قبول اكاديمي في كندا

السلام عليكم،

يا جماعة الخير كانكم قاعدين في ليبيا راهو صعبة العملية، ان حد يجيبلكم قبول اكاديمي بالذات، تو اللغة فيه فتوى لان في مدارس خاصة واجد بالاضافة الى مراكز اللغة التابعة للجامعات، ما عندهم روح مع الفلوس خاصة لما تقوللهم موفد.
لكن الاكاديمي لازم تكون موجود في كندا بيش تفهم شن ادير بالزبط.
باختصار الجامعات كلهن يبن يا اما توفل او ايلتس ، او انك مكمل عندهم برنامج الانجليزي التابع للجامعة قبل ما يعطوك قبول اكاديمي، طبعا لكل قاعدة شواذ لكن اني نتكلم على البرنامج العام اللي ماشي.
المهم فرضا ان عندك توفل او ايلتس،،، تبدا تقلب على تخصصك في الجامعات الكندية والقصة هذي تبي وقت وصبر وانجليزي، لين تحط في راصك مثلا 5 جامعات، تشوف الدكاترة في القسم متاعك وكان عجبك الشغل متاع واحد منهم تراسله وتقوله في وفي ...
كان قالك باهي عبي ابليكيشن واعتبر قبولك مضمون ، اما كان ما عندكش جو تقلب الدكاترة، ابعث الابليكيشن للجامعة طول، يعرضوه بعدين على القسم وكان وافق عليك واحد من الدكاترة يعطوك قبول ، لكن الطريقة الثانية مش مضمونة انت وحظك.
واخيرا وليس اخرا، لما تجي لكندا يحقلك ان المكتب يقدملك على 5 جامعات، عطيه شهاداتك واوراقك وهو يقول باللازم. لكن الفكرة الرئيسة للقبول انك تربط مع دكتور مشرف من الاول ...

ان شاء الله يكون الكلام مفيد ،،،،

تمنياتي للجميع بالتوفيق ...