ram_rom كتب: السلام عليكم,
الله يبارك فيك على الرد يا خوي الهندي,
باهي اني نفكر بنمشي لجوا ناخد لغة كم شهر قبل ما نبحت عن القبول في الجامعات, هل النقل من ولاية غوا لولاية تانية عادي بدون مشاكل؟ يعني متلاً من جوا لكرناتكا (بنغلور) والا لازم نختار ولاية كل شيء يكون فيها؟ والتأشيرة شنو نوعها الي نطلبها؟ وقابله للتمديد والا ضروري نرجع لليبيا ونولي تاني؟
وعليكم السلام ورحمة الله
جوا يقال انه كويسة بالنسبة للغة انا شخصيا مشيتلها يومين ورجعت يعني ما تفرجت عليها كويس
المهم نعرف واحد قرا اللغـة غادي وصارتله مشكلة تأشيرة ورجع لـ ليبيا وغير تأشيرته وبعدتها مشت اموره
غير هكي لو انت جيت لـ بانقلور وسجلت في بوليس الاجانب تقدر تمشي لاي مكان طالما فيزتك سارية الصلاحية...
بالنسبة لنظام الانتقال من ولاية لولاية ثانية هي اول شي انت بدور قبول لغة بتحصل على حسب الكورس اللي بتاخذه شهر شهرين 6 شهور سنة على حسب الكورس...بيعطوك تأشيرة على حسب قبول اللغة ..بعدها لما بتنتقل لازم تجيب قبول اكاديمي من الجامعة وتمشي بيه للبوليس وادير طلب انتقال ... يعطوك رسالة في ظرف مقفل تنتقل بيها للولاية الثانية في خلال اسبوع من يوم استلامك ليها شرط التسجيل في بوليس المدينة الثانة قبل نهاية الاسبوع ...يعني امر بسيط مش معقد
التمديد بسيط........رسالة من الجامعة انك مازال ما كملت الدراسة وتطلب زيادة مدة الاقامة و لو في رسوم تدفع و انتهى
ولو قدرت تحصل مكان فيه كل الطلبات لغة وجامعة بيكون اريح......فقط رسالة من الجامعة للبوليس تغير الكورس وتجدد الاقامة على الجامعة
وبع
تجدد الاقامة تقدر تمشي لاي مكان في الهند ......يعني في العطلات تقدر تستغل الفرصة وتاخذ كورسات لغة ولا في تخصصك
التأشيرة بما انك ماجستير بيعطوك فيزة طالب
وفي منها 3 انواع
1 single فيزة فردية يعني تقدر تدخل بيها مرة وحدة للهند وخروج واحد .. يعني انت جيت للهند وختمت وعندك اقامة لكن كان طلعت منها وفيزتك فردية ماتقدر ترجع الا لما تجيب فيزا جديدة
2 double ثنائية تدخل مرتين وتخرج...يعني ختمت دخول اول وعندك اقامة تطلع و بعدها ترجع مرة ثانية الختم الثاني هو الاخير لو طلعت مرة ثاالثة يلزمك تغيير الفيزا
3 multiple فيزا متعددة الدخول والخروج طالما عندك اقامة سارية الصلاحية .
لما تمشي للسفارة عششلهم على قصة متعددة لو كنت تبي تروح لـ ليبيا ... بس اقعد غادي و استفيد من الكورسات في العطلات.
