طبعا عنوان غريب (موفد مشتاق)! وياريت ما تفهموش على انه اسم واحد بكستانى*-^
هو فقط لكى يكتب فيه كل موفد ما يشتاق اليه فى غربته لعل غيره يتحصل على فكرة عامة وخصوصا لو تكلم كل موفد على ما يفقده ويشتاق اليه مع ذكر الساحة التى يدرس فيها حتى يتسنى لكل شخص رسم صورة على الساحة المقصودة.
انى بندا بيكم من خلال هذه الابيات:^^
مشتاق خاطري للتن والبطاطا ***وللدحي والجبنة مع ملاطا
جيعان هلبة هلبة *** امرايف علي شربة وتبسي حلبة
وامرايف علي هبرات ناقة تلبة*** فوان مضغهن تحلف الا مطاطا
... مشتاق خاطري للتن والبطاطا ***وللدحي والجبنة مع ملاطا
قريب انموت *** جيعان مش لاقي اشويت قوت
لو كان يا جماعة انطيح في كتكوت *** نشويه وانقرض عليه اسلاطه
مشتاق خاطري للتن والبطاطا ***وللدحي والجبنة مع ملاطا
مشتاق للطابونة *** ومشتاق للترفاس والمكرونة
وياناللي نقصت علي المونة ***وعايش علي البشكوط والشكلاطة
مشتاق خاطري للتن والبطاطا ***وللدحي والجبنة مع ملاطا
جيعان ديمة ديمة *** امرايف علي خبزة شعير وليمة
ولوكان نلقو سمحت التبسيمة ***انعيشو امعاها العمر باطا باطا
مشتاق خاطري للتن والبطاطا ***وللدحي والجبنة مع ملاطا
مشتاق خاطري للتمر *** وياناللي راااااحن ايام العمر
ونفطر علي شاهي وخبزة جمر ***غدايا امية والعشي مكياطة
^^