سؤال ليه علاقة بالصحة خطر على بالي !!!!!

اختي احلام انا بروحي جي علي بالي سؤالك الف مرة قريب وقصقصت وسألت حتي في البعتات ..ف الغالبية يقولو لو توقف فترة طويلة ياعني شهر شهرين علي شنو يستعدي الموقف او الحالة المرضية حيوقف الملف بالمكتب الكندي بعدين حيفتحه ويسووله وضعه من جديد وخطرتي عليا في موفدة هني قايلة انها دارت عملية ولتوة من شهر 1 ماعطوهاش ولا جنيه من المنحة لانه وضعها مازال ماتسوواش والبعتات مازال مادرو شيء فياريت لو القصة صح ومالخبطتش فيها تسامحني اني مش متفكره اسمها بالضبط او حالتها بالضبط وربي يكون في عونها وهدي موفدة من موفدين وموفدات نفس الحالة ... فاكيد تراسل اللي مسؤولين وتعلمهم بلالخبر انه اي حد مرض متلا ومتين في المية حيقصوها اول شيء المنحة

خلي نقولك موقف صار قدامي الفوق في المكتب اللي في البعتات لدور التاني الي فيه علاء المندوب cbie المهم واحني واقفين كلنا كانت معانا والدة واحدة من الموفدات في امريكا وهيا كانت لسبب موقفة القرار مش عارفة ممكن مرض ممكن عملية ممكن ضروف المهم راسلت المكتب الكندي وقفوهولها واسأتنفت الدراسة بعد مش عارفة المهم شهور ومنحتها نازلة ماوقفوهاللاش .ف الوالدة تطالب انها يوقفقولها المنحة لانه بمجرد ماتنزل المنحة وتستلم باليد بغض النظر مفتوح الملف ولا مسكر ياعني منحة الشهر اللي استلميتها تنحسب من فترة الايفاد وتستقطع من القيمة ...قالتلهم انا ناخد فيهم كل شير ومستعدة نردهم للبعتات بس يرجعولي المدة اللي فاتت في اخر المدة ومايخصموليش ..فصارت مشكلة قدامنا وقالولها مادامه الفلو وتستلمو فيهنم معناها عندها انتو تقرو غير هكي لاي ظرف تراسلو المكتب الكندي المسوول وتوقفو القرار وتسكرو الملف لو لفترة طويلة وبعدها استأنفو الدراسة من جديد بمرور الظرف الطارئ.

هدا اللي ريته الحق وعرفته ^_^

Ahlam Ramadan كتب:

الأخوة الموفدين ... بنسال سؤال وعارفتكم بتقولوا (فال الله ولا فالك) .... وأنا مقدما بنقول بعيد السوء عليكم الكل.
سؤالي هو .....  لو الموفد لا قدر الله مرض في فترة الدراسة واضطر يخش للمستشفى ((وبعيدا عن موضوع التأمين الصحي وتكاليف العلاج)) كيف يصير في قرايته؟ .... هل يوقف قيده ويبدا السيمستر من جديد؟ هل يستمر ويعوضوه فترة غيابه؟ وكيف يصير في منحته الدراسية في حالة وقف قيده؟ هل يستمروا في صرفها أو يوقفوها لين يعود للدراسة ؟ وهل تخصم فترة المرض من فترة الدراسة؟
نعاود ونقول بعيييييد السوء عليكم جميعا ... والله المشاكل المالية اللي نسمعوا عليها خطرت علينا أسئلة ما تخطرش عالبال !!!!    

بالنسبة للمرض ما عنديش فكرة بالضبط .لكن كان الموفد توفى متاكد منها ان الايفاد يريح عليه,وحتى المنحة يوقفوها عليه.ومرات يأجل الدراسة للفصل الجاى ,, ربي يعوضه خير^-* وبعيد السؤ عليكم.

على اى حال مجرد مزحة, المهم فى الموضوع كالتالى :

سؤال وجيه ومن حقك تسئليه وبعيد السؤ عليكم كلكم وعن كل مكروه
هذا الامر يختلف من ساحة الى اخرى ,يعنى فيه اللى توقف معاه السفارة وفيه اللى يروح باش يعاين فى مستشفيات ليبيا,على الاقل افضل عناية ودكاتره كبار , وفوق منها علاج مجانى,وفيه اللى يفضل الشحاته فى بلاد الغربة ويلموله زملاءه بيش يعاين ,يعنى زى ما قتلك بالنسبة للمرض يعتمد على كل ساحة وظروفها.
مع العلم انى عارف قصدك على الدراسة ولكن موضوع سداد رسوم العلاج اهم ,لان شركات التامين مرات ما تغطى كل التاكليف ويصبح الطالب بين مشكلة الدراسة ومشكلة الفاتورة العلاجية.
واما الدراسة فهى ايضا تتوقف على زمن المرض بالنسبة للفصل الدراسى ,يعنى مرات يقدر يوقف ومرات لا
وايضا لى حسب نظام الجامعة وبلد الدراسة ,يعنى السؤال هذا اجابته عامة لانه لازم يكون مخصص لساحة وجامعة معينة.

الله يستر يا خوي عبد الله سامحني والله ماقدرت مانوليش علي ردك ...ومعا ش شديت روحي من الضحك ..مشيت في انه الموفد توفي وبيكمل الفصل الجاي رسمي .. ههههه الله يسترنا وخلاص

سراب الحقيقة كتب:

الله يستر يا خوي عبد الله سامحني والله ماقدرت مانوليش علي ردك ...ومعا ش شديت روحي من الضحك ..مشيت في انه الموفد توفي وبيكمل الفصل الجاي رسمي .. ههههه الله يسترنا وخلاص

شكرا على مرورك وزيدى مرة تانية او راجعينا الاسبوع الجاى مرات انجيبو بضاعة جديدة.^^
ربي يدوم الابتسامة على الجميع

Ahlam Ramadan كتب:

خوي عبدالله بالنسبة للموت بارك الله فيك كفيت ووفيت ... وريحت بالنا !!!!!
أما بالنسبة للمرض قلت على حسب الساحة وانا نتكلم على الساحة الكندية ... وإن شاء الله ما نضطروش نروحوا باش نعالجوا في شارع الزاوية ..... لكن الحق سؤالي على الدراسة وكيف يصير فيها (رغم أهمية التأمين الصحي) ؟؟
أختي سراب بارك الله فيك ديمة على الخط وحاضرة ربي يفتح عليك

وفيك بارك الله ,اى سؤال تانى بخصوصهم تفضلى واجابات اكيدة ومضمونة ,خوك الوكيل الرسمى^^

واما بخصوص المرض وكندا فهنا وللاسف لا املك الاجابة لان كندا تختلف عن قبل وخصوصا موضوع المكتب الكندى واترك لاخوتى فى كندا حاليا الاجابة . وربي ما يجيب سو ويحفظ الجميع.

الف سلامه علي جميع الموفدين وربي يحفظهم كيف حاجه واحده لم افهمها وهي ان الموفد يوقف المنحه باش يمشي يتعالج في ليبيا علاش مايعالج في كندا وينوض بصحه وسلامه هل اصبحت صحه الانسان اقل من الدراسه والمنحه وشكرا

في حال أن الموفد مرض لفترة بسيطة فهي مدة محسوبة من الايفاد ولو لا سامح الله دخل المبتعث في فترة مرضية توقف فيها عن الدرسة فيرسل التقرير الطبية و الحالة للمكتب الكندي و يخاطب البعثات الليبية باش يعطوة تمديد . شفاكم الله و عافكم أجمعين