مبلغ المنحة كافي لشخص بزوجته وطفل واحد، صح قد يكون صعب شوي التدبير فيه، لكنه ممكن المهم يكون خارج لندن.
بالنسبة للبرد فصدقيني إنتم تسمعوا بالبرد سمع لين تجربوه، هي حتى أدنبره اللي في جنوب أستكلندا البرد فيها لا يطاق في الشتاء (هذا غير الريح القوية)
الحضانات ماعنديش عليهم خلفية بس بيكونن مكلفات شوي لو خارج الجامعة، مثلا جامعة غلاسكو تكلفة الحضانة فيها 500 باوند شهري (5ساعات يوميا) و250 باوند شهري (لساعتين ونص يوميا) - طبعا لخمسة أيام من الأسبوع - السعر هدا هو برأيي السعر اللي مفروض يتوقعوه من معظم المكانات الثانية، الفرق هو لو حصلت مكان في حضانة الجامعة قد يعطوك منحة تخفيض، واللي على مرتب الشخص اللي بينبعث هذا بتكون في حدود 1500 باوند سنوي.
http://www.gla.ac.uk/services/nursery/generalinformation/
المكانات في حضانات الجامعات غالبا ما تكون محدودة جدا، ولو عزم على جامعة معينة فلازم يحجز فيها من الأول عشان يكون عنده فرصة أنه يحصلوله مكان.
بالنسبة لموضوع الدراسة فأفضل شي أنه يشوف الدكاترة الموجودين في الأقسام اللي وضعتهم ويشوف بحوثهم هل تتفق مع اللي يبيه وإلا لا وعلى أساسه يتصل بيهم ويتفاهم معاهم على المشروع اللي هو يبي يديره (طبعا الآن ماعادش يقدر يقدم على التأشيرة إلا لو الموضوع معروف مسبقا)
بالنسبة للمواصلات والأكل والشرب والفواتير فياخدن مصروف أكيد لكن صعب التحديد، ويقدر يتحكم بيه بشكل كبير.
يعني من ناحية التكاليف، لو بياخد شقة دارين قريبة من الجامعة ففيه واحدات توا بحثت عليهم في حدود 550 -600 باوند (في مناطق يقدر يمشي منهم على رجليه للكلية بعدها حوالي كيلومتر)، مع الحضانة أقل شي 250 باوند وقولي أكل وشرب 300 باوند وفواتير 100-150 يلقى روحه قريب هو والحق سوا
غير نبصر، المنحة تسد، المهم الواحد يقتصد بس وما يديرش التبزعيق متاع ليبيا هنا، وللسكن يقدر يتفاهم مع مكتب السكن الخاص بالجامعة لأن كثير منها توفر سكن مخفض للطلاب (في حالة ماكانت شقة من شققهم فارغة)
