المنحة والمكتب الكندي (الشبعان مايندري على الجيعان)

لا حول ولاقوة إلا بالله العلي العظيم 
يعجز اللسان عن التعبير على هذه المهزلة الليبيين قريب يشحتوا في الغربة

يا شباب ديروا دعوه لتشكيل اتحاد ثم طالبوا بالغاء التعامل مع المكتب

dhnos كتب:

يا شباب ديروا دعوه لتشكيل اتحاد ثم طالبوا بالغاء التعامل مع المكتب

المشكلة في الفلوس اللي ما وصلوا من ليبيا و ليست المشكلة في اللي بيوزع الفلوس لانهم عارفين شغلهم في المكتب الكندي
للأسف المسؤولين في ليبيا رخصونا هلبه

لا حول ولا قوة الا بالله وان شاء الله نسمعو اخبار مطمنه باذن الله والله يفرجها على كل الليبيين

الحمد لله علي كل حال مرات واحد يفرح لما يجيه الايفاد لاكن وقت يسافر ويشوف كل شيء بعيونه يقول المفروض واحد مايسافر لين تصبح عندنا دولهتفكر في راحتك مش ناسين الليبين اهنيء قريب يمدوا ايديهم الشكوه من غير الله مذله والحمد لله

إن شاء الله ربي يفرج على عباده

اللهم امين يارب العالمين والطف بعبادك

Mustafa76 كتب:

المشكلة ليست في المكتب الكندي،،، المشكلة في الطريقة القديمة التي يتبعه القسم المالي في ليبيا  لعملية تحويل الاموال

نعم العله ليست المكتب الكندي.. المكتب الكندي ميقدرش يدفع للطالب فلوس من جيبه !! لازم يتم تحويل الفلوس من ليبيا للمكتب الكندي .. صدقوني المكتب هذا نعمه للطالب الليبي انا جربت ايام المكتب الشعبي كانن الفلوس يندزن من ليبيا و ما تنزلش منحة الطالب نين يستثمروهن السراقه و يبزنسوا من وراك و انت ترجى فالمنحه و فلوس الامتحانات من ايلس و غيره ياكلو فيهن بلا حشم لكن المكتب الكندي الله يسامحهم حقك يوصلك على داير مليم الا اذا الدوله الليبيه مابعثتش الفلوس " التقصير من دولتك مش من المكتب الكندي" و الله اعلم ربي يفرج عليكم و علينا

ميزة المكتب الكندي انه ما يعرفش هدا ولد فلان والا علان والا هدا من قبيلة كذا او كذا..ويخاف على سمعته لانه ما يخدمش في الليبيين بس... والحق انا مع العدل ولو في الظلم..لانه قبل المكتب الكندي كنا نشوفو في القهاير بعيونا غيرنا واخد حقه وحق غيره ويخش على الملحق الثقافي ويدف في الباب برجله وحنا من الباب هدا كان سمحولنا نخشو مرات يقولك مش فاضي عندي اجتماع...نذكر وحدة من المرات كنت نطالب ببدل كتب سنة 2009 ..ما عطوهاليش..جى واحد من جماعة.... ما نبيش نقول لاي قبيلة ينتمي المهم من القبائل اللي كانت واصلة وقت المقبور..قالي انا جاي بناخد فلوس متع مرتي من حقها تقرى لغة وانا بناخدهم كاش وما نبيهاش تقرا..تعرفو!! خداهم 13700 دولار كاش ..من قبل ما يدفع وبفاتورة مبدئية ومرته لا قرت ولا دخلت لغة ولا حسيب ولا رقيب..لذلك العدل مهم الحق حتى في الظلم..المهم كلنا سواسية وكلنا ليبيين..وهدي مش حنلقوها الا بالمكتب الكندي وفق معطيات ثقافة واساليب رؤوس الدولة في الوقت الحالي..وتبقى وجهة نظر شخصية....سامحوني طولت عليكم

يا ريت اﻻخ ابو الحسن اللي يتهم فينا بعقدة الغرب وان احني ندافعو عن المكتب الكندي يجي يشوف التعليقات الموجوده بارك الله فيكم

مهما سارقو ومهما نهبو ومهما زورو ومهما ومهما ومهما

فهم غافلون على وجود رقيب وحسيب لهم ... ربي في الوجود يا جماعه وربي يأخذ بالحق

اللهم أجرنا ^_^