يعني رسالة انكليزية وعليها ختم بالعربي....فهل هذا يشكل مشكلة ممكن؟
ليست مشكلة أخت عواطف على الإطلاق ، طالما الرسالة مطبوعة على ورق رسمي متع جامعتكم وموقعة من الشخص المخول ، فهي رسمية وتمشي إن شاء الله ،،، وهي عن تجربة شخصية لي ولبعض الزملاء !!!
بس يا ريت يوضحوا في الرسالة نفسها ان الجامعة أو الكلية حتعطيك إجازة خلال مدة الدراسة كلها !!!
لو ان الاوراق التي تم ترجمتها ترجمة قانونية لغرض التأشيرة....مش حنحتاجة في غرض اخر....ممكن نسلمهم لسفارة زي مهن....افضل من اني نسلم الصورة ؟
نعم ،،، مهم جداً أنك تسلمي النسخ الأصلية للأوراق المترجمة ، وأنتي ضروري ترفقي معاهم صور لما تقدميهم ، بعدين هما المستندات اللي يبوها ياخذوا صورتها ويرجعولك الأصل ، زي كشف الدرجات وإفادة التخرج ،،، وفي بعض المستندات هما يحتفظوا بالأصل زي الرسالة اللي قلتي عليها متع الجامعو وشهادة الميلاد والمرتب و .... !!!
رسالة الدعم المالي لغرض التأشيرة يفضل نسلم الاصل او الصورة؟؟
لو قدمتي رسالة الدعم المالي الصورة تأكدي من أنه سيتم رفض تأشيرتك ،، لأن الصورة مش حيطلع فيها الختم الحراري ، وهما مركزين عليه هلبة في هذه الرسالة ،،، وبعدين الأصل شن بتديري بيها حتى ما تقدميهاش للسفارة ، فهي لن تنفعك إلا لهذا الغرض ،،،
عليه قدمي الأصل من دون أي تردد !!!
بالتوفيق !!!
