اولا بالتوفيق ان شاء الله.
و الله يا خوي ان بنكلمك بكلام ليبي الي ليبي بعيدا عن احلام اليقظة.
اول حاجة في اختيار الجامعة هو ان تبحث بنفسك عن الجامعات اللي موجود فيها تخصصك. لان فيه جامعات عريقة لكن مرات تخصصك مش موجود فيها.
ادير قائمة طويلة بالجامعات اللي فيها تخصصك و تختار اقوي 30 جامعة فيهم من حيث السمعة و الترتيب.
بعدين اتشد هذوكا ال 30 جامعة اتفصفص تخصصك فيهم تفصفيص شن عندهم من ابحاث و اتشوف الدكاترة شن ابحاثهم و قداش المدة للتخرج و كيف الية القبول و كل شي. اهم حاجة اتركز علي ابحاث الدكاترة .
بعد ما تكون فصفصتهم و اطلعت علي كل كبيرة و صغيرة علي تخصصك في ال 30 ادير قائمة من 15 جامعة اتحس روحك ان عندك فرصة او امل للقبول فيهم و يوجد فيهم دكتور ابحاثه و اهتماماته العلمية نفس اهتماماتك و علي الاغلب ايكون هدفك كمشرف ليك ان شاء الله.
هذي الجامعات ال 15 هي اللي بتراسلها او علي الالقل عشرة منها . و اول جامعة منهم تقبلك برالها طول و ان شاء الله انشوفوك دكتور اد الدنيا.
من ال 15 لازم تختار جامعة انت عاجباتك و تمني النفس بالدراسة بها. هذي الجامعة اللي بتختارها علي رأس القائمة تمشي تقرا فيها فترة اللغة. لان دراستك اللغة في الجامعة يعطيك فرصة افضل قليلا (قليلا اي لا تعول عليها كثبرا) ااحصول علي قبول. الكثيرين دراسة اللغة في الجامعة كان بوابة العبور لهم للقبول في نفس الجامعة.
لان يا خوي العالم امعبي جامعات و بتقعد غر حايس هكي وخلاص. اني قتلك علي الطريقة هذي باش اتركز علي جامعات معينة و قليلة لاني مريت بالمرحلة هذي و استعملت التكنيك هذا و الحمد لله وفقني ربي.
الفارق الوحيد اني ما قريتش في معهد لغة . بديت في الاكاديمي طول لاني ما عنديش ايفاد. و بالتالي خياراتي كانت محدودة جدا لاني ما حصلتش دعم مادي (financial aid ) الا من جامعتين. اخترت وحدة منهم و مستورة و الحمد لله.
و اي سؤال خوي اتفضل اسأل لو نعرفوا انجاوبوا و لو ما نعرفوش ندعولك بالتوفيق.
راك تنسي ما تعبي علي حد و لازم تبذل جهد و وقت فراغك كله قضيه في مواقع الجامعات اللي فيها تخصصك.
تمنياتي بالتوفيق
