السلام عليكم حبيت انبلغكم ان بعد تأجيلي للقبول اسبوعين الى غايت 17 / 1 / 2011 ولكن التأشرة صدرة يوم 12 /1 ووصلت الى طرابلس يوم 17 / 1 مع اني كنت واخد حجز مبدأي على الخطوط القطري وكنت ناوي ناخد تداكر على حسابي لكن وصول التأشيرة والجوازات الساعة 2 من الصعب ان الواحد ايسافر بهده الصورة. على كل حال كلمة الوكالة حتى يأجلوا الى شهر 2 وفعلا هذا ما حصل وصدرت التداكر متع البعثات وحجزة على رحلة يوم 3 / 2 وهذي المدة كافية لترتيب العديد من الامور من وصول التأجيل و coe ووصلنا على خير الى استراليا يوم الجمعة يوم 4 / 2 مكثنا حوالي اسبوع وبدت الامتحان يوم 10 / 2 الدراسة يوم 13 / 2 والحمد لله الامور طيبة وتم تعديل مدة دراسة اللغة بحيث لا تكون هناك مشكلة مع بداية العام الدراسي الاكاديمي والحمد لله. وربي يسهل لجميع الطلبة ويسرلهم امورهم نصيح قبل ما تميش ضروري ترتب مع حد موجود في استراليا ويكون افضل ادا كان ليه اكثر من سنة يعرف البلاد ويعرفك عليها ويرتبلك امورك. ونسأل الله العلي العظيم ان يجازي كل من وقف معي وساندني في اتمام اجراءاتي وأن يفتحر لهم ابواب رزقه ويبارك لهم في ابنائهم ودرياتهم امين امين
كانت رحلتى الى استراليا ممتعة ومتعبه بعض الشىء وذلك لبعد المسافة سفرت على الخطوط القطريه وخدمتها رائعة على الدرجه السياحيه غادرت ليبيا 3\2\2011 الساعه 30\4 بتوقيت طرابلس وصلت الدوحه وكان الترنزيت ساعتين ونصف غادرنها حوالي الساعه الواحد الا ربع ليلا بتوقيت الدوحه الى مالبورن وصلنا الساعة 10.30 ليلا مساء الجمعة بتوقيت ملبورن الرحله 12 الساعه من الدوحة الى ملبورن وصلنا مطار ملبون وطبعا ما كنتش رافعه معاى اى شىء ممنوع فكانت الاجراءات ساهله وحتى الشناطى مافتحوهمش لانى قلتلهم الموجود عندي فى البطاقه والتي كانت مكتوبة باللغة العربية برغم من اني لم اطلب منهم ذلك لكن مع طول الرحلة والتحدث كم مرة مع المظيفات تلقائيا احضرتها باللغة العربية لان رفعت حليب اطفال ووشق والفلوس قلتلهم قداش معاى ورفعت معاى من ليبيا ماكله لكن قبل مانوصل مطار ملبورن اتخلصت منها ، وبعدين طلعنا لصاله ولقينا صديق ينتظر فينا ومعاه شباب ليبين بارك الله فيهم ماقصروش وكانوا اجرونا حوش احد الاخوة السعوديين لمدة شهر وكان مفروش ما ناقصه شىء والحمد لله وتنى يوم اطلعنا وتعرفنا على البلاد وامشيت للجامعه (جامعة لاتروب) و اعلمتهم بوصولى وبعد 6 ايام درت امتحان تحديد مستوى وكان معاى الكتير من الطلبه من مختلف الجنسيات وبعد اسبوع بدأت الدراسه ومازال ما استكشفت الجامعه اكويس لكن الجامعه فيها طبيعه خلابه وكبيره يعنى باش تنتقل من مكان الى مكان تانى بالباص بس الباصات جميله ومنظمه يعنى مواعيدها تابته مش زى باصات ليبيا وملبورن جميله جدا وطبيعتها خلابه وين ماتمشى تلقى اللون الخضر بس جوها متقلب وهما الن عندهم صيف وتو حننتقل لحوش تانى قريب من الجامعه احسن هكى لانه الباصات بالفلوس وكل شىء محسوب اهنايا بالنسبه للايجار غالى نوعا ما انى اجرت حوش 1390 شهريا ما غير الغاز والماء والنت والتلفزيون والكهرباء والحضانات الاستراليه نار بس فيه عائلات ايشدوا فى الصغار باسعار معقوله والمواد الغدائه معقوله وكل شىء متوفر وهادى رحلتى والعقبه ليكم