الاكلة المعجزة!!!!!!!!!

انا طبعا انحرجت بكل لاني انشوف في خواتي الموفدات يساعدوا في الشباب العزاب في عمل الاكل
وانا ماده وجهي ,,,,,ماحاولت باي شئ ,,,,, عشان محد يقول عني بايرة,,لذلك اصريت اني نكتب عن

اكله لو اكلها اي موفد ,,,(ولاحظوا كلمة موفد بالذات),,,,مستحيل بعدها ياكل لمدة(( اسبوع كامل )) لانها باختصار اقتصاديه وعملية لابعد الحدود,,,,ومحبوبة جدا من قبل الموفدين الكسولين والقرقاضين,,,,,

المقادير: دقيق +زيت+ماء+سكر
ضع الطاجين علي النار ثم كب الدقيق بعد ان يأخذ اللون البرونزي عليك باضافة السكر المذاب في الماء
قلب المزيج جيدا (حرك كويس لعند ايدك توجعك),,,,وعندما يشرب الدقيق كل الماء,,,قم بالخطوات الاتيه

طفي الغاز بس...

ملاحظه:
1:بامكانك اكلها من الطاجين وهي فوق الغاز (الفرن)
2:بامكانك وضعها في صحن كبير وتاكل ثم (دس الباقي للاسبوع الثاني),,,حركة اقتصاديه
3:بأمكانك اضافة ماء زهر_ماء ورد_او فانيليا علي المزيج وهو علي النار...
4:بأمكانك اكلها ساخنه او بارده
5:بامكانك ارسال بعض منها الي بعض الموفدين العزاب (الغلبانين)

مع العلم ان هذه الاكله اسمها في مصر,,,,,,,(سد الحنك),,وتسمي بذلك
لانك مستحيل تفتح فمك بعدها واتقول انا جعاااااااااااااااااااااااااااان,,,

اختكم لوزا ,,,,ياريت دعوة بظهر الغيب,,,,,,,,,(بس ياريت دعوة خير انا مش ناقصة)

بارك الله فيك أختى لوزا

اولا تسلم ايديكى
اكله شكلها حلوه وفى نفس الوقت اقثصاديه لكن ديما ديما الواحد يمل يبى يغير وينوع وطز فى القرقضه وخلى الواحد يعيش وياكل

لارا ههههههههههههههههههههههه نحنا البنات عادي مش مشكله لاننا ديما نحبوا انوعوا ونغيروا في الاكل,,,,,نحنا عايشين حياتنا صح

نحكي انا علي العزاب الي ما يعرفوش فن الطبخ ومدلعين في حوش هلهم,,,,

تي شن هي الحلوة ربي يهديك هو انا غير قريت مكونات الاكلة بطني و جعتني و جاني مغص
ماك تقولي ديروا عصيدة وخلاص

شكرا اخي dentist علي التشجيع والاطراء,,,,
ان شاء الله المرة الجايه نحاول اني نطرق لاكلة (الزميته_او الروينه)

العصيدة لانها صعبه خلوها اخر اكلة,,,,اهم شي توه تتعلم الاكلات الساهله بيش
تمشي روحك,,,,,,بعدها كلها اتجي الكسكسوا والعصيده والمقطع والحساء

الخير كله لقدام ان شاء الله ,,,,,,بس نبي دعم معنوي بس

شكلى أنا نتعب فى كندا

ياريت ناكلوها من ايديك بيش تحصلى الدعوة كاملة
ملاحظة:رد بالك اديريها لزوج المستقبل لانه مش راح يقدر يتردد لحظة فى الطلاق

اخي طبرق بارك اللف فيك شكرا علي الدعم الباين انها عاجباتك,,,,ان شالله ربي ايطيحك
في بنت حلال شاطره في الطبخ كيفي,,,,,وعلي العموم انا نبي نألف كتاب عن الطبخ ونزله في السوق الايام الجايه,,,,,,بس ناقصني حاجات بسيطه وينزل السوق....

اخي عبدو,,,,حرام عليك تفاول عليا من توه ,,,,هذا بدل ما تشجعني وتدعمني
علي اي العموم,,,,انا كاتبه فووووق للعززززاب ,,,بس زوج المستقبل(الله اعلم وينه توه) حيكون له اكلات اخري لانه ببساطه مش من العزاب ,,,,,,(فيه فرق),,,

بعدين التجارب هن الاساس في التعلم واكتساب المهارات,,,,
مفش شئ يجي بالساااااااهل

السلام عليكم, أنا عادة لا أقرأ صفحة الأكلات لأني والحمد لله متزوج والمدام (ربي يخليها) فنانة من الطراز الأول في الطبخ, أذكر انه بعد الزواج طربقت 20 كيلو في أول شهر والحمد لله البقية تأتي..المهم أنا شاركت توا لأن المدام من كام يوم دارت نوع موالح كليت منها 7 طروف ذواقة بس! لا قوة إلا بالله ، المهم طلع اسمها "شبتية" وأعتقد أن مكوناتها ساهلة ومتوفرة ، إخواني العزاب نحن في الخدمة .عارف معاناة البعض كويس..أنا قضيت أول سنتين في الغربة عازب طايحلها بين الدحي والتن وبين تطفل على المتزوجين!

ما تخافيش اللى زيك زوجها يحبسها من خوفه عليها.
ربى يرزقك ولد الحلال

أكيد الأكلة هذه مزح .. ما هو يفتحله حكة تن خير له ..

معجزة فعلا
شكرا

أختي أم سمايلي شكرا للدعم...ما يجبر خاطر البنت ألا بنت كيفها...

أخي صالح علبة التن كل يوم مش كويسة علي صحتك....ممكن نهايتها تتحول الي حوته أو أخطبوط......بعدين الأكله هذي مصرية ومعروفه في مصر بأسم {سد الحنك} وتقدر تبحث عنها في الجوجل....{وبلاش خربة سوق}...

أخي عبدو ربي يخليك ويكثر من أمثالل... وأن شالله كيف ما قلت يطلع يخاف عليا مش يخاف مني

بس أنت ادعيلي وكثر من دعواتك....
وأنا عهد عليا انزل أكلات ألي أن أتحصل علي رسالة الدعم....

امة الله كتب:

اختي لوزا انت اللي معجزة ^_^... ماشاء الله على خفة الظل....ومن يقترن بك سيكون من المحظوظين..... وفقك الله وحفظك من كل سؤ

صدقتِ أمة الله، من هو اللي يحصل وحدة زي لوزا و ما يكونش سعيد؟

بصراحة أمة الله اي موضوع تشاركي فيه يزيد ينوّر و يزيد عدد الوات (Watts) فيه

فهمونا يا جماعه بس تبوا اديروا دفع ولا فاتحه ههههههههههههههههههههههههههههههههههههه
عشان انوقظ هلي ونوتي روحي هههههههههههههههههههههه
اختي امة الله احرجتيني بكل ههههههههههههههههههههههههههههه ربي يحفظك
اكيده حيكون سعيد,,,,,,,,,الشئ هذا غصبن عنه مش برضاه هههههههههههه
شكرا حبيبتي لارا
شكرا اختي أمة الله
شكرا اخي inception
شكرا اخي abdo
شكرا للجميع,,,,,,وياريت محد يغيب في فرحي وياريت محد ينسي الزلوف..(الزلوف اجباري)

ههههههههههههههههههه حلوه الزلوف انقولك حاجه الشعب الليبى ما عطب حاله امفيت الزلوف عطينى زلوف ماشيه انبارك عطينى زلوف ماشيه لفرح عطينى زلوف ماشيه لللمه .....................
اكيد محظوظ الى يزوج لوزتنا تى لولا فكاهة لوزا راهوا المنتدى امكسد
ان شاء الله انجوا لفرحك وحتى من دون عزومه
تحياتى لك اختى لوزاااااااااااااااااااااااااا

بارك الله فيك
ماهو قوليلهم يتزوجوا احسنواسهل
وربي يوفك الجميع

لارا من توه مفش حد ايجي ولا يعزم روحه بلا زلوف,,,,انا نبي نكتب في الكرت (الزلوف اجباري),,,,,,,وبعدين توه زادوا المرتبات وحتي الزلوف راهوا زاد ,,,,,هذا للعلم

وياريت اتلموا الزلوف قبل الفررح بالمره,,,,,,بالك نقدر نحجز بيه القاعه والفيلو,,,,

وياااااااااااااااااااااااريت ,,,,,ياااااااااااااااااااااريت,,,,,محد ينكد عليا في الفرح ويذكرني بلايفاد
او يجيب سيرة اني موفده,,,,,,,,واخيرا اي موفد اوراقه مش تامات مفش داعي ينكد علينا ويحضر,,,,,,,,,يقعد هنا في المنتدي ينكد علي مدير المنتدي والمشرفين ههههههههه

بصراحة ... سلاسة الألفاظ وحلاوة السرد كانت أكثر لذة من الاكلة (العجينة) .... عموما راق لي جداً أسلوبك الساخر والفكاهي ... وزاد استحساني عفوية ألفاظك وبساطتها ..

سعدت بالتواجد في صفحتك .... وســلمك سواية .. !!!