يوميات موفد....من اصدار القرار الى.....

اليوم الاول من الرحلة اول شي للي طلع اسمة في القرار الافضل يبقى معاك ظرف كبير او ملف يبقى فيه كل اثباتاتك عشان اللي يطلبوها انت تلقاها يمشي يصور الافضل مجموعه كبيرة من الصور للاحتياط والاصل ديما معاك في ملفك او نفس ما انا داير ظرف كبير فيه كل شي ويصور الافادة وكشف الدرجات وجواز السفر عربي وصفحة الانقلش لو وللمدام اذا كان متزوج و عقد الزواج ويطلع من ركزو""من السجل المدني 1-شهادة ميلاد 2-اقامة 3-وضع عائلي 4-شهادة حسن سيرة وسلوك" ويترجمهن كلهن عند مترجم قانوني واذا كان من طبرق يمشي لمكتب رحيل للترجمة فهو معتمد من المحكمة ...ومن الافضل انك تحصل على شهادتين تزكية من مكان عملك وخلي اللي يكتبها يكتبها بالانقلش بدال ما تترجم ...

توا استفسارات وبحوث درتها.. وسعو بالكم واقروا كويس مافيش حاجة تجي بالساهل وان شاء الله ح يساعدونا المشرفون واصحاب الخبرة وصدقوني الموفد عنده الزبدة
اولا مازلت حاير عشان نحدد الساحة وكل ما ندخل على ساحة توا نقوللكم ونعطيكم اللي عندي وان شاء الله انا معاكم الى ان نبدا اللغة والدراسة الى ايفاد الدكتوراة ان شاء الله ان كان عطانا الله العمر ووفقنا
هذا استساراتي عن المانيا وقد افادنا احد اهم الاعضاء جزاه الله خير العضو starz10de وقال
طبعاً المانيا دولة ممتازة ولكن الدراسة ايظاً فيها صعبة. ولكن مشكلتك الكبيرة هي معادلة الدبلوم العالي لانه لا اعتقد ان يعادلوه بالبكالوريس. ولو حصلت قبول راح يطلبوا منك مدة وممكن سنة او سنة ونصف وهذه راح تمشي من المدة متاعك لو فرضنا انك راح تقدر على المعادلة في سنة او سنة ونصف. بالنسبة للتوفير تقدر توفر مع الضغط لأن المنحة اعتقد حاليا كويسة عن زمان. فكر كويس احسن ما تجي لألمانيا وبعدين لا قدر الله تضيع وقت والمدة ما تسدكش ولا تجي من ماجستير ولا بكالوريس.
وهذه من العضو المحترم thesoldi2r قال
هناك عدة نقاط اريد منك التمعن جيدا فيها, افضل ان اكتب لك المشاكل والحلول في اطار نقاط وهم كالتالي :

1- موضوع توفير المال عندما ترجع, يعتمد علي البلد والمصاريف الشخصية ولكني اعتقد انك يجب ان تلغي هذه الفكرة اساسا وتجعلها فكرة ثانوية
2- موضوع دراسة الماجستير في المانيا بشهادة الدبلوم العالي امر مقعد بعض الشي ولكن يمكنك بصعوبة الحصول علي ذلك, وذلك باختيار مستوى جامعات تدرس باللغة الانحليزية ومع ذلك قد يتم رفضك الا اذا اجتزت امتحان الدخول ,اذا اردت دخول الامتحان عليك ان تراجع كل مادرست لاجتياز هذا الامتحان
3-انا شخصية احمل دبلوم عالي هندسة كهربائية- تحكم الي , قمت بمعادلة افادتي الى المناهج الالمانية ! فتحصلت علي قبول يمكنني من خلاله ان ادرس الباكلريوس ولكن ابتداءا من الفصل الثالث وليس من الاول , يمكنني القول انني سوف ادرس الباكلريوس لمدة سنتين ومن ثم دراسة الماجستير سنة ونصف ...وان مدة الدراسة ستكون اربعة سنوات ومع العلم باني لست مبتعث عن طريق الحكومة
اتمنى لك كل التوفيق اخي الفاضل
واجعل هدفك دائما نصب عينيك
جزاهم الله خير

ما زلنا في المانيا

بسم الله الرحمن الرحيم والصلاة والسلام على الرسول الكريم وبعد
المقصود اولا واخرا من وراء هذا العمل وجه الله الكريم وهذا لا يمنع انكم تدعولي بالتوفيق في الدراسة والدعاء لوالدي وبلذرية الصالحة هههه في نقاط بنقولها عشان نكونو واضحين:
اولا :انا نخدم بالنت ع الريفي يعني لو صار تأخير فا مش مني لان الريفي عارفين تعبان.
ثانيا :انا معيد في المعهد العالي للمهن الشاملة قسم كهرباء والكترونات تخصص اجهزة تحكم متزوج ونرجا في وليد ع الطريق ادعولنا بس ههه ..البوادي يقولو الكلام من غير معنى سفاهه القصد اللي وضعه نفس وضعي يمشي على الترتيبات اللي بنديرها ...طبعا في الاجراءات الحكومية اما بالنسبه للساحة الدراسية فكل حسب جوا ...انا الى الان مازال
ثالثا:سامحوني ع الاخطاء الاملائية لان نتكب بالمجموعة الى الان 793 كلمة وفي الاغلب بالعامية
رابعا :المعلومات اللي مش مني ونكون سألت عليها انا مش مسؤل عليها اما اللي نقوللكم انا درت فانا مسؤل والله وحدة يعلم اني نبي نخدم
انا عندي نف مشكلة الدبلوم كهرباء والمشكلة هذه دايرة ضجة عند المعيدين في معهدنا وهي ان الجامعات ما يقبلوهاش ويبو بكالريوس المهم ...اليكم الاتي:
1-في 3 معيدين طلعو من قبل واحد ماليزيا وواحد بريطانيا والاخر مش عارف كندا او امريكا كلهم توا يقروا في سنة لغة ....المهم واحد منهم امتاع بريطانيا اتصل بالشباب في المعهد وقال ان الجامعات ما يقبلوش في الدبلوم وهو الوحيد من الثلاثة تفطن للقبول الاكاديمي .
2-في استاذ في المعهد عنده بكالريويس والماستر واخذة من مصر قالي الحل انك تختار مصر لسنة اللغة وفي نفس الوقت تقرا البكالريوس في الاكاديمية اللي هوا حضر فيها اعتقد اسمها "الأكاديمية العربية للعلوم و التكنولوجيا و النقل البحري" وبعد ما تاخذ البكالاريوس تغيير الساحة ...المشكلة انك تقرا على حسابك في الاكاديمية ....اما رائي انا :
اذا قريت في مصر وتبي تغيير الساحة الله اعلم يقبلو او لا لان ادارة البعثات تطلب تقرربر وسبب لتغيير الساحة منك ومن الاستاذ المشرف ومرات ما يقتنعوش وانا مش عارف اذا التغيير يقصدو بيه بعد اللغة او اثناء الماستر...وفي نفس الوقت مش عارف كم المواد الاستدراكية المطلوب مرات واجد...
3-من البحوث اللي درتها عرفت ان المانيا اليكم التي :
واحد قال...و الله نصيحة ليك مادام فترة الافاد 4 سنوات بس , حاول اتشوف دولة تانية لان اللغة صعبة بما انك بتخش للجامعة....""طبعا انا قتله المدة 4 سنوات بس انا مش عارف بالضبط 3 او 4""....وقال بريطانيا افضل
سألته أي لغة صعبة الالمانية ولا النجليزي؟ ماقالو الدراسة بالانجليزي "طبعا لاني دبلوم فانا فكرت ان هو متوقع اللي عندا دبلوم =لا لغة"ههههه لان صارت معاي واجد المهم
قال: مش كل الجامعات الي يقروا بالانجليزي معظمهم بالالماني
اولا لو بتجي المانيا حتقرا كورسات لغة المانية باش تتعامل بيها في الحياة اليومية ةتانيا لازم اتخش على امتحان لغة الانجليزية (ilets ) او توفل وبدرجات عالية على حسب الجامعة وتانيا معظم الجامعات تتطلب امتحان اسمه GMAT
يعني لو بدير الي قلتلك عليه , حتبي وقت مش اقل من 5 شهور لغة المانيا و تبي مدة لتحضير امتحان اللغة الانجليزية ومدة تانية لامتحان Gmat يعني عندك من سنة الى سنتين باش ادير الي فات وفضلك سنتين بس من مدة الافاد وهذه المدة ليست كافية لدراسة البكالوريوس لان البكالوريوس مدته من 3 سنوات الي 4 سنوات
انا قلت : شنو GMAT ونقرا انا عادي والفترة كم تتوقعها انت
قال: Gmat امتحان لابد من تجاوزه بدرجة معينة للالتحاق بالجامعة سواء بتدرس بكالورويس او ماجستير وهو عبارة عن امتحان متكون من اربعة اجزاء : 1 جزء خاص بقواعد اللغة الانجليزية 2 اسئلة في الرياضيات والفيزياء 3 اسئلة على السياسة واعطاء الرأي فيها 4 كتابة مقالة ..
وطبعا مش كل الجامعات يطلبوا في الامتحان
انت عندك لغة انجليزية؟
قلت : ان شاء الله 60-70% لكن لما سألت الوالد ضحك وقالي مش اكثر من 30% بس كويسة "تحطيم"هههههه
قال: خش على القوقل واكتب GMAT واقرا عليه
توا احسن حاجة اديرها خش على مواقع الجامعات في المانيا وشوف مصوغات او متطلبات الدراسة في الجامعة و تقدر تحول الصفحة من الماني الى انجليزي "على اساس 70% ههههه "الجاهل من قال اعلم وللاسف انا جاهل"
, في الاخير لو عندك نصيب من الله حتاخد الي تبيه , وصلي الاستخارة وتوكل على الله
قلت بارك الله فيك ما قصرت
ثم جائنا الخبر اليقين من اخت ما نعرفهاش قالت:
لا مش كل الجامعات تطلب فى امتحان GMAT لانه اصلا يخص تخصص الاقتصاد والمنجمنت فقط , العلوم الهندسية تدخل على الماستر بشرط المعدل واتقانك للغة سواء المانيةDaf oder DSH او انجليزية حسب المستوى المطلوب,,, الاخ اللى عارض سؤاله هو خريج معهدعالى واللى تعادل بالالمانية Vordiplom لان الدبلوم هنا مقصود بيه اقل شى بكالوريوس ,, فنصحية للاخ عبد السلام انك تكمل البكالوريوس وتخش على الماستر خير ماينزلوك او يحبطوك ويقولك شهادتك ماهى الا Vordiplom اى وكانك بدون شهادة.. او الحل التانى قبل ماتعب روحك تبعت اوراقك للجامعات او بالاحرى للuni assit فى برلين وهما يعطوك الزبدة هل ممكن انك تقدم بشهادتك هده على الماستر او حاينزلوك لانهم هما الجهة اللى تدير فى المعادلات وهى اللى تقررلك , فديرها اول ماتوصل او حتى من ليبيا بحيت لو قالولك مايجيش منه اما كمل بكالوريس او انقل الى ساحة ممكن فيها انك تعادل شهادتك وتاخد كورسات تمهيدية وتخش على الماستر طول وربنا يوفقك ان شاء الله

السلام عليكم
اسف للغيبة اليومين اللي فاتن كان الوالد مريض شوي ربي يشفيه ويعطيه الصحة
على العموم كنت متوقع ردود واسألة بس.....
اللي فات كان بالنسبة للساحة الالمانية اللي جايات ان شاء الله تركيا و ماليزيا وبريطانيا و امريكا

شكرا ليك لوسعة بالك لكتابة تجربتك عن الافاد الى اكيد حايستفيدو منها الاعضاء

السلام عليكـم ورحمة الله وبركاته
مع أن رحلتك تبدوا مختلفة تماما عن رحلتي إلا أن مجهودك هذا تشكــر عليه ،، بارك الله فيك أخي الكريـم علي مجهوداتك وكتابتك عن رحلتك في إجراءات الإيفاد والتي لازالت في بدايتها ..
أتمني من باقي الأعضاء المشابهين لحالتك أن يستفيدوا من تجربتك وأن يشاركوك بأرائهـــم وتعليقاتهـم وخاصة أهل التجربة والخبـرة في هذا الموضــوع.

أسأل الله العلي القديـر أن يوفقك ويسهـل لك أمورك و أن يحفظ لك والديك و يرزقك بالذريـة الصالحــــة

السلام عليكم
شكرا لك اختي amani laidi على المرور ايضا شكرا اختي Lotus flower ويا ريت تحكيلنا شنو الاختلاف عشان الفائدة تعم وانا تقريبا حددت الساحة بس انا وعدت بشان ماليزيا وتركيا وبريطانا وامريكا وحنحكي على ماليزيا ان شاء الله

اسف على الاطالة الفترة السابقة الوالد كان مريض وفي العناية وتوا الحمد لله على العموم

الساحة الماليزية
كلمت احد الاصدقاء في ماليزيا نفس حالتي دبلوم ومتزوج ........قال : انا الان نقرا في لغة بس ومقدم على قبول اكاديمي في 5 جامعات وقالوله الرد بعد 7 اشهر ........اما المعيشة مش غالية ومش رخيصة متوسطة يعني والاجارات مابين 400 الى 600 حسب القرب من وسط المدينة ولما يكون ابعد يكون ارخص وهوا في كوالا لامبور

أما رأي انا لما درت بحث لقيت جامعة كوالا لمبور تصنيفها اكثر من 5000 حسب موق www.4icu.org والتصنيف الول في ماليزيا هي UNIVERSITI TEKNOLOGI MALAYSIA وتصنيفها عالميا 598 واعتقد القبول صعب شوي فيها شايفا روحها شوي اما اكثر الاسباب اللي تباعدنا عن ماليزيا بشكل عام : المناخ رطوبة ودرجات حرارة عالية وفي نفس الوقت الموفد لما يطلع المفروض يحسبها 2x1 لغة وتعليم واللغة الاجليزية رقم 1 في كل مكان فا الاحسن الدراسة في مكان علة يكو انقلش............وهذا رأي انا وكل واحد وجوا

اما تركية لما اتصلت بواحد من الاصدقاء وهو معاه عائلتة وزوجته هي الطالبة قال:
انا الان في انقرة الجو مية في المية ومتريحين الاجار قال ب400 ليرة يعني رخيييييييييييص وهو ماجر شقة قريبة من وسط البلاد ومكان راقي وسمح والاسعار معقولة لكن حتى هو لما يبي يقدم قبول اكاديمي لزوجته مع العلم تخصص طب وجد ان اغلب الجامعات تبي قبول لغة تركي "نعم افندم تركي" وقال يمكن في بعض الجامعات بالانقلش بس مازلت ما مشيتلهن .....ان شاء الله انا نتابع الموضوع ونقوللكم.........بس في جامعات اخرة تقدرو تتواصلو معاها اشهرهن جامعة Anadolu Üniversitesi وتصنيفها الاول في تركيا و 151 علميا وهي مش في انقرة ولا في اسطنبول هي في Eskisehir مش عارف هذه وين...الجامعة الثانية Middle East Technical University علميا تصنيفها 289 في انقرة و الرابعة على تركيا Istanbul University وعلميا 483 في اسطنبول وفي جامعة الشرق الادنى في قبرص التركية Near East University ولها اسم تركي هو YAKIN DOGU ÜNIVERSITESI عالميا 1662 وتصنفها تبع قبرص الرابعه ولها صفحة عربية على الفيس يرد عليكم واحد عربي........ولما يجد جديد من صديقي ح نقوللكم وفي واحد تركي توا نحكي معاه ونجيبلكم الزبدة ان شاء الله سامحوني على كثرة الكلام بس انا كنت نبي واحد يشفي غليلي فانا كتبت بالتفاصيل ولاي سوال انا تحت امركم

الف شكر ليك اخي عبدالسلام

بالنسبة لي الحمد لله كل المميزات السابقة وجدتها في قبرص التركية ,وانا الان بادية في الدراسة ..وبفضل الله تعاملت مع مكتب قبول جزاهم الله خيرا (بالرغم من اني لم اجد له اعلان هنا ع الموفد ) بس صراحة خدماتهم بها مصداقية يعني بالاضافة الي انهم يجيبو لك قبول لغة واكاديمي حتي خدمات استقبال في المطار وتوفير سكن مناسب للعزاب والعائلات وبانسب الاسعار..و في فتح حساب في البنك و الحصول على الاقامة ..يعني خدمات متميزة ومصداقية ..لو اي حد يبي اسمه المكتب انا حاضر .. وارجو ان لا تفهموها علي انها دعاية للمكتب بس خدمة لوجه الله ونحن مجربين وكلنا مرينا بيها الامور هذي وشحورة المكاتب ..

بالنسبة للجامعه هي جامعة شرق البحر المتوسط EMU

افضل جامعه في قبرص التركيه واقدمها ..وتوجد في مدينة فاماقوستا- تنطق ماغوسا بالتركي.
*** جامعة شرق البحر المتوسط هي اول جامعة معترف بها التعليم العالي في ليبيا وننصح بالدراسة فيها نظرا لامكانياتها العلميه الجيدة ومعترف بها سواء من وزارة التعليم او القياس والجودة ومعترف بها على اساس انها رابع جامعة من ناحية التصنيف في تركيا ..ناهيك عن وقوعها على البحر وجوها المعتدل ومناخها الجميل ورخص اسعار الحياة فيها وسهولتها والامان الذي يشعر به الطالب حالما يصل هنا.

لوسمحتي شن اسم المكتب و وين يقع وكان عنده رقم اعطيني

عبدالسلام عياد..بارك الله فيك اخى على طولة بالك ووسعة بالك على الكتابة على الكى بورد كله لاجل ان يستفيد غيرك ..اسئل الله ان يجله فى ميزان حسناتك يارب والف الف لاباس ع الوالد الفاضل وربى يقومه لكم بالسلامة ويمد فى عمره ان شاء الله

السلام عليكم

شكرا اعزائي على المرور وانا في الخدمة

اخي سعد الله مشكور ع المرور وموفق باذن الله

الاخت osmy جامعة EMU جيدة لكن الفكرة المطلوبة مع الدراسة هي المهارة في اللغة واذا انت تخصصك Electronic Engineering انا نعرف ان افضل مكان هو بريطانيا بس ان شاء الله موفقة حتى قبرص مش بطاله مع اني ما نعرفش حد قرا فيها وان شاء الله انت حتفيدينا بكل مستجد

الاخت جوجى مونى شكرا جزيلا لك ويتقبل الله منا ومنكم .......فهمت انك الى الان مازال ما اخترتي الساحة انا ننصحك بالمانيا واقري شن كتبت عليها وزيدي ابحثي عليها الى الان انا شفت انها الافضل للطب بالذات وفي وقت قصير تحصلي الPhD

ان شاء الله موفقين جميعا

omsy كتب:

فعلا اخي عبد السلام ممكن انت او اي حد تاني يقول ليش قبرص وليش مش بريطانيا بس شو رايك نقلب السؤال ؟؟

اخي انا عندي قناعة ان الاستفادة علي الشخص نفسه مش ع الساحة ..يعني انا نعرف ناس اخذو الماستر في ليبيا هم احسن واجد من اخرين اخذوها من بريطانيا مثلا .. وبالنسبة للغة هذي علي اجتهاد الشخص نفسة وفي كل ساحة موجودة الدورات والامكانيات بس الطالب يقول يا رب ...

بالنسبة للميزات اللي لقيتها في قبرص هلبة والله وانا كتبت عليها في الموفد اكثر من مرة وممكن ترجع للمساهمات متاعي وتشوف عشان ما نكررش الكلام
عموما ربي يوفق الجميع لما فيه الخير ويعيننا علي طلب العلم والرجوع الي ارض الوطن

ولكن حتى الكورس ومحتوياته يلعب دور مرات كورس ماجستير في ليبيا خير من قبرص مثلا أو حى بريطانيا (رغم أن أن هذا ربما يستحيل بالنسبة لبريطانيا لأن حتى لو الكورس تعبان وحتى في الجامعات السيئة الإمكانيات اللي عندهم في الجامعات مهما كانت بسيطة فهي أفضل بواجد من ليبيا وماعنديش أي فكرة عن قبرص).

السلام عليكم اسف ع التاخير لظروف معينه
اختي omsy الفكرة في بريطانيا هم البلد الام للغه الانجليزيه هذا قصدي في الاستفادة اما الاستفاده العلميه زي ماقلتي ع الشخص نفسه وزي ما قال الاخ Abu Mohamed ..بس اضيف ان حتى الجامعات بصيتهن وقوتهن تختلف في الاستفاده منها
تم تحديد الساحه بريطانيا ان شاء الله لكن المشكله اني سمعت ان بريطانيا مش كل الجامعات تقبل في دبلوم وان اغلب الجامعات تطلب في بريماستر "مواد استدراكيه" وان الموفد لما يتحصل ع الماستر لا يقبل ك عضو هيئة تدريس اذا كان دبلوم ان شاء الله ناكد ع هالمعلومه وننقلها

السلام عليكم
يا ريت إتأكدلنا على المعلومة يا خوي عبدالسلام عياد بالنسبة للدبلوم والمواد الإستدراكية أني معيدة فالمعهد يعني لو قريت ماستر بدون مواد إستدراكية ما يقبلوني كعضو هيئة تدريس بعد ما نرجع وإلا الكلام هدا يخص اللي ماشي على حسابه أو مرافق ما قبلوشي يا ريت يا خوي اتوضحلنا

omsali كتب:

السلام عليكم
يا ريت إتأكدلنا على المعلومة يا خوي عبدالسلام عياد بالنسبة للدبلوم والمواد الإستدراكية أني معيدة فالمعهد يعني لو قريت ماستر بدون مواد إستدراكية ما يقبلوني كعضو هيئة تدريس بعد ما نرجع وإلا الكلام هدا يخص اللي ماشي على حسابه أو مرافق ما قبلوشي يا ريت يا خوي اتوضحلنا

السلام عليكم
اكدت ع الخبر من الاستاذ علي دخيل كذب الاشاعه اللي سمعتها انا من احد اساتذتي في المعهد...وقال بالنسبه للمعيد لما يتحصل ع الماستر يبقى عضو هيئة تدريس ان شاء الله  سواء بريماستر او بدون

عبدالسلام عياد كتب:

[center]بسم الله الرحمن الرحيم والصلاة والسلام على الرسول الكريم وبعد
هذا اول موضوع لي في المنتدى ..والمقصود اولا واخرا من وراء هذا العمل وجه الله الكريم وهذا لا يمنع انكم تدعولي بالتوفيق في الدراسة والدعاء لوالدي
الفكرة جتني لان من يوم ما طلع القرار وانا دايخ ونسأل وموسع الشغل وردت بي الذاكرة الى ايام الاعدادي والثانوي وين نقرا شنو احس مدرسة واسهل مدرسة سبحان الله
الموضوع لن يخلو من الفكاهه للمتعه وان شاء الله ما نطقوش في حد ولا حد يطق فينا
القرار طلع يوم الخميس الموافق 9-5-2013 والى الان يوم 19 وانا تقريبا عزلت على العالم حتا هلي ونقعد تقريبا من6الي 9 ساعات عنت طبعا ريفي مرخي
اول 3 ايام كان حالي          
ال5 ايام التالية    
اليوم  
قولو يالله وهيا[/center]

نفس القصة اللي صارلتي    ان شاء الله غير امشت الامور بس

الله يبارك فيك وفي والديك وان شاء الله موفق

شكر علي المجهود
اني نفس القصة دبلوم عالي  تخصص تحكم الي نطام 4 فصول  4 سنين تانوية تخصصية كهرباء والالكترونات
هل جامعة شرق البحر المتوسط فيها pre- master  والقراية فيها انجليزي ؟

عدل سابقا من قبل aas17f في الإثنين 30 سبتمبر 2013, 1:16 am عدل 1 مرات