص التاشيرة.... بدي جوازك متجكتر او مازال

اخي كراخلي / السلام عليك ورحمة الله
اذا كنت تقصدني انا اني بروح لليبيا
فاكيد مش حروح لين نربطك باحد الاخوة الليبين في ليدز ويكون من الشباب اللي يعجبك
ولله المنة والحمد فهم كثر
ريح بالك وطمن حالك
المهم تغلف كويس لان الجو صقع هلبة ياحاج

اخي محمد الكراخلي مبلغ 2000 باوند ايسدك او ايزيد

انا مع عائلة ونصرف ونطرطش او الي الان مازال فيه تفتوفه

ولكن امسك روحك اشوي ام بخصوص مصرف سريع وخدماته ممتازه

عليك بالبركليز Barclyes

وكذلك يوجد خيار HSBC مصرف ممتاز ولكن معقد لفتح حساب واستلم الديبت كارد تحتاج من اسبوع الي اسبوعين

بيمناء البركليز تفتح وقتي وتستلم بطاقتك والبن كارد والبنك اولاين في 5 ايام او اقل

وربي يوفقك

هههههههههههه خوي محمد لا والله مازال لا توا ما ردوا ويستر الله

-*-*-*-*-*-*-*-

وماشاء الله بارك الله فيك اخ هيتم جزاك الله خير

وايضا اخونا سالم بارك الله فيك على المعلومات

halifax bank

الله يبارك فيكم جميعا وعارفكم ماتقصروا.......
خوي هيثم انشاء الله حنكونوا على تواصل دائم.....
خوي سالم: بالنسبة لبنك البركليز ممكن تقولي ماهي الاوراق المطلوبة لكي نفتح حساب بالبنك... وهل فتح حساب يكفي بالنسبة للملحقية او لازم بعد الخمسة ايام واتمام باقي الاجراءات......
خوي اليكس بالنسبة للمصرف الي حكيتلي عليه هل في عنده فرع بليدز وماهي المدة المتوقعة لفتح الحساب والاوراق المطلوبة.........

مشكور جدا خوي mohab والمقولة الي قيلت في اول 17 فبراير (قولوا لمعمر وعياله ليبيا فيها رجالة) بصدق قليلة عليكم وبجد هذا مش غريب عليكم.... وحتى اني بدوري لو اي موفد منكم يبي يجيب حاجة من ليبيا اني تحت امره وباذن الله مش جنقصر........ وربي يوفقكم

الى اخونا محمد الكراخلى ربى يسهل عليك امرك وتوكل على الله

بنسالك عن التدكرة من طرابلس الى مانشستر كم تكلف وعلى اى خطوط

امين ليا وليك ياخوي ليبيا..... التذكرة الى مانشستر ذهاب وعودة من 760 الى 1500... وذهاب بس اعتقد 520 والخطوط الليبية فقط المتاحة ولديهم 3 رحلات اسبوعية....... تحياتي

السلام عليكم ورحمة الله
بخصوص الطلبة الجدد الذين سياتون الى بريطانيا ، وسيقدمون على فتح الحساب
بالنسبة الى مصرف اللويدز فهو على حسب الطلبة القدم من افضل البنوك في بريطانيا ، بس الان بدأ يشرط ان يكون لديك قبول لمدة سنتين اقل شئ، يعني لو واحد عنده قبول اكاديمي ما فيش مشكلة بس لو عندك قبول لغة فقط فمش حيفتحولك حساب
وانا تم رفضي لعدم حصولي على قبول اكاديمي
وبالنسبة لمصرف HSBC فهو مصرف معقد جدا في فتح الحساب ، والله وبدون مبالغة قعدت نستنى قريب شهر بيش فتحولي حساب وكل مرة سبب وكل سبب اتفه من الثاني
وبعدين نصحني احد الاخوة بمصرف BARCLAYS وبصراحة من اول يوم فتحولي واعطوني ورقة فتح الحساب بعثها للملحية واليوم الثاني بعثولي الكارت كاش واليوم اللي بعده بعثولي الرقم السري
ومشت الامور والحمد لله

محمد كراخلي كتب:

الله يبارك فيكم جميعا وعارفكم ماتقصروا.......
خوي هيثم انشاء الله حنكونوا على تواصل دائم.....
خوي سالم: بالنسبة لبنك البركليز ممكن تقولي ماهي الاوراق المطلوبة لكي نفتح حساب بالبنك... وهل فتح حساب يكفي بالنسبة للملحقية او لازم بعد الخمسة ايام واتمام باقي الاجراءات......
خوي اليكس بالنسبة للمصرف الي حكيتلي عليه هل في عنده فرع بليدز وماهي المدة المتوقعة لفتح الحساب والاوراق المطلوبة.........

أخي محمد الملحقية يبوا بس رقم الحساب اللي تأخذه بمجرد فتح للحساب والأوراق المطلوبة هي نفسها في أي مصرف http://www.almofad.com/t8951-topic
وكل المصارف عندهم أكثر من فرع في كل المدن.

HSBC البطاقة اللي بعثوها

تسحب بيها فقط واذا تبي البطاقة اللي تشتري بيها يخصم منك في الشهر 8 باوند

bARCLAYs اما مصرف

يعطوك النوع الثاني ومجانا بدون اي خصم

جزاكم الله كل خير شباب بارك الله فيكم