تجربة مسافر الى كندا

موضوع رائع و انا ان شاء الله نفيدكم بس شن تحبوا تعرفوا بالضبط

السلام عليكم ورحمة الله شكرا جزيلا على المضوع المفيد جدا صراحة اريد معرفة كل شيء انطلاقا من المطار حث الاستقرار في المكان المقصود في كندا

موضوع جميل و يستحق المشاركة من اكبر عدد من الموفدين لتعم الفائدة على الجميع
و الموضوع يتطرق لعدة نقاط من تجربة المسافر و يفضل ان نقسمها لعناوين لتسهيل تعاون الموفدين مثلا الخبرة
1- من المطار, الترانزيت الي الوصول , شنط السفر ( يعني الاشياء الي بترفعها معاك)
2- السكن ___كيفية الاختيار و شراء الاثات
3-المواصلات و الطرق
4-البنوك و فتح حساب
5-الاكل الحلال و الحداقة في الشراء
6-الملابس و الاحذية (رجال,نساء,اطفال)
7-الاطفال ( حضانة و مدارس)

هذا اللي خطر علي بالي و زيدوا ضيفوا معاي و كل واحد يشارك بأي معلومة تحت ضوء هذه النقاط

السلام عليكم
خلوني نحكيلكم رحلة قدومي انا و زوجي لكندا، طبعا احني جينا شهر فبراير اللي فات لكندا و ما كانش في هلبه خطوط طيران تخدم المهم حجزنا تذكرتين ذهاب فقط ع الخطوط التركية لانها ارخص و لان حالتي الصحية ما كانتش تسمح باني نقعد في المطار نستنى الترانزيت علشان هكي حجزنا بحيث نقعدوا في اسطنبول يومين و ثالث يوم نسافروا كندا. طلعنا للمطار و استقبلنا صديق خوي و بعد كملنا اجراءاتنا و سلمنا حقائبنا دخلنا لصالة الانتظار الخاصة برجال الاعمال و قعدنا نستنوا قريب نص ساعة و بعدين نادوا على رحلتنا توجهنا للبوابة التابعة لرحلتنا ووقفنا في الدور لحد ما موظف الامن دار تشيك على جوازاتنا و بعدين دخلنا الطيارة و انطلقت الرحلة و ما تنسوش التسبيح، بعد ثلاث ساعات او اقل شوية و صلنا مطار اسطنبول المطار جدا كبير و ممكن الواحد ايريح فيه و كانت اول مرة نمشوا لتركيا يعني ما عندنا فكرة وين نمشو في المطار المهم لما نزلوا الركاب نزلنا معاهم و قعدنا وراهم و خلاص هههه لحد ما وصلنا للمكان اللي اديرو فيه تشيك ع التذاكر للي جايين ترانزيت زي حالتنا و بمجرد ما ختمولنا على حوازاتنا ختم الدخول استلمنا شناطينا و شرينا شفرة من المطار و اتصلنا بواحد عراقي صديق خوي ههههه ما شاء الله عليه خوي المهم الشخص هذا كان مجهزلنا شقة مفروشة و اخذينا تاكسي و مشينا للشقة و ارتحنا من تعب السفر.
ثاني يوم الصبح فقنا من الفجر هههههه و طلعنا فطرنا برا و صرفنا شوية فلوس لليرة التركية و هاتك يا تسوق و اليوم الثاني نفس الشي بعد ما شرينا حاجلتنا البي ناقصات امشينا للمطار في اليوم اللي قبل الرحلة باش نعرفوا بالضبط وين نسلموا الشناطي و بعد عرفنا كل شي روحنا للشقة و جهزنا الشناطي و ثاني يوم الصبح بكري توجهنا للمطار مرة ثانية و سلمنا شناطينا و مشينا بنختموا الجوازات طبعا ما نحكيلكم ع التفتيش حتى من الكندرة و الجاكيت لازم ترميهم بجد لين خفت ورد بالكم ترفعو سوائل معاكم في شنطة اليد حتى كريم اليدين يحذفوا فيه و بعد هالتفتيش وصلنا صالة الانتظار و بعدين ع الطائرة اللي ماشية لكندا.
الحق ما تعبناش في القعدة في تركيا لان الحمدلله نتكلموا انجليزي من قبل و اني نتكلم حتى تركي و لو انه مش بطلاقة بس الحق فادتني اللغة التركية هلبه

مازال ما كملتش القصة . بعد عشر ساعات و ثلث و صلنا كندا و كانت رحلة مريحة و حلوة و الطائرة ما شاء الله و الخدمة ممتازة المهم وصلنا مطار تورنتو و الحق كان اسهل من مطار اسطنبول بس مطار اسطنبول احلى المهم المطار ما يضيعش و الركاب اللي ينزلوا كلهم يوقفوا في طابور باش ايديروا تشيك و طبعا الطلبة لازم بعد ايديرو تشيك يمشوا لمكتب العجرة و ايجي على اليمين و انت طالع لما توصل المكتب تعطيهم جوازك انت و المرافقين و رسالة القبول و رسالة السفارة و هما اديرولك تصريح الدراسة و هو على شكل ورقة تدبس في الجواز و المرافقين تصريح زيارة و حتى هو ورقة و هكي تكونوا جاهزين تدخلوا كندا
استقبلنا في المطار مهندس من الزنتان يعرف زوجي و خوي ههههه المهم و كان حاجزلنا في اوتيل و رفعنا ليه طول و طلع هو و زوجي شروا عشي و بعدين اتعشينا و ارتحنا من تعب السفر طبعا خلوا ديما معاكم شنطة صغيرة داخل الطيارة باش تحطوا فيها الحاجات الضرورية لان مرات ما تقدروا تاخذو شناطيكم بسرعة. طبعا رقدنا من الساعة 7 او 8 لاننا مش متعودين ع الوقت و فقنا الساعة 4 او 5 بتوقيتهم و عزمنا صديق زوجي لحوشه و تعرفنا بزوجته و اولاده و اليوم اللي بعده روح لليبيا و احني قعدنا بروحنا .
كانت ايام صعبة خصوصا قصة شراء التلفون لان الهواتف النقالة تختلف عن ليبيا المهم حال اللي ما يعرفش شرينا من ازفت شركة و هي شركة fido رد بالكم تاخذوا منها شفرة لانها شركة نصابين هما و شركة rogers ننصحكم بشركة virgin او koodo
قعدنا في الاوتيل 5 ايام و كان في واحد ليبي ثاني ايدورلنا في شقة و علي ما دور مالقاش و انا و زوجي كنا اندورو اونلاين و سبحان الله احني اللي لقينا و مشينا شفناها و عجبتنا و سكنا فيها ثاني يوم اللي هو سادس يوم لينا في كندا
و الاثاث كنا اندوروا اونلاين ع الاثاث المستعمل بس غرفة النوم خذيناها جديدة بعد ما ضحكت اني على مديرة محل من جامايكا و خليتها تبيعني غرفة جديدة و كاملة مع فرشة السرير و التوصيل و التركيب مجاني و كل هذا ب 480 $ مسكينة لما حكيتلها اني طالبة و حالتي المادية ما تسمحش و قصة حزينة نزلتلي فيها و لتوا عندي علاقة بيها و حتى زوجي تعرف على زوجها وولدها

ماشاء الله عليك اختي حنان و انشاء الله في ميزان اعمالك يا رب
و انشاء الله باقي الموفدين يتشجعوا و يعطونا شوية من وقتهم عرفينكم مشغوليين و ربي ايعاونكم لاكن معليشي عاونوا
خوتكم اللي بيسافروا حتى بحبيل زي ميقولوا و ربي يفتحها علجميع

السفر إلى دولة أوربية أو كندا أو أمريكا..هي تجربة لايمكن نسيانها unforgetable experience والواحد ميشعرش بقيمتها أو حلاوتها غير لما يتركها.... ويشعر الشخص لما يعود الى دولة عربية متخلفة"بالقياس" كما حدث معي للأسف..يشعر كم كان كل شئ جميل ومثير وفريد من نوعه في تجربة السفر للخارج.....وتتحول حياته في البلد الأصلي المتخلف إلى كابوس...كوابيس وهو راقد..وكوابيس وهو واعي...وممكن يصبح مجنون من هول الصدمة!!

اخي عبدالناصر ... اني شخص مش امجرب السفر بشكل كبير وتصديق لكلامك عندي صديق مقيم هنا في تورونتو سألني هل عجباتك المدينةقلت له قال لي لما اتروح راح تبكي عليها

ضحكتني خوي عبدالرحمن وعلي فكرة الليبي اللي دورلنا شقة من مدينة زوجي لاني انا و زوجي مش من نفس المدينة
وبي يوفقك و شكرا خوي ناصر و خوي awity على المشاركة

لو ان الموضوع يتم وضعة في جدول وعلى شكل تساؤلات افضل من انه ايكون على شكل سرد اقصة .. وراح انحاول انضيف شي في هذا الموضوع من واقع تجربتي الشخصية

بالله مارأيكم في كندا بشكل عام من جميع النواحي وشكرا

تبي الحق انا ما نحبهاش كندا لانها غالية و الناس ماديين جدا يعني ايدوروا في الفلوس هلبه و عندهم وجهين و تحس يعاملوا في الصينيين أحسن بهلبه و هذا تأكدت منه لما قريت كورس اللغة رغم انهم يعاملوا في المسلمين كويس بس الحق مش مريحين هذا رأيي و ان شاء الله نكون غلطانة

لا انتي مش غلطانة..هاذا هو حال الحضارة الغربية..materialism is dominant وبعدين هم يحترموا اكثر في الصينيين لأن الصين قوة اقتصادية عظمى الأن ومرشحة خلال خمس سنوات من الأن لأن تقفز من ثالث اقتصاد عالمي"بعد امريكا والمانيا"...إلى الاقتصاد الأول عالميا...نفس مايحصل في مصر هنا من التعامل بشكل خاص مع الخليجيين لانهم قوة افقتصادية كبيرة جدا بالنسبة لمصر رغم تفوق الاخيرة حضاريا وتاريخيا....والانجليز يقولون money talks!!!

أخي اوييتي awity
لو سمحت رد عليا رحم الله والديك راسلتك علي الخاص

عندك الحق خوي عبدالناصر money talks

نفس الشعور اللي طرحتوه ... بس مرة نزلت فيا وحدة من اعضاء الموفد قالت لي انت مثال للتشاؤوم .. اني ما اعرفتش باش مميزة كندا ... ممكن الميزات اللي فيها : لما اتطون في الشارع ما يقدرش حد يعرف هل انت كندي او لا ... والامان والنظام ... واني هذا كله موش مهتم بيه ... نقصد اللي مازال ايفكر انقول اكيد بريطانيا افضل ... واهني انت اتساوي افلوس بس .. فعلا اقتنعت ان الليبيين شعب مافيش زيه حد

ابداع يا اخ awity و بارك الله فيك حلوة فكرة الجدول