الله يبارك فيك أختي sumia
بالنسبة لكشف الحساب غير مطلوب لو انك موفدة من قبل الدولة , لكن اني رفعته معاي احتياط وطبعا الحساب اللي ينزل فيه مرتبي فقط , طبعا راه المقابلة في السفارة الامريكية ما ياخدوش عالاوراق بس , المقابلة كأنها اختبار : نفسي واختبار مصداقية كلامك ومعلوماتك , اهم شيء خليك صريحة معاهم وجاوبي بمصداقية لان الانسان لما يكذب فيه ناس خبيرة تقدر تعرف انه ارتبك في الكلام والجو هو .
القبول : قبول لغة .
بالنسبة لأهم الأوراق ,,,
الافادة الجامعية وكشف الدرجات + رسالة دعم التأشيرة + لو تشتغلي يطلبو رسالة من جهة العمل تفيد بأنك بترجعي لوظيفتك لما تكملي قرايتك في امريكا + شهادة مرتب + وضع عائلي + الباسبورت القديم في حالة مغيرة الباسبورت .
طبعا بالنسبة ليا , الموظف اللي دارلي المقابلة ما شافش ولا ورقة , بس الشبابيك اللي جنبي يعطو في اوراقهم , لان الموضوع هني مرتبط بالموظف اللي بيديرلك المقابلة !!!
طبعا الاسئلة اللي بيسألها كلها من الابلكيشن اللي بتعبيه , لانه بيتأكد انك انت الشخص اللي حاط معلوماته الشخصية في الابلكيشن او لا .
انا اول ما وصل دوري ,
الموظف : صباح الخير
أنا : صباح النور
الموظف : انت فلان الفلاني
أنا : نعم
الموظف : علاش تبي تمشي لأمريكا
أنا : ماشي بنقرا وانحضر ماجستير في immunology & serology !!!,,, طبعا هني اني غلطت في الجواب , لأني في الابليكيشن عنده نازل دراسة سنة لغة انجليزية .
الموظف : واللغة الانجليزية !!
أنا : أها نعم بنقرا سنة لغة انجليزية طبعا في البداية وبعدها دراسة اكاديمية .
تك تك تك تك تك ,,, يتكتك عالكيبورد متع كمبيوتره !!!
الموظف : من بيتكفل بمصاريف دراستك ؟
أنا : انا عندي ايفاد للدراسة على حساب الدولة الليبية , وهذه رسالة الدعم المالي من وزارة التعليم العالي في ليبيا .
الموظف : مافيش داعي .
تك تك تك تك تك ,,, يتكتك عالكيبورد متع كمبيوتره !!!
الموظف : انت تشتغل ؟
أنا : نعم اشتغل .
الموظف : شن نوع الوظيفة ؟
أنا : انا أخصائي تحاليل طبية اتبع لوزارة الصحة .
الموظف : هل تقدر ترجع لشغلك بعد ما تكمل قرايتك ؟
أنا : نعم , وهذه رسالة من وزارة الصحة , لمقدرتي على العودة للعمل حال انتهاء فترة الدراسة .
الموظف : مافيش داعي .
تك تك تك تك تك ,,, يتكتك عالكيبورد متع كمبيوتره
الموظف : عندك أقاربك في امريكا ؟
أنا : لا .
الموظف : عندك اصدقاء في امريكا ؟
أنا : لا .
بعدها اعطاني ورقة وقالي عبيها , الورقة فيها وين سافرت في اخر 15 سنة بتاريخ الدخول والخروج ,,, وفيها عدد افراد الاسرة ( الوضع العائلي ) ,,, وفيها شوية معلومات شخصية تعبيها .,, طبعا الورقة هاذي ماعرفتش علاش قالي عبيها , لاني اصلا المعلومات اللي فيها كلها عندي في الاوراق , والباسبور القديم رافعه معاي .
وبعدها مديتله الورقة ,, ونفس القصة : تك تك تك تك تك ,,, يتكتك عالكيبورد متع كمبيوتره , وبعدها عطاني ورقة برتقالية ودار عليها اشارة بالبيرو , وعطاني الباسبورت , طبعا اني وجهي تغير وانقلب 180 درجة , وقتله شن هذا !!!!
قالي لالالالالا انت مقابلتك ناجحة , (لقاني مفنص ووجهي مقلوب
) بس في اجراءات في السفارة بنديروها , واول ما نكملوها نبعتولك ايميل باش تبعت الباسبورت عالارامكس .
خديت الورقة وطلعت , واني في قمت الغليان وطالع نسب وقلت بنرجع للهوتيل بنترجم الورقة وبنشوف سبب العرقلة والرفض , وفي بالي انه رفض !!! ونقول كيف يرفضني وهو ماشافش ولا ورقة من الاوراق !!!
اول ماطلعت من بوابة السفارة الخارجية فتحت الورقة وقلبتها لقيتها مكتوبة بالعربي من الجهة التانية
ههههههههههههه , وطبعا اني حاليا برا السفارة , وفيه طابور بشر مزال يبو يخشو !!!
طبعا هني في اللحظة هاذي جاني الشر متع الليبيين وجو " هد يا حمد " وقلت والله ماني مفوتها هكي , جاي للاردن ومتشحط وفي الاخير يصيرلي هكي , لان الناس اللي يديرو في مقابلات في الشبابيك اللي جنبي كانو ياخدو ويعطو مع الموظفين التانيين , اش معنى اني طحت في هالطوبو !!!!
المهم حاليا اني خوكم الليبي قعدت نشوف للطابور وقررت نخترقه
, ومشيت لبداية الطابور اللي هو اول بوابة , جاني السكيوريتي قالي شن فيه , قتله عندي استفسار انا كنت داخل السفارة , قالي استنى شوية , خشيت للغرفة متع البوابة الاولى الموظف اردني شاحط عريقاته ومش عاجبة وفخاطري الامريكان يرحبو بيك ويبتسمولك ويقدروك والاردني شاحط عروقه , المهم قالي مادام طلعت خلاص , واني نقوله عندي استفسار , المهم سكر راسه واني سكرت راسي , وقتله الورقة هاذي مكتوب في نهايتها ان من حقي نخش للسفارة نستفسر وبديت نعلي في صوتي
, طلعت البنت اللي معاه قالتلي شن المشكلة , المهم وريتها الورقة وقلتلها كيف يعطوني هالورقة واني اللي طالبينة كله عندي في الملف , قالتلي لا هو مداير خط عالمربع متع اجراءات ادارية , مش مداير خط على الاوراق , وقلتلها شن يعني هذا , قالتلي توا بتستنى ايميل من السفارة , لان مقابلتك ناجحة وما تقدرش اتدير مقابلة تانية اصلا , ماعليك الا تستنى .
طلعت واني نص فرحان ونص مخنس , المهم روحت ليبيا وبعد شهر وصلني ايميل وقالولي ابعت الباسبورت عالارامكس , بعته وقعدت نستنى شهر ووصلتني الفيزا والحمد لله , طبعا الباسبورت قعد في السفارة اسبوعين بس , بس التعطيل من شركة الشحن .
المهم ضروري ما تكوني عارفة جميع المعلومات اللي في الابليكيشن , مثلا : عندي قريبي سألوه شن اسم المعهد والولاية اللي ماشيلها , وعلاش اخترت الولاية هاذي ؟ وشن تعرف عليها ؟ يعني تقدري اتديري دورة في النت وتقري شوية عالولاية اللي مقررة انك بتمشيلها وشن اللي عاجبك فيها وتاخدي شوية معلومات عامة عليها , واهم شيء تجاوبي بثقة ماتخليش الموظف او الموظفة يحس انك مرتبكة , يعني يكمل سؤاله من هني شوطيه بالجواب على طول , وربي يوفقك ويوفق جميع الطلبة
وهذه قصتي واسف على الاطالة .
عدل سابقا من قبل Enaro في الثلاثاء 07 أبريل 2015, 10:45 am عدل 1 مرات
أخيرا حصلت التأشيرة الامريكية والحمد لله :)
