إختبار التوفل والإيلتس جامعة جامعة سوينبرن

السلام عليكم:
إخوتي الأعزاء ،أنا طالبة دكتوراة في الإحصاء وتحصلت على مشرف في جامعة سوينبرن ولكن قيل لي إن الجامعة تشترط درجة 6.5 كحد أدنى لطلبة الدكتوراة في إختبار الإيلتس، فهل كل الجامعات الأسترالية تتبع نفس النظام (أي تشترط الإيلتس) ومالفرق بين إختبار الإيلتس والتوفل وأيهما أسهل.

السلام عليكى أختى الكريمة:

بالنسبة للجامعات الاسترالية فالاصل انهم معتمدين اختبار الايلتس زيهم زي بريطانيا ونيوزيلندا لكن التوفل لكندا وامريكاولكن تسهيلا على الطلبة الدوليين أصبحوا يقبلوا في التوفل كمعيار لتحديد اللغة يعنى ما تحتاري اللي تقدرى عليه ديريه سواء الايلتس أو التوفل.
أما بالنسبة للفرق بينهم هذا فيه اشوية تفصيل والاختلاف في الاراء موجود فالبعض يفضل الايلتس والبعض الاخر يحبذ التوفل وأنا أنقولك ليش اختلفوا في الاراء لان كل اختبار يناسب فئة معينة من الناس مثلا:
في جزء speaking في التوفل مافيش لقاء مباشر بينك وبين الممتحن بل أنتى والكمبيوتر فتجيبين عن أسئلة في الميكروفون والكمبيوتر يعطيك الدرجة وهذى تنفع مع ناس وناس لا,,,أما في الايلتس فهناك لقاء خاص بينك وبين الممتحن وهنا يبى شخصية واثقة مسترخية وطبعا مش كل الناس هكى.
ومن ناحية يعتمد علي تأسيسك يعنى إذا أنتى واخذه عاللهجة البريطانية فالايلتس أحسن لك ,وإذا كنت واخذة عاللهجة الامريكية فالتوفل أحسن لك.
كذلك في الايلتس ايركزوا عل القواعد والمفرادات واجد لكن في التوفل ايركزوا علي قدرتك في صياغة الكلام..
في التوفل في اسئلةMSQ بشكل مسيطر يعني اقريب الامتحان كله نفس نمط السؤال وهذا قد يروق لفئة ولا يروق لأخرى..
أما الايلتس فتتعدد أنماط الاسئلة وزى ماقلتلك مرات تنفع مع ناس وناس ماتنفعش معاهم.
لكن من جهة نظرى الشخصية يا أختى واتمنى أنك تضعيها في اعتبارك أن الاختبارين يحومن علي شى واحد هو أنك تقدرى تواصلي باللغة الانجليزية أو لا وهذا ساهل لو ركزت جهدك في تعلمها يعنى ماتخلي كلمة الا وترجميها وماتحفظى الكلمات بشكل فردي لكن أحفظيهن في جملة بيش ما تنيسهن وننصحك بموقع الاذاعة البريطانية البي بي س وفي النهاية كل شى يعتمد عليك انتى وكيف تقري وماتعتمدى علي كورسات تاخذيهن من هنا وهناك بإذن الله بعدين تقدري تطلعي من الزوز
اعذرينى عالعامية لكن احسن في توصيل المعلومة
ويبقى كلامى مجرد راي فلا تعولي عليه كثيرا.