السلام عليكم ,, شكرا لجميع من تواصل ^_^
7- الاتصالات والانترنت :حسب ما لاحظت أن شركات الاتصال المعروفة واللى يشهدولها الناس بالكفاءة والخدمات هى : بيل - روجرز - فايدو ( Bell - Rogers- Fido ) هادو حتى فى مكان السكن تلقى مرات عندهم مندوب أو تلقى الكرت الخاص بهم مع موظفى العمارة ,, كذلك فى الاغلب راح توصلك نشرة الخدمات على البريد اول ما تستقر فى العمار ,, دير تشك على صندوق البريد أسفل العمارة ( اللوبى ) راح تلقى مجموعة اوراق ودعايات منهم تلقى شركات الاتصال .
بالنسبة لتجربتى الخاصة ,, أشتركت مع الروجرز فى الانترنت وأشتركت مع شركة
Public Mobil فى التليفون وراح نتكلم بإختصار على فوائد كل شركة وعلاش درت هكى
-
الببليك موبيل حسب ما شوفت أرخص شركة تعطيك مميزات منها :
- مش لازم عقد .
- الانترنت فى الموبايل غير محدد ( unlimited )
- فويس ميل
- لونق ديستانس ( الاتصال بالاماكن البعيدة فى كندا ) لان الاتصال حتى داخل كندا يكلف .
- مكالمات غير محددة داخل تورنتو (call s unlimited )
وتخفيض لمدة سنة وتخلص شهريا 30 دولار . وتقدر تنحى بعض المميزات ليصل الى 20 دولار فقط
ولكن : ضرورى تشرى منهم الجهاز يتراوح حسب النوع من 90 الى 140 دولار .
*********************************************************************************
شركة الفيدو او البيل أو الروجرز فى التليفون شعرت انها غالية شوية خصوصا للى كيف واصل والمنحة مازال ما وصلاتاش ومش عارف شن بيصير يعنى الشركات هادو عيوبهم بالنسبة ليا :
- العقد لازم منه لمدة سنة . ( وصلت المنحة او ما وصلتش ضرورى تشترك معاهم وتخلص )
- السعر 45 شهريا ومرات اكثر .
- الانترنت محدود حسب العقد - 256 ميقا بيت - 500 ميقا - 2 قيقا
- الفويس ميل تقريبا تخلص عليه ,, وكدالك المكالمات بعيدة المدى .
هذا بالنسبة للتليفون والنت فى التليفون ,, اما لو بتشترك فى نت المنزل يعطوك خيارات وتخفيضات
- تقدر تشترك فى النت - وتلفزيون ( كابل ) - وتليفون ارضى
- تقدر تشترك فى تليفون ارضى فقط
- تقدر تشترك فى النت فقط
ولكل خيار أسعاره وخياراته .
على سبيل المثال : خدمة الانترنت اكسبرس مع الروجرز
80 قيقا شهريا تكلف
60 دولار شهرى ,, ولكن يعطو تخفيض لمدة 6 أشهر اتصبح 40 دولار شهرى . وطبعا تحصل خيارات أرخص واحسن يعنى زى ما يقولو دييييل ( كابل تلفزيون - نت - تليفون ارضى ) مع بعض نسمى الخدمة باندل وتحصله بسعر مناسب .
الاشتراك : شوف أحد الفروع متوفرة فى مراكز التسوق ,, او تتصل بيهم من الكروت اللى موزعينهم ترفع جواز السفر واى مستند تانى يتبت هويتك مثل قبول اللغة او حتى رسالة الدعم المالى ثم تختار الخدمة التى تناسبك من ناحية السرعة وكمية الحصة الشهرية وغيره . يعبى الموظف النموذج والعقد . ويعطيك موعد التركيب . وخلاص تمت .
( مش راح تخلص شى لين يركبو النت )
بعد اسبوعين توصلك فاتورة بقيمة اول شهر فى بريدك .
وهذه اللينكات للشركات اللى تكلمنا عليهم لمزيد من الاطلاع :
http://www.publicmobile.ca/pmconsumer/?lang=en
[url=http://www.fido.ca/web/Fido.portal?_nfpb=true&_pageLabel=StoreLocator&cm_mmc_o=mH4j7BBTkwCjCdbpBjHWCjCdbpB aByBEfB C H0zgfCjCdbpB aByBEfB C]http://www.fido.ca/web/Fido.portal?_nfpb=true&_pageLabel=StoreLocator&cm_mmc_o=mH4j7BBTkwCjCdbpBjHWCjCdbpB%20aByBEfB%20C%20H0zgfCjCdbpB%20aByBEfB%20C%20H0zgf&gclid=CNX5ybL-qrgCFY1DMgodWB4Asg[/url]
http://www.rogers.com/web/Rogers.portal
http://www.bell.ca/Bell_Internet
وعلى فكرة احسن زوز شركات هما ( بيل - روجرز ) وكل موسم يكون فيه خطط جديدة سواء رفع الاسعار او خفضها مميزات وعيوب .
8 - معاهد اللغة والجامعات :دائما او أغلب الطلبة بما فيهم انا وين كنا فى ليبيا ما نعرفو شى عن المعاهد والجامعات . ونحصلو فى قبول لغة لمجرد الحصول على التأشيرة لا أعمم ولكن الاغلبية . طبعا قبول اللغة يكون فى اغلب الحالات معاهد تجارية رغم انها معتمدة . ( توا اعطينا اى قبول غير باش نحصلو التأشيرة وبعدين ساهل ) وهذا كله من وجهة نظرى فى القصور التى تعانى منه ادارة البعتات فى توجيهنا ومساعدتنا فى الحصول على قبول من الجامعة التى سوف ندرس بها الاكاديمى ,, البعض قد يقول المكتب الكندى يساعد !! صدقونى حتى المكتب الكندى وين تراسله وتسأله على أى معهد يقولك كويس ,و تمام ,و مافيش اى معهد متلا يقولك لا هدا ما يصلحش او متلا ننصحك بمعهد كدا التابع لجامعة كدا .
عموما ننصح اللى عنده وقت ومش مستعجل ينتسب للمعاهد الجامعية او الجامعة نفسها عندها برنامج لغة وابتعد على المعاهد التجارية
,لماذا ؟- امكانيات الجامعة افضل بكثير من المدارس والمعاهد التجارية وتلاحظها حتى من المبنى والملحقات - طريقة الدراسة تختلف عن الجامعة ,, ففى المعاهد التجارية يركزو على اللغة من ناحية المحادتة وجو ضحك وبريك ولكن الجامعة تركز اكثر على الجانب الاكاديمى مثل اعداد البحوت الكتابة والمنهج اكثر تعمق . وهذا راح تلاحظه حتى فى أسئلة تحدبد المستوى ( فيه فرق كبير بين الجامعة والمعاهد التجارية ) اللى يتسال من الاخوة أو الاخوات متلا ما فهمناش شن تقصد بالمعاهد التجارية والجامعية : المعاهد التجارية مثل ILAC - global village -
English School of Canadaولكن المعاهد الجامعية مثل : University of Toronto - McGill University - المعهد التابع لى جامعة برتش كولمبيا UBC
وعلى أى حال يبقى مجوهدك الذى تبدله هوا العامل الاكبر فى تعلم اللغة ,, حتى المعاهد التجارية تعتبر جيدة ولكن عن نفسى لاحظن الفرق عندما دهبت زيارة للقلوبال فيلج و جامعة تورنتو .
* الرابط هذا فيه جميع المدارس والمعاهد والجامعات المعتمدة فى اللغة :
http://www.languagescanada.ca/en/study
* الرابط هذا فيه الجامعات الكندية وطريقة انك تشوف الجامعة اللى فيها تخصصك والمدينة اللى فيها الجامعة .
http://www.aucc.ca/canadian-universities/study-programs/
وتوا السلام عليكم ولنا عودة ويا ريت اللى عنده معلومة او أضافة يساهمنا ويشاركنا وصحة فطوركم للفطر ,, واللى مازال زينى ان شاء الله عن قريب صحة فطورك مسبقا .
رد: كل ما يتعلق بمدينة تورنتو بشكل مختصر 
سلام عليكم اخى اسامة ... تحية ليبية خالصة لك ... شكرا" على المجهود الطيب و الرائع وان شاء الله ينور دربك زى مانورت درب العديد منا ، اخى لدى بعض الاستفسارات الدراسة فى كندا، حيث لم نقرر بعد اى ساحة بس الارجح كندا ،انى متحصل على ماجستير بالامتحان الشامل بدرجة جيد جدا"، والان احاول الحصول على قبول فى تخصص الفنون التطبقية ( التصميم الداخلى ) اى هندسة الديكور ، وحسب ما سمعت انه فى بعض الجامعات لاتقبل شهادة الامتحان الشامل لدراسة الدكتوراة بس فى كندا كل جامعة وليها شروطها الخاصة فى القبول ، فلو فيها غلبة ممكن لو عندك معلومة حول موضوع الامتحان الشامل ، وشنوا الجامعات اللى تقبله ؟ تفيدنى افادك الله ، وايضا معندكش علم فى جامعات تدرس صيرفة اسلامية . عارف السؤال مش منطقى عشان هى دولة مش اسلامية بس من باب السؤال والله اعلم ، فالعالم اليوم اصبح اصغر من بيوتنا ، واخيرا" اخى اسامة بأى مدينة تنصحنى مع العلم معاى اسرة متكونة من زوجة واربعة اطفال ونبى مدينة تتحدث الانجليزية وعارف موضوع المدارس غادى لو فى مدرسة عربية او ليبية ياريت تفيدنا ممافى جعبتك ..وردى عليا لوسمحت ضرورى عشان نبى نقرر موضوع الساحة هدا فى اقرب فرصة..وجزاك الله عنا كل خير ويجعله الله فى ميزان حسناتك اميييييييييييييييييييين..تحياتى لك وللمنتدى ولكل الموفدين .