ماهو احسن معهد لغة في ماليزيا لو سمحتو مساعدة لاني دخت

السلام عليكم ورحمة الله وبركاته 


ممكن يا اخوتي لو سمحتو تقولولي اما احسن معهد لانه بصراحة كنت نبي نسجل على معهد els في جامعة upm لكن في هلبا كلام عليه في المنتديات انه هذا المعهد ماينفعش ودراسته متعبة من ساعة 8 ونص للساعة 3 ونص وفي هلبا قالو انهم ندمو انهم قرو ف المعهد هذا وايضا في ناس تقول لا كويس  واني نبي نقرا كورس لغة انجليزية مكثف ونوصل للمستوى 109 بيش نقدم على الماستر في جامعة upm  وفي ناس هلبا قالو البرتشل كانسل قاعد احسن وفي ناس تقول لا حتى هو ماينفعش 

بالله عليك اللي عنده معلومة مايبخلش بيها علينا وقولولنا اما احسن معهد للدراسة من وجهة نظركم وشكرا

وعليكم السلام 
ياأخي في هذا الموضوع خصوصا لا تجد من يجزم فيه لان كل شخص سوف يذكر لك عيوب ومزايا كل معهد على حسب وجهت نظره, وانا كذلك سوف اتحدث عن معهد ELS فأن درست في هذا المعهد ولكن في فرع  Subang Jaya يتميز معهد ELS بالتركيز على الكتابة والقواعد وكذلك القراءة واخرا الاستماع الذي يعتمد عليك بالدرجة الاولى. يوجد في هذا المعهد ثلاث مستويات من المبتدئ الى المتفدم وكل مستوي يوجد به ثلاث مستويات كذلك, بمعنى ان مستوي المبتدئ الذي يشار اليه من 101 الى 103 يوجد به 101,102,103 وقس غلى ذلك بافي المستويات الى ان تصل الى 109 والذي يعتبر اخر مستوى في هذا المعهد.بمعنى اخر لو انك بدأت الدراسة من المستوى الاول 101 سوف تستغرق تسعة اشهر الى ان تصل 109 لان مدة كل مستوى هو اربعة اسابيع, وكذلك يوجد به كورس لتحضير امتحان الايلس, بكل صدق يا اخي مستوى هذا المعهد ليس سيئا بل بالعكس لو اتيحت لي الفرصة مرة ثانية لدراسة اللغة الانجليزية لن اختار غير هذا المعهد. أما بالنسبة للوقت فهو فعلا من 8 الى 3.30 ولكن الوقت يوم الجمعة من 8 الى 12 لكي تذهب الى صلاة الجمعة. هذا بالنسبة لمعهد ELS Subang Jaya مع العلم ان كل الفروع متفاربة جدا في مستوى المدرسين....هذه الحيرة قد وقعنا فيها جميعا ولكن عليك بصلاة الاستخارة وتوكل ع الله.... هذا والله اعلم...

بارك الله فيك يا اخي جمال على ردك الجميل والاكثر من رائع واللهي لقد افدتني كثيرا وبصراحة اغلب اللي يتكلمو على هذا المعهد هما السعوديين لانه شكله بصراحة لايعجبهم العجب مع احترامي ليهم واني زي ماقلت بنختار els فرع جامعة upm لانها هي الجامعة نفسها اللي بنحضر فيها الماستر باذن الله وصحيت مرة تانية ولانه ايضا عن طريق برنامج اللغة المكثفة معش يبو امتحان ايلتس يكفي انه نوصل للمستوى 109 وندخل على الماستر طول لانه هذا البرنامج المكثف معترف فيه من قبل الجامعة على انه بديل لامتحانات التوفل والايلتس

كانت تجربتي في 2001 افضل المعاهد في ذالك الوقت كان معهد ELS

معهد els من افضل المعاهد في ماليزيا انا شخصين درسة فيه افضل فرع هوا في كوالالمبور العاصمة والدراسة فيه مكتفه وانا انصحك ان تدرس في هدا المعهد والدي قال المعهد ليس جيدا يعني انهو كسول او احتجت قبول من هدا المعهد او ايمعهد في ماليزيا راسلني انا عايش في ماليزيا شكرا

السلام عليكم
اخي الكريم افضل معهد في ماليزيا ELS بلا منافسه لكن ما توقعش ان حاجه كبيره لان ايدرسوا فيه بعض الماليزيين والهنود والصينيين والايرانيين يعني الاكسنت متاعهم بالهون ويوجد بعض الامريكان والبريطانيين والنيوزيلانديين هضا ينطبق علي جميع الفروع ولكن الدراسه علي مجهودك انتا
ولان انتا بتقرا اكاديمي فهذا المعهد حيأهلك كويس وجميع الفروع الدراسه من 8ونص الي 3وربع يعني معسكر وتعب لكن فائده

المعهد الثاني British Council 
هذا المعهد لايركز علي مهارة الكتابه والقراءه ونما اكثر تركيزه المحادثه وهو معهد ممتاز والمدرسين كلهم بريطانيين وتدريس جميل ورائع وراقي لكن ما ايأهلكش للاكاديمي والدراسه فيه 3 ايام فالاسبوع واليوم اللي تجي فيه الحصه 3 ساعات فيهن نص ساعه راحه

في شئ مهم لازم تعرفا ان السقاره لا تتعامل مع British Council

و ELS يقبل اقل من 34 سنه فقط ولايعمل فيزه للعائله حسب القرارات الاخيره 

فلو انتا تتوافر فيك الشروط للدراسه في ELS فننصحك بيه واقل شي لو تقرا عندهم 6 شهور

ثم تنتقل ل British Council وتقرا فيه علي حسابك 3 اشهر لتقويه المحادثه حتكون مؤهل بدرجه كبيره للانخراط في دراسة الاكاديميين
وموفق ان شاء الله

صحيت خوي سالم على المعلومات الجميلة لكن حاجة تانية نبيها منكم انه لو جيت بفيزا سياحية نقدر نحولها لفيزا طالب ولا لا 


وفي واحد صديقي هو حاليا في ماليزيا وجي بفيزا سياحية وقالي عادي يحولوها وفي ناس تقول لا 

نبي نعرف نقدر نحولها ولا لا وشكرا لكل اللي ردو عليا في قصة المعهد 

وشكرا

خوي اكثر ما يعيب ماليزيا الاجراءات وكل يوم تسمع قانون جديد وفي اي مكان تمشيله بتسأل علي حاجه تسمع اجابات مختلفه حتي في داخل الجامعه نفسها
يعني حتي القرار اللي يصدر تلقي معاهد اطبق فيه ومعاهد لا ومرات ما يوصلش القرار اللي بعد اشهر لبعض الجامعات
ايعني ماليزيا توقع منها اي حاجه في اي وقت وبدون سابق انذار 

بالنسبه لموضع الفيزا
فالسابق كان الطالب ايجي بفيزا سياحيه وغادي يقلبوها له بفيزة طالب وكان جوي تمام
شهر 4 2013 طلعوا قانون ان الطالب اجي بفيزة طالب من دولته قبل ما يجي لماليزيه
وداروا حاجه اسمها موافقة الهجره الماليزيه VWR يعني فيزا لها رقم او كود او مرجعيه
وهذي اتراسل المعهد اللي حصلت منه القبول ايديرها لكي بع ما يطلب منك مجموعة مستندات ومبلغ مالي 
بعد شهر تطلع الموافقه وتمشي بيها للسفاره الماليزيه وعلي ضوئها يعطوك فيزا دراسيه

هذا علي اساس اخر شي عندهم
لكن هما كل يوم براي

ملاحظه مهمه
في السابق لما تكمل المعهد تنتقل الي الجامعه من غير ما تروح لليبيا
توا وحسب ما قال احد الاصدقاء في المنتدي ان لما تكمل المعهد وبتنتقل الي الجامعه ضروري تجي لليبيا وادير فيزا جديده للجامعه وهي نفس الاجراءات متاع المعهد
ان شالله انكون افدتك وديما حط في بالك ان ماليزيا متقلبه وكل يوم براي متزالت منظومه ضعيفه بكل 
يعني من غير مبالغه مرات انت تعرف قوانين خاصه بالجامعه اكثر من الموضفين واي اي مسؤل وهذا عن سابق تجربه
والسلام عليكم وربي ايوفقك 
وجامعة UPM من الجامعات المرموقه في ماليزيا وسمعتها الاكاديميه جيده جدا

أنا ننصحك بمعهد مشكور innovative international college

بسم الله 
معليش نبي الاستفسار عن معهد كلستروي لانه ايدير في اقامة للعائلة مش زي els  فهل تنصحوني بيه وتاني شي هل تنصحوني بماليزيا بشكل عام لاني قدمت في التاشيرة الامريكية ولكن رفضوني وخايف من الدراسة في ماليزيا انصحوني نصيحة اخ لاخيه

صحيت خوي سالم لكن متاكد انه تاشيرة الطالب متعطلش اكثر من شهر لانه اغلبهم قالولي تعطل مرات شهرين واكثر واني مستعجل الحق وشكرا