التاشيرة الانجليزية من تونس

ارجو المساعدة اللى يعرف مكان اندير فيه امتحا الايلتس فى ليبيا والفترة هادى يخدم يعنى ايديرو فى الامتحان محتاجة للمعلومة ضرورى ياريت يقولى ويربح فيا الاجر

في طرابلس في المجلس الثقافي البريطاني في السياحية
وبنغازي في مركز مهارات اللغة
والتسجيل في الامتحانات مستمر و في امتحان يوم 25-5

بنقدم على تاشيرة طالب زائر لدراسة اللغة اقل من سنة
بس جوازى يطيح 7/2013 وصورتى فى الجواز متغير هلبا هو طايح من 2010 لكن فى الاحدات درتله تجديد ختم 2013
افيدونا بارك الله فيكم

بارك الله فيك اختى noura انا سألت وقالولى اول امتحان جنرال تراينينق يوم 28 .4 ان شاءالله وتوا بنحاول نبعت خوى يحجزلى لان موجودة خارج ليبيا وبنروح قريبا عشان نديره وبنخلى خوى يحجزلى على بكرى ليوم 28 .4 ان شاءالله ادعولى وبارك الله فيكم نبى نسال بعد ماتحصل التاشيرة ووتحطها فى الملف متاع البعتات وتقدمه قداش يبى عشان يطلعولك التفويض المالى تقريبا؟؟ وشكرااا

السلام عليكم
اخي محمد الاصيبعي كيف نعبي ابليكيشن لمرافق الاخ نقصد البيانات

قتلك كيف في الموضوع الي فتحتيه بالخصوص

اخ محمد لاصيبعي بعثتلك رسالة عالخاص ارجو اجابتي بسرعة اذا امكن

تم الرد اختي khadooj mohammed

تمت الاجابة

السلام عليكم
من فضلكم هل مازال مسموح التقديم للفيزا من تونس من لديه المعلومة يفيدنا
مع الشكر

السلام عليكم

اختى انا مزال موعد الفيزا متاعى بس صديقتى الاسبوع الفايت كانت بتونس دارت مقابله

وللاسف رفضوها..

ان شاء الله حظك افضل..

نقصد مازال يقدموا ويقبلوا في الاوراق من الليبيين مش كيف ماتردد انها اغلقت
شنوعها الفيزا اللي قدمت عليها صديقتك اذا ممكن
مع الشكر

لا مزال عادى يستقبلوا ... لانها من فتره بسيطه كانت غادى,,, فيزتها هى وزوجها كانت طالب زائر والصغار سياحيه ..


قالت حسيتهم يتسبلوا على الرفض لابسط سبب..

اما عذرهم برفضها فكان لان اطفالها كانت اعمارهم مابين 4 الى 8 فقالولها هذا عمر قرايه وهما واخذتيهم بسياحيه فكيف بيضيعوا قرايتهم؟؟؟ حسيته الحق عذر بايخ ...معتقدش هما اول وحدين سافروا بصغارهم؟؟؟؟

عموما دارت التأشيره بطرابلس وقالوها انه احتمال كبير يرفضوها .. ويستر الله وخلاص

انا ماكانش ببالى ابدا قصه رفض الفيزا ... كنت مطمنه الحق من هالناحيه ونفكر فقط بالصغار وبوهم ...

الكلام مش احباط ليكم ولا ليا ... بس مجرد نتناقشوا فيه ونفهموا... وربي كريم ان شاء الله يسهل لكل واحد

om_tomy كتب:

لا مزال عادى يستقبلوا ... لانها من فتره بسيطه كانت غادى,,, فيزتها هى وزوجها كانت طالب زائر والصغار سياحيه ..


قالت حسيتهم يتسبلوا على الرفض لابسط سبب..

اما عذرهم برفضها فكان لان اطفالها كانت اعمارهم مابين 4 الى 8 فقالولها هذا عمر قرايه وهما واخذتيهم بسياحيه فكيف بيضيعوا قرايتهم؟؟؟ حسيته الحق عذر بايخ ...معتقدش هما اول وحدين سافروا بصغارهم؟؟؟؟

عموما دارت التأشيره بطرابلس وقالوها انه احتمال كبير يرفضوها .. ويستر الله وخلاص

انا ماكانش ببالى ابدا قصه رفض الفيزا ... كنت مطمنه الحق من هالناحيه ونفكر فقط بالصغار وبوهم ...

الكلام مش احباط ليكم ولا ليا ... بس مجرد نتناقشوا فيه ونفهموا... وربي كريم ان شاء الله يسهل لكل واحد

هذا ما يقال عنه "عذر اقبح من ذنب"

السلام عليكم
اختى حنان الفيزا امتاع اما دولة ؟
بالنسبة للفيزا الامريكية كان موعدي للفيزا ا يوم 3/5/2012 ودرنا المقابلة وتحصلت عليها اني و زوجي في تاني يوم اهم حاجة تكون اواقك امترجمة وكاملة وعقد الزواج مصدق عليه من المحكمة ومختوم من الخارجية وكذلك رسالة الدعم من المكتب الكندي و السيفس والاي تونتي ليك وللمرافق والصور الشخصية وكشف الدرجات

اوكي اختي حنان انتي ماشية لبريطانيا اني سمعت انهم سكروها من تونس لانه السفارة في ليبيا فتحت اتاكدي قبل ماتمشي خير من تتشحوري على الفاضي خوشي علة موقع السفارة وخودي رقمهم واتصلي استفسري واتصلي حتى بالسفارة اللي في ليبيا واستفسري منهم هل يعطوا فيها من تونس
وربي ايوفقك وهو كل شي في هالبلاد بحرق الدم مافيش حاجة اتجي بالساهل ربي ايعاونا

تبي الحق يا اخت ام تومي عندهم الحق يرفضوها كيف صغار اتضيع قرايتهم الواحد مفروض ماشي على صح هما كل شي بالنظام مش زينا احني كل شي بالبركة والواسطة وربي ايوفقك واللي اوراقه على صح وكاملة مايرفضوه اتوكلي على ربي وانشاء الله اتحصليها

شكرا اخواتي وربي يفتح عليكن
خشيت على موقع السفارة ولكن مافيش شيء بالخصوص
لذلك سألت ممكن حد يكون قدم في تونس قريب

السلام عليكم.,,

عزيزتى حنان اتكلى على الله وان شاء الله مافيه الا كل خير... بالنسبه لصديقتى اتصلت بطرابلس قالتلهم عادى ناخذها من تونس قالولها عادى فمشت ,,,

اعتقد والله اعلم ان العملية بدت بزنيس دير انترفيو ب 500 دينار ونرفضك .. باش ترد مره ثانية ادير انترفيو ثانية وهات حساب ياالوفات من غير ماتندرى .... نحس بيه رفض لمجرد الرفض والاستفادة المادية ...

اختى حوحو : باهى نحنا عارفينهم دول منظمه وامورهم مريقلة على قولة خوتنا التوانسة بس ليش هالاعذار طلعت الايامات هضوما بس؟؟؟ يعنى الناس اللى فاتوا ومشوا ماكانش فيهم حد يصغاره فى عمر القرايه؟؟؟؟؟؟؟ مستحيل ...

ليش الاعذار بدت تطلع توا,,, ليش كثرة التدقيق ,, متقوليليش عشان نحنا الليبيين بدينا نمشوا واجد ,.,, معتقدش اكثر من الباكستانيين وشعوب شرق آسيا اللى قريب يسيطروا على المملكة .,,

والله بالنهايه الواحد مايبي يحرق اعصابه اكثر ... بالنصيب ونحنا متكلين على الله وهو حسبنا وكافينا,,,, بردى اعصابك اختى حنان ,.,,,

هيا سلامات

اين دور خارجيتنا وسفارتنا
مما يحصل مع الطلبة المقدمين على الفيزا لبريطانيا
نحن الطلبة الليبيين لنا ثقل في الساحة البريطانية لايستهان به
كيف يستمرون بهذا الصمت حيال الرفض العشوائي والمتكرر والمتزايد لطلبة اللذين يريدون الدراسة في بريطانيا ولاتفه الاسباب مع اعطاء الفيزا بين الحين والاخر فقط لدلالة على ان هناك تقديم ومن ثم هناك منح للفيزا والخاسرون اكثر من الرابحون وهذه سياسة الانجليز
ماالمطلوب
مع الشكر

السلام عليكم
اختي اللي تسأل على التأشيرة من تونس،نقولك عادي قاعدين يقبلو من الليبيين وان موعدي اني وصديقتي كان يوم الثلاثاء 5/8 ومشيت قدمت اوراقي وقالولي ارجعي يوم الثلاثاء الساعة 2والحمد لله مشيت على الموعد وتحصلت على التأشيرة من تونس اليوم 5/15 والامور تمام.....

يعني التأشيرة قعدت اسبوع وطلعت