شهادة اتمام المرحلة الثانوية

زملائي اريد الاستفسار عن قصة الشهادة الثانوية .مع الحصول على التاشيرة الالمانية..اولا هل هدا مطلوب لدراسة الماجستير او فقط للدراسة الجامعية؟؟ ثانيا ادا كانت مطلوبة ,شن قصة الختم الحراري الاحمر من وزارة التعليم؟؟ وهل بالامكان ترجمة النسخة البيضاء والكحلة وختمها ؟؟والا ضروري تكون النسخة اصلية لان ما لقيتش معاي الا النسخة العادية..وسامحوني لو تعبتكم معاي..الرجاء لمن له تجربة واضحة عن قصة الشهادة الثانوية سردها وشكرا

sfruja كتب:

زملائي اريد الاستفسار عن قصة الشهادة الثانوية .مع الحصول على التاشيرة الالمانية..اولا هل هدا مطلوب لدراسة الماجستير او فقط للدراسة الجامعية؟؟ ثانيا ادا كانت مطلوبة ,شن قصة الختم الحراري الاحمر من وزارة التعليم؟؟ وهل بالامكان ترجمة النسخة البيضاء والكحلة وختمها ؟؟والا ضروري تكون النسخة اصلية لان ما لقيتش معاي الا النسخة العادية..وسامحوني لو تعبتكم معاي..الرجاء لمن له تجربة واضحة عن قصة الشهادة الثانوية سردها وشكرا

السلام عليكم

بالنسبة للشهادة الثانوية ايه ضروري منها مع الجامعية حتى ولو مبتعثة لدرجة الماجستير و هذه احد المستندات المطلوبة للتقديم على التأشيرة و كاتبين بالحرف الواحد (ترجمة المانية مصدقة لشهادة اتمام المرحلة الثانوية عدد (2) مع الجامعية ان وجدت ) يعني ضروري من الثانوية لتحضير البكالوريوس او الماجستير او الدكتوراة

بالنسبة للسفارة حتطلب منك نسخة يعني الترجمة فقط
بس بالنسبة ليا اني خديت معاي الاصل و الموظفة اخدتها مني (الاصلية) اطلعت علاها و رجعتهالي و ضروري تكون مصدقة من الجودة و الخارجية و مكتب الامتحانات و شؤون التربية و التعليم و ضروري تكون الاصلية يعني ما يعتمدوش اي نسخة غير الاصلية.

و بالنسبة للختم الحراري و الله مانتفكرش يا اختي لأن لاها فترة و الاوراق هلبا و الاختام هلبا و نسيت بصراحة سامحيني و الشهادة توا في البعثات ع خاطر التفوبض كان هذا شفتهالك

ان شاء الله نكون افدتك و حنتأكدلك من الختم عن قريب بس قوليلي امتى موعد السفارة امتاعك

و تحياتي



ان شاء الله نكون افدتك

بارك الله فيك اختي العزيزة

تحيه طيبة
بالنسبه للختم الحرارى هكى إيسموا فية سابقا والله اعلم ادا تغيرت التسمية الان عباره عن مستطيل أحمر مكتوب فية روجعت من قبل قسم الوثائق بالإدارة ووجدت صحيحة ومطابقة وفيه اسم كاتب البيانات وتوقيعة وتوقيع قسم الوثائق...
طبعا أى إدارة الله أعلم لأنى صدقا ناسية ومدايرتها من قبل سنوات ونتفكر ان الختم هذا كان فى طرابلس ياريت تراجعى التقويم والقياس وتستفسرى عنة اكثر لانهم يعرفوة اكيد...
تحياتى

السلام عليكم

قصتي مع الشهادة الثانوية كالاتي :

ذهبت لمكتب التقويم والقياس بالمنطقة التي درست بها الثانوية وطلبت منهم إفادة وكشف درجات للشهادة الثانوية طبعا هم يسموا فيها للدراسة بالخارج وقام الموظف بكتابة الدرجات ومراجعتها وثم احيلت للموظف الثاني الذي قام بمراجعتها للتاكد ثم ذهبت لمديرهم الذي قام بالتوقيع عليها ثم وضعها في ظرف وسكر الظرف كويس وختم عليه من برة وقالي برا لطرابلس الى الادراة والامتحانات يعتمدوه لك "" مركزية طبعا "" وطبعا بعثتها لطرابلس وختموها لي من الخلف تقريبا بختم أحمر مش حراري مكتوب فيه ( روجعت من قبل قسم الوثائق بالإدارة ووجدت صحيحة ومطابقة ) ثم بعثتها لمركز ضمان الجودة واعتمدوها وبعدين قمت بترجمتها وثم التصديق على الترجمة من الخبرة القضائية ثم تذهب للخارجية للإعتماد .

وهذه الدورة كلها علشان الشهادة الثانوية اللي مش عارف شن يبو فيها مادام الطالب عنده شهادة بكالوريوس أو ماجستير ؟؟؟؟؟

السلام عليكم
العبد لله درت الختم الاحمر في وزارة التعليم علي النسخه الاصليه قالولي منديروش فيها في النسخه العاديه وختم الجوده في الفرناج توا لاكن وتقريبا حسب ما سمعت انه وزارة الخارجيه متختمش علي شهادتك لما بتقرا برا لين تختم ختمت الجوده والله أعلم
وفـــــــــــــــقكم الله جميعا
وعليكم السلام ورحمة من الله وبركاته

ايه لازم منه ختم الجودة قبل الخارجية ومكتب ضبط الجودة في الفرناج وياخد الاجراء يومين والافادة با 5 دينار وكشف الدرجات بخمسة دينار
ومكان ضبط الجودة بالضبط جامعة طرابلس القاطع ب (ناصر سابقا) علي يمينك وتمشي شوية تلقى على اليسار مبنى لونه بيج واحمر قدامه زحمة سيارات هو هذا مكان ضبط الجودة وبالتوفيق للجميع

ملاحطة:
اللي افادته وكشف درجاته مش مختومات بالاختام الجديدة امتاع جامعة طرابلس يختمها قبل مايمشي لضبط الجودة لانه مرة قدامي ردوا واحد جاي من بعيد ودار معاهم عركة

مركز ضبط الجودة متع بن عاشور حولوه للفرناج؟؟؟

نعم مركز ضبط الجودة حولوه للفرناج

بالله لو سمحتم الواحد شن يدير الان تحصلت علي الشهادة وكشف الدرجات الثانوية .. الآن وين نمشي  وين يصدقو عليها ووين هتم الجودة ؟