اخيرا تحصلت علي التأشيرة الانجليزية

السلام عليكم

الحمد لله تحصلت علي الفيزا الانكليزية تاير4 يوم الخميس الماضي بعد الانتظار لمدة 16 اليوم وتحصلت علي تأشيرة سايح لزوجتي و اطفالي لان مدة كورس اللغة اقل من 6 اشهر وان شاء الله ربي يسهل في باقي الاجراءات .

واليوم رفعت ملفي لادارة البغعثات باش نبدا في اجراءات التفويض المالي وخذوا مني الملف , لكن فيه شي خايف منه لان الكورس متاعي يبدأ في 10 -1-2013 اي مازال شهر بالزبط , والشخص اللي استلم مني الملف قال حياخذ اكثر من شهر و ننصحك تأجل الكورس , فياريت حد من الاخوة اللي تم اجراءات التفويض والخزانة يقوللنا قداش خدي منهم اجراء التفويض وهل الكلام مزبزط اني مش حنلحق وشن الحل ,لاني لو اجلت الكورس الجاي في 28 -4 2013 وتقريبا لازم نقدم علي تأشيرة جديدة

الرجاء افيدونا

ألف مبروك ..وتمنياتنا باقامة سعيدة في الخارج...

الله يبارك فيكم

مبارك التأشيرة أخي علي وعقبال كل من هو قادم على التقديم لها ،،،

بالنسبة لكورس اللغة متعك ، ليش تأجل لعند 4/28 ؟

أعتقد أن كورسات اللغة تقدر تأجل وتختار التاريخ اللي تبيه أنت ،،،

المهم أنت راسل المعهد اللي خذيت منه القبول واحكي لهم على الظروف وقوللهم ما نلحقش نقرأ في الموعد الحالي ، وأنك حتراسلهم فور استكمال إجراءاتك في البعثات باش يبعثولك قبول جديد ،،، أقصد لو حددت معاهم موعد جديد من الآن لربما حتى هو ما تلحقش عليه ، وبعدين تقعد تراسل فيهم وتأجل من جديد !!

وهذه تجربة شخصية معي ،،، أجلت الكورس متعي 3 أشهر ،،، لكن ما طلبتش القبول الجديد من معهد اللغة إلا بعد ما كملت جميع إجراءاتي وخذيت تفويضي وحددت موعد السفر ، وعلى ضوء ذلك حددت موعد بداية الكورس ،،، ومشت الأمور ولله الحمد !!!

بالتوفيق لك وللجميع إن شاء الله !!!

الف مبروووط اخوي وان شاء الله تتيسر الامور في كل الاجراءات الباقية

المتوكل على الله كتب:

مبارك التأشيرة أخي علي وعقبال كل من هو قادم على التقديم لها ،،،

بالنسبة لكورس اللغة متعك ، ليش تأجل لعند 4/28 ؟

أعتقد أن كورسات اللغة تقدر تأجل وتختار التاريخ اللي تبيه أنت ،،،

المهم أنت راسل المعهد اللي خذيت منه القبول واحكي لهم على الظروف وقوللهم ما نلحقش نقرأ في الموعد الحالي ، وأنك حتراسلهم فور استكمال إجراءاتك في البعثات باش يبعثولك قبول جديد ،،، أقصد لو حددت معاهم موعد جديد من الآن لربما حتى هو ما تلحقش عليه ، وبعدين تقعد تراسل فيهم وتأجل من جديد !!

وهذه تجربة شخصية معي ،،، أجلت الكورس متعي 3 أشهر ،،، لكن ما طلبتش القبول الجديد من معهد اللغة إلا بعد ما كملت جميع إجراءاتي وخذيت تفويضي وحددت موعد السفر ، وعلى ضوء ذلك حددت موعد بداية الكورس ،،، ومشت الأمور ولله الحمد !!!

بالتوفيق لك وللجميع إن شاء الله !!!

اخى المتوكل بالله وضحلى اكتر انت الكورس متاعك لغة عام او لغة اكاديمى ... لانى حتى انى احتمال تواجهنى نفس المشكلة ولو بنقدم بالكاس نمبر يلى عندى توا احتمال كبير مانلحقش لان التفويض ياخد وقت هلبا ... ولو بناجل بيعطونى كاس نمبر جديد وتاشيرة بتلتغى .... معاش عرفت نقدم او لا ,,, يعنى لو قدمت بالكاس نمبر يلى عندى واجلت موعد كورس اللغة مش راح تكون فيه اشكالية بالنسبة الى التاشيرة او لا

السلام عليكم
مبروك عليك التاشيرة ,اعتقد ان كورسات اللغة بمعاهد اللغة تبدا كل بداية اسبوع اي كل يوم الاثنين ويمكنك دخول الي موقع المعهد وللتاكد بس لازم انك تخاطب المعهد في حالة انك لن تكون قادر علي ملاحقة الكورس لان عند وصولك الي مطارات بريطانيا بيسالك عن التاخيرك هل انت مخاطب المعهد بهدا التاخير

نعم أختي سوما ،،،

بالنسبة ليا آني أخذت الكاس نمبر من شهر 8 الماضي وكان فيه موعد الدراسة تقريباً يوم 8/10/2012 ، وقدمت بهذا القبول على التأشيرة يوم 13/8/2012 ، وتحصلت على التأشيرة تاير 4 بداية من 8/9/2012 ، لكن لظروفي الخاصة ولبطء إجراءات التفويض ما تمكنتش من أني نسافر بعد صدور التفويض مباشرة (تفويض 15) ، لذلك راسلت معهد اللغة وحكيت لهم على ظروف الإجراءات المعقدة وقلتلهم أول ما نكمل إجراءاتي ونحدد موعد الصفر نتصل بكم لتحديد الموعد الجديد لبداية الكورس ،،،

وبالفعل ،،، أول ما تسهلت الأمور ولله الحمد ودرت ترتيباتي كلها اتصلت بهم (وكان ذلك قبل أسبوعين) , وطلبت منهم تجديد القبول بموعد الدراسة الجديد اللي طلبته منهم ، وستكون بداية دراستي بمشيئة الله يوم 7/1/2013 .

بالنسبة للكورس متعي هو ( Combination ( General + IELTS Preparation

أخت سوما ،،، الكاس نمبر متعك أمتى فيه موعد الدراسة تبدأ وتنتهي ،،،

فإذا كات موعد دراستك مازال شوية تقدري تقدمي على التأشير تاير 4 وما فيش مشكلة ، لأنهم حيعطوك أكثر من سنة إن شاء الله ،،، وبالنسبة لموعد بداية الكورس تقدري تنسقيه مع المعهد ،،،

موفقة اختي الكريمة !!!

اخى المتوكل انى موعد دراستى 2/11 وينتهى 9/13
General English مدته شهر ونص وبعدين
والكورس English for postgraduate studies pre-sessional
ومش عارفة نقدر نمشى فى الموعد او لا وانى الى الان لم اقدم على التاشيرة
فهل نقدم بالكاس نمبر متاع القبول هدا او ناجل ونريح راسى وخلاص

السلام عليكم
اولا الله يبارك فيكم وان شاء الله عقبال الاخوة اللي مازال ماتحصلوش علي التاشيرة

اخي المتوكل علي الله
انا مقدم علي كورس لغة (pre sessional ,academic) في مركز اللغة اللي يتبع جامعة نوتنجهام (سيلي) وهم عندهم كورسات اللغة كل 10 اسابيع وانا تحصلت علي 20 اسبوع لاني تحصلت علي 6 في الايلتس وناوي ان شاء الله نكمل الماستر في نفس الجامعة .
لكن نبي نسألك انت لما اجلت كورس اللغة وتحصلت علي كاس نمبر جديد هل قدمت علي الفيزا من جديد او بلغت الهوم افس بتغير موعد الكورس او كيف الاجراءات اللي درته بالتحديد.
وسؤالي الثاني: كم اخد منك التفويض المالي من تاريخ وصوله للبعثات الي اصدار البرقية من الخزانة

السلام عليكم جميعاً ،،،

أختنا سوما ... بما أن موعد دراستك تبدأ يوم 22 فبراير فهذه الأيام تعتبر أنسب وقت للتقديم على التأشيرة ، لأنك لو قدمتي قبل ذلك مش حيقبلوا منك أو ربما يرفضوك ، لأن السفارة البريطانية شارطين أنك ما تقدمش على التأشيرة قبل موعد الكورس متعك بأكثر من 60 يوم ، وبما أن بكرة يبقى على موعد دراستك 60 يوم ،،، عليه أنتي بعد يومين من اليوم وطالع تقدري تقدمي في أي يوم على التأشيرة ،،، معناها تعتبر ما عندكش مشكلة لحد الآن .

ولا أنصحك بالتأجيل علشان الإجراءات والتعطيل ، لأن هذا الشئ مش بيدي ولا بيدك ، معناها حتى لو أجلتي من يضمن بعد التأجيل أن إجراءاتك لا تتأخر ...

بالنسبة للكاس نمبر الموجود معك حالياً تقدري تقدمي بيه ،،، وبعد ما تحصلي التأشيرة والتفويض إن شاء الله و عرفتي روحك ما تلحقيش على الكورس ،،، ما فيش مشكلة ، فقط راسلي المعهد اللي أعطاك الكاس نمبر وقوليلهم أن ظروف تأخير الإجراءات منعتك من الالتحاق بالكورس في موعده ، واطلبي منهم تأجيل موعد بداية الكورس ، ونصيحة ما تعطيهمش الموعد الجديد لبداية الكورس إلا لما تكملي جميع إجراءاتك وتقرري موعد السفر حتى لو لم تحجزي، وذلك لتفادي التأجيل المتكرر .،، والمعهد إن شاء الله يبعثولك قبول جديد فيه موعد بداية ونهاية الكورس وفيه نفس الكاس نمبر الأول ... طبعاً هذا الشئ حدث معي شخصيا ، وبإذن الله مسافر في نهاية هذا الشهر ...

هذا الرد حسب فهمي لوضعك ،،،

بالتوفيق لك وللجميع إن شاء الله !!!

بارك الله فيك جزاك الله كل خير اخى المتوكل ..... وربي يفتحها قدامك وتوصل بالسلامة

وفيكِ بارك الله أختي الكريمة ،،، وجزى الله الجميع كل خير !!!

موفقة إن شاء الله !!!

السلام عليكم أخي عبدالحميد ،،،

بالنسبة لوضعك ،،، بعض تساؤلاتك تجد لها إجابة في الرد السابق على سؤال الأخت سومة ، وهو ما يتعلق بالكاس نمبر ،،،

بالنسبة لي لما أجلت الكورس حينها كنت واخذ التأشيرة ولم أقدم على كاس نمبر جديد ، يعني حصلت الكاس نمبر وخذيت بيه التأشيرة لكن أجلت موعد الكورس فقط ، وسأستعمل نفس الكاس نمبر للدخول إلى بريطانيا إن شاء الله ولكن بمواعيد دراسية جديدة ، لأن هذا الرقم هو اللي مسجل عندهم في المنافذ وتحته جميع البيانات المتعلقة بي !!!

لا علاقة للهوم أوفيس مادام مازال ما سافرتش حتى كان عندك التأشيرة ،،، ولما بتسافر تحتاج أنك تمشي لمركز الشرطة لما توصل بريطانيا خلال أسبوع من يوم وصولك هناك وتسجل عندهم !!!

بالنسبة للفترة الزمنية ما بين وصول ملف التفويض للبعثات وبين استلام برقية الخزانة تختلف حسب موعد وصول الملف من حيث قربه أو بعده على وقت إعداد قائمة التفويض التي تعد في البعثات ،،، فليس هناك زمن محدد بالضبط ،،، ولمن ربما من أسبوعين إلى شهر في المتوسط حتى يصدر التفويض ،،، وبعدين يتحول من البعثات للوزارة ، وهذا عادة ما يعطلش هلبة ،،، وبعد ما يوصل الوزارة في الغالب يحدث تأخير هناك بعض الشئ ممكن أسبوعين وربما أكثر (كما حصل مع إخواننا وأخواتنا موفدي تفويض 17) ، لكن بمجرد وصوله الخزانة ممكن ثاني أو ثالث يوم تستلم برقيتك ،،،

موفق إن شاء الله !!!


عدل سابقا من قبل المتوكل على الله في الإثنين 10 ديسمبر 2012, 11:19 pm عدل 1 مرات

شكراً أخي أبو محمد على التصيحيح ، وعذراً من أخينا السائل على هذا التداخل في المسميات (بدون قصد) ،،، هذا صحيح مركز الشرطة هم من ستذهب لهم خلال أسبوع من دخولك بريطانيا (وهذا ما سأفعله بعد أيام قليلة إن شاء الله لما بنسافر) ... والهوم أوفيس مادام ما سافرتش ما عندكش علاقة بيهم ،،،

أعتذر مرة أخرىى وسأعدل في مساهمتي حول هذه النقطة ،،،

السلام عليكم اخوانى واخواتى ...
اليوم وبفضل من الله سبحانه وتعالى تحصلت على التاشيرة البريطانية نوع STUDENT VISITOR 11 شهر تبدا من يوم 1.1.2013 واى واحد يبى اى استفسار بخصوص الاوراق او اى شى انى جاهز ....والعقبة عندكم انشاء الله ....

ألف مبروك اخي الكريم ،،، وعقبال جميع الموفدين المقدمين على التقديم للتأشيرة البريطانية وغيرها !!!

موفق في بقية إجراءاتك إن شاء الله !!!

انا قدمت على الفيزا يوم 22-11 وتحصلت عليها يوم5-12 وقدمت ملف التفويض للأستاذ على دخيل وانا الأن فى انتظار اصدار التفويض وباقية الأجراءات..اى حد عنده اى أستفسار انا فى الخدمه وشكراً جزيلاً لجميع اعضاء المنتدى الأعزاء

ألف ألف مبارك و عقبال فرحتك بالتفويض و السفر إلى بريطانيا..