موعد السفارة

السلام عليكم ورحمة الله وبركاته :
أريد الإستفسار عن بعض المواضيع المتعلقة بموعد التأشيرة وهي :

دخلت اليوم على موقع السفارة الالمانية بطرابلس ودخلت عالمنظومة الالكترونية لتحديد موعد وفوجئت بأن أقرب موعد كان بعد 3 أشهر ونصف تقريبا ..... لاأعلم لماذا ولكن هذا الموعد بعيد جدا جدا جدا
والسؤال هل يمكنني تقديم الموعد لان جميع الاوراق المطلوبة جاهزة ؟
وأيضا هل يمكنني أن أذهب بمفردي للسفارة دون موعد واشرح لهم واحدد موعد عن طريقهم ؟؟

بالله عليكم الذي عنده معرفة او معلومة بالموضوع يفيدنا بها

نأمل منكم الاهتمام والرد ...... تحياتي للجميع

صح كلامك لان منظومة السفارة فيها عطل حتى انى كنت حاجزة موعد وحصلت موعد اقرب لغيت الاول وبنحجز التانى رفضت ولما نخش على المنظومة نلقى الموعد الاول قاعد محجوز مع انه انبعتتلى رسالة الالغاء على الايميل لما كلمتهم قالولى صح المنظومة عاطلة وفكولى رقم الجواز من الموعد الاول باش قدرت نحجز موعد تانى
معناها فيه هلبة مواعيد فاضية وتبان انها محجوزة
حاول تكلمهم تليفون وتشرحلهم وشوف شن يقولولك
اوكانك قريب امشى للسفارة مع انى كذا مرة نمشى اللى فى الباب ما يخليش من يخش الا بورقة الموعد لكن بالك انت ربى يفتهالك كان هذا امشى بعد الساعة 12 وقوله عندى استفسار
ونصيحة خش كل يوم على المنظومة اكثر من مرة لانه مرات نلقى فى مكانات فاضية لكن ينحجزو بسرعة
ان شاء الله بالتوفيق

يعني هل أستطيع أن أذهب لهم للسفارة وأشرح لهم الموقف لاني مكمل جميع الاوراق المطلوبة ولو بنقعد لمنتصف شهر 5 القبول امتاعي حينتهي ومش عارف كيف الصراحة احبطت لما وجدت هذا الموعد يعني مش ممكن هذا التعطيل تخيلو ياخذو في اليوم 4 مواعيد فقط .
كيف بندير مش عارف الصراحة ؟؟؟؟؟؟؟؟؟؟؟؟؟؟؟؟

امشيلهم واشرحلهم ان القبول يطيح لو تقعد تستنى ل3 شهور ان شاء ربى يفتحها عليك

هل فيه مكاتب توفر التاشيرة بمعرفتها ... لو فيه حد ايقوللنا او يراسلنا عالخاص

تحياتي

أنا حجزت موعد من السفارة ولقيت أقرب موعد متاح يوم نصف شهر 5 .
وأوراقي كلها جاهزة والموعد بعيد جدا جدا
لو فيه حد يقدر يساعدني ويعطيني موعد قريب يقولي لاني عرفت أنه قد يكون هناك من حجز موعد قبل ان يكمل بقية أوراقه فاذا عرف ان لايستطيع تقديم أوراقه قبل الموعد بالله يكلمني

وشكرا

ممكن فى حل اخر وهو انك تقدمي عالسفارة من تونس او مصر

كأنك مقيمه الان فى تونس او مصر.. وهذه ماشيه امورها فى سفاره امريكا وبريطانيا..،

اخى محمد السفارة الالمانية فى تونس اومصر غير مسموح التقديم فيهم اذا كانت السفارة فى ليبيا تشتغل انى كنت فى تونس وسالت على النقطة هذه

الحل ياما تمشيلهم وتشرحلهم ويقدرو وضعك والا تحصل حد عنده موعد قريب ومش واتى عادى ياخدوه منك عندى صديقة هكى دارت خدت موعد مش ليها ورفعاته معاها قبل الموعد غيروهولها باسمها وخداته وتوفقك وتوة طلعتلها حتى التاشيرة وهى حتى موعدها الاول مازال ماجاش ان شاء ربى يطيحك فى اولاد الحلال اللى يساعدوك لانى مقدرة مواقفك لانها كلها فاتت عليا بالتوفيق

أخي الكريم تاخذ نصيحتي

غير الساحة فوراً

أنا قدمت في التأشيرة من السنة الماضية بالتحديد في شهر 11
وإلى هذه اللحظة لم تأتي التأشيرة

لما تتصل بيهم إيقولولك تو نتصلوا بيك لم اتجي التأشيرة

لا حول ولا قوة إلا بالله

للصبر حدود

نفس البرنامج. قدمت عالتأشيرة من شهر نوفمبر. وإلى الآن ما فيه أي رد من السفارة. نسيت روحي حتى مقدم عالتأشيرة.

يا أخ الريشي

هل حجزت موعد والا لا ؟؟

butterfly كتب:

الحل ياما تمشيلهم وتشرحلهم ويقدرو وضعك والا تحصل حد عنده موعد قريب ومش واتى عادى ياخدوه منك عندى صديقة هكى دارت خدت موعد مش ليها ورفعاته معاها قبل الموعد غيروهولها باسمها وخداته وتوفقك وتوة طلعتلها حتى التاشيرة وهى حتى موعدها الاول مازال ماجاش ان شاء ربى يطيحك فى اولاد الحلال اللى يساعدوك لانى مقدرة مواقفك لانها كلها فاتت عليا بالتوفيق

أرجو التوضيح كيف تم تغير الاسم لورقة الموعد هل تم في نفس اليوم الموعد أو قبله .

وشكرا وبارك الله فيك

civilengineeribrahim كتب:

يا أخ الريشي

هل حجزت موعد والا لا ؟؟

أنت حجزت وقدمت من شهر 11 العام اللي فات ولحد الآن لم أتلقى الرد.

butterfly كتب:
الحل ياما تمشيلهم وتشرحلهم ويقدرو وضعك والا تحصل حد عنده موعد قريب ومش واتى عادى ياخدوه منك عندى صديقة هكى دارت خدت موعد مش ليها ورفعاته معاها قبل الموعد غيروهولها باسمها وخداته وتوفقك وتوة طلعتلها حتى التاشيرة وهى حتى موعدها الاول مازال ماجاش ان شاء ربى يطيحك فى اولاد الحلال اللى يساعدوك لانى مقدرة مواقفك لانها كلها فاتت عليا بالتوفيق


أرجو التوضيح كيف تم تغير الاسم لورقة الموعد هل تم في نفس اليوم الموعد أو قبله .

وشكرا وبارك الله فيك

غيرت الاسم قبل الموعد بيومين

butterfly كتب:

butterfly كتب:
الحل ياما تمشيلهم وتشرحلهم ويقدرو وضعك والا تحصل حد عنده موعد قريب ومش واتى عادى ياخدوه منك عندى صديقة هكى دارت خدت موعد مش ليها ورفعاته معاها قبل الموعد غيروهولها باسمها وخداته وتوفقك وتوة طلعتلها حتى التاشيرة وهى حتى موعدها الاول مازال ماجاش ان شاء ربى يطيحك فى اولاد الحلال اللى يساعدوك لانى مقدرة مواقفك لانها كلها فاتت عليا بالتوفيق


أرجو التوضيح كيف تم تغير الاسم لورقة الموعد هل تم في نفس اليوم الموعد أو قبله .

وشكرا وبارك الله فيك

غيرت الاسم قبل الموعد بيومين

شكرا على سرعة الرد, لا كن معليش كيف قدرتو اتغيروا الاسم
بارك الله فيك

هو مش انى اللى غيرت الاسم لكن حسب ما قالتلى انها خدت الورقة متاع الموعدوورقة الالغاء للشخص التانى ومشت بيهم للسفارة وقالتلهم ان هذا الشخص غير موعده والمنظومة ما بينتش انه الموعد التغى قالت ان قالولها نتاكدو لقوه صح ملغى خدت هى المكان

أخت butterfly: هل صديقتك قدمت على تأشيرة قصيرة أو طويلة الأمد؟ بصراحة هذا الشهر الرابع منذ قدمت عالتأشيرة. ولحد الآن لا يوجد رد من السفارة.

يا أخ الريشي ...
المنظومة لما تحجز فيها إنت تشوف الأيام الفاضية الغير محجوزة وتقوم بالحجز فيها وتختار التوقيت يعني مثلا من الساعة 8 إلى 8:30 وهكذا
الخلاصة إنك لما تحجز تبدا عارف موعد الحجز وتمشيلهم قبل الموعد بربع ساعة .
لو سمحت انت بالضبط متى حجزت موعدك ؟؟

الاخ Arreshy
انت في اي مدينة مقدم لان فيه مدن راهو التاشيرة تعطل فيهم وهده صارت في ال 209 و 2010 فيه ناس اكتر من تلات شهور ما طلعتش التاشيرة وهدا الاعلان

إعلان هام الى الطلبة الوافدين الى الساحة الالمانية
تفادياً لبعض المشاكل التي واجهت بعض الطلبة بعدم حصولهم على الفيزا الى المانيا بسبب قبولهم في معاهد جوته بالمدن وهي في دوسلدورف وبرلين وهامبورغ و بون ومانهايم، تم عقد عدة لقاءات مع المسؤولين بمعهد جوته وتم الاتفاق على ان المعاهد التي ممكن الحصول بها على قبول ومن خلالها على الفيزا الالمانية هي بالمدن التالية:
Bremen بريمن
Dresden دريسدن
Freiburg فرايبورغ
Göttingen غوتنغن
München مونشن
Schwäbisch Hall شفيبش هال

انا الحق ماعنديش خلفية كبيرة بس هالموقف صار لصديق لي زمان وحبيت نحطلكم الاعلان فلت ممكن تكون هي مشكلتكم

يا أخ ابراهيم شكلك ما فهمتنيش. أنا حجزت وقدمت ونستنى في التأشيرة توا. ليها الدوة اربعة شهور توا ما فيش رد من السفارة. يقولولك وسع بالك وخلاص.

krems28
مظبوط كلامك. أنا مقدم على بريمين. ويستر الله. تبي الحق طارت منها النية بجديات.

شنو رايكم ياجماعة انحددوا موعد فيما بينا
وانديروا إعتصام كبير قدام السفارة الألمانية
إما يعطونا تأشيراتنا وإما معادش نبوا سفارة ألمانية في ليبيا
لإنهم عطلونا عن قرايتنا وخلونا كيف الأطرش في الزفة

ونهاركم أحرف كان بتغيروا الساحة ... معادش اتحز بكل ؟!!!

ها شنو رايكم ؟؟؟؟؟

يا أخ الريشي ... بعد التحية لك ولجميع المشاركين في الحوار البناء وان شاء تفرج عن قريب .
- معليش لو تذكرنا بالاوراق التي طلبوها منك في المقابلة وشنو تخصصك . لان موعد مقابلتي قريب وما نبي ننسى شيء .. وبارك الله فيك .

مشكلة حتى انا نعانى منها