المستندات التي يجب ان تكون في حوزتنا عند الدخول لامريكا.- شهاداتك الدراسية و كشوف الدرجات بالترجمة و حاول تكثر منهم، بعض الجامعات يبوا شهائد أصلية و يبوهم مسكرات و مختومات في ظرف مغلق. في إعتقادي أن الجامعات لا تطلب ختم الخارجية، يعني المهم عندهم هو ختم الجامعة. بعض الجامعات الأخرى تقدر تبعث صورة أو صورة مطابقة للأصل.
- رسائل توصية في أظرف مغلقة و موقعة من الدكتور، يا ريت الدكتور يكون خريج أمريكا.
- كان تشتغل ممكن تجيب رسالة توصية من المدير خصوصا لو تشتغل في شركة أجنبية.
- رخصة القيادة الليبية كان تبي تسوق في أمريكا، يمكن إستخارج ترجمة للرخصة في أمريكا و بعدين تقدر تشري سيارة أو حتى تأجر سيارة مرة مرة لفترة مؤقتة لحين إستخراج رخصة أمريكية.
طريقة التعامل مع موظفي جوازات المطار في امريكا.
الاسئلة الشائعة لموظفي جوازات المطار في امريكا.
- ما تفكرش في الموضوع العملية سهلة إن شاء الله، يستحسن يكون عندك عنوان الجامعة أو المعهد ، عنوان الفندق اللي تبي تمشيله أو صديق أو عائلة إذا مستقبلينك عندهم.
- الأسئلة عادية حسب ما أذكر و هي غالبا تأكيد لما موجود في الأوراق متعك.
- في الطائرة يعطوك كرت متع الجمارك حط فيه كل اللي موجود عندك في الشنط، لو انسيت حاجة و لقوها في الشناطي ممكن يغرموك لأنك ما وضحتش أنها موجودة عندك.
ماهي الاشياء التي يجب حملها من ليبيا لعدم توفرها او تكلفتها العالية في امريكا. - نصيحتي ما تكترش ملابس لأن هني موجود كل شي بالإضافة أن لبس الطلاب هني كله رياضي ، يعني ممكن تغير اللبسة شوية.
- طنجرة بالكسكاس ، اللي موجودة هني فتحاتها كبار.
- توابل للطبخ ، حتى هي موجودة لكن ربما تكون مختلفة شوية.
- لبس تقليدي مهم في المناسبات أو التجمعات.
- كم تحفة تذكارية كان تبي تدير أصحاب في أمريكا.
هذا اللي تذكرته توا ، توصل بالسلامة.