ياعون من صلى الشاعر قدوره العجني

ياعون من صلى وقام صيامه = يلقاهن تقا في الاخره قدامه
ياعون هللي زكّا = وتما نظيف ونيته سلكّا
وتما بمال حلال زاير مكه = وزار الرسول اللي رفيع مقامه
وكمل فروضاته وطب السكا = طريق الصراط اللي طريق سلامه
وياويل من طاع الضلال وتكا = وتما يتهبك في طريق عدامه
هاذاهواللي ربك في الجحيم يركا = في يوم ما تفيد الغضيب ندامه
******
وصام في رمضانه = وعن لغو الكلام الشين صان لسانه
لا يذم والي لا يخون أمانه = وديمه علي طاعة الله كلامه
وغض البصر على انهى رعيانه = والقوران دارا مرشدا وإمامه
هاذاك فاز بتقوته وإيمانه = في يوم سماه الكريم قيامه
يوم رعب يا ساتر علي دخانه = يومن تكون الناس في دوامه
يومن يفر الشخص من حبانه = لا عذر ينفع فيه لا خرامه
امفيت من اللي يرحم الله سبحانه = اللي رضاه ما كيفه هناك كرامه
******
ياعون من يدبها = نفسه على الشهوات ما سيبها
وصام ع الخبايث صوم ما يقربها = بعيد ع الحرام وخلطتا وآثامه
وسنة رسول الله ما يهلبها = في كل خطوه هي تكون زمامه
وجميع الفرايض قايم بواجبها = وعنده مروّا خالصه وشهامه
وديمه طريق الشر يجنّبها = وعامل احساب الموت كل ايامه
وساعة حساب القبر يا مشيبها = وكثير الخطا يطبق عليه ظلامه
وطايع الله اتجيه يا مطيبها = روضة نعيم وعز فاق احلامه