اتمام لاجراءات في المكتب الكندي

المطلوب عمله حسب تعليمات المكتب الكندى موجود فى الرابط التالى و يمكنك مراسلة المكتب الكندي بالعربى

http://www.cbie-bcei.ca/student-portal/libya/canada/nominated-students

شكراااا بارك الله فيك

السلام عليكم خوي

تقدر تراسل المكتب الكندي من الان وتبعتلهم صورة من برقية الصرف و تعريف طالب وصورة من جوازسفرك و تاشيرتك وبعد توصل كندا إن شاء الله ويعطوك في المطار تأشيرة الدراسة حتى هيا تصورها وتبعتها للمكتب الكندي وفي نماذج موجودات في موقع المكتب الكندي لازم تعبيهم وتوقعهم وحتى هما ترسلهم للمكتب الكندي .... حاجة تانية مش لازم تمشي لأوتاوا لان كل شيء يتم اونلاين

ربي يسخرلك أمورك

شكرا بارك الله فيكي بس بنقولك اني عندي قبول فياتاوا لكن تو غيرت لي مونتريال في جامعة ماكيجل كيف تو بندير او ني هيا المرحله او الطريقه حتي نعطي علم للمكتب الكندي ان اني غيرت وثاني شي تقدري تبعثيلي نمادج متع المكتب الكندي والنمادج هادوم نبعثهم في البريد او كيف وشكرا اسف اسف تعبتكم معاي

يوسف رضا كتب:

شكرا بارك الله فيكي بس بنقولك اني عندي قبول فياتاوا لكن تو غيرت لي مونتريال في جامعة ماكيجل كيف تو بندير او ني هيا المرحله او الطريقه حتي نعطي علم للمكتب الكندي ان اني غيرت وثاني شي تقدري تبعثيلي نمادج متع المكتب الكندي والنمادج هادوم نبعثهم في البريد او كيف وشكرا اسف اسف تعبتكم معاي

السلام عليكم خوي

مافي داعي تخبر المكتب الكندي انك غيرت من اوتاوا لمونتريال لان هذا شيء يخصك المهم لما توصل عطيهم عنوانك وابعتلهم النماذج بالايميل

أولا ما في داعي للشكر وما في تعب ولا أي شيء ... ثانيا انا اسمي حنان وليس هناء .... وثالثا حتى لو غيرت مكان دراستك من أوتاوا لمونتريال هذا ما يغير شيء وسواء المكتب الكندي يعرف أولا مافي فرق المهم عندهم زي ما قلتلك لما توصل على خير تبعتلهم عنوانك و بياناتك في النماذج اللي بترسلهم

ربي يوفقك

شكرا الله ابارك فيك مهندسه حنان والله مشكوره علي كل شي اختي حنان ربي يحفضك ويكثر من امثالك هو زيك ناقص في البلاد بدون مجامله ربي يوفقك في حياتك في دراستك شكرا مره ثانيه فرصه سعيده بارك الله فيك

عفوا خوي و بارك الله في الجميع و إن شاء الله ربي يوفقنا و يوفق كل موفد و موفدة

فرصة سعيدة و بالتوفيق

السلام عليكم ....كل عام و الجميع بخير

أختي حنان بالله لو سمحتي عندي بعض الأسئلة:

1- في النموذج IMM1294 ما المقصود UCI في أول خانة.

2- في أحد ردودك تكلمتي على مشكلة خانة التاريخ حيث تظهر بالأرقام القديمة..كيف حل هالمشكلة؟

3- بعد الحصول على الدعم المالي للقبول... هل أتصل بالمكتب الكندي للحصول على رسالة دعم مالي منهم ؟أم ستمر في الإجراءات كباقي الساحات؟

و سامحينا لو تقلنا عليك و جزاك الله عنا كل خير و وفقك الله في دراستك و حفظك من كل سوء و مكروه

وعليكم السلام خوي

1- بخصوص الخانة UCI غالبا يعبيها موظف السفارة لانها حسب ما نذكر تعني رقم ملف تأشيرتك

2- بخصوص مشكلة التاريخ اللي يطلع بالارقام الهندية أو القديمة تقدر تحل هالمشكلة بأن ادير تحديث للأدوب ريدير Adobe Reader وبإذ الله تمشي الأمور

3- لما تحصل رسالة الدعم المالي من البعثات لغرض القبول تقدر تراسل معاهد اللغة اللي تبي تقرا فيها بدون ما تتصل بالمكتب الكندي أو تاخذ رسالة دعم مالي منه بس اذا قبول أكاديمي في جامعات ممكن يطلبوا عليك رسالة الدعم المالي من المكتب الكندي

هذا والله أعلم ....ربي يوفقك و مافي تعب

بارك الله فيك أختي و جزاك الله خيرا و وفقك الله

السلام عليكم أختي حنان
بارك الله فيك على مجهوداتك بالمنتدى ,,,
اني فهمت منك أني نقدر نجيب قبول من معهد لغة من غير ما نتصل بالمكتب الكندي ,,, في هذه الحالة هل ندفع رسوم تسجيل اللي هما (500 دولار) ؟؟ وبعد ما نجيب القبول هل نقدر نتواصل مع المكتب بعد ما نتحصل على رسالة الدعم للتأشيرة من البعتات ونبعتها للمكتب الكندي بحيت نتحصل منه على رسالة دعم تانية للتأشيرة بحيت يدعمني في السفارة ؟؟؟
بارك الله فيك مسبقا

السلام عليكم ورحمة الله وبركاته وصلي الله علي سيدنا محمد وكل عام وانتم بخير

اولا: فيه طريقتين للحصول علي قبول من الجامعات الكنديه المعتمده

الاولي عن طريق البحث في محركات القوقل واختيار معهد مناسب ومعتمد ومراسلته عن طريق الايميل

الثانيه مراسلة الخبير التعليمي عن طريق الايميل وتوضيح بأنك تريد قبول لغه او اكاديمي حسب رغبتك

هذا ايميل الخبير التعليمي للمكتب الكندي المسؤول عن الكلبه الليبيبين

Karen Rauh KRauh@cbie.ca واسمها كارين

Anan Terhi ATerhi@cbie.ca واسمها انان

وهذا الرابط يحتوي فقط علي مدارس اللغه المعتمدة في كندا والمعتمده لدي السفارة الليبيه

=21]http://www.languagescanada.ca/en/study?filter0=&filter1=**ALL**&filter2[21]=21

المهندس 2010 كتب:

السلام عليكم أختي حنان
بارك الله فيك على مجهوداتك بالمنتدى ,,,
اني فهمت منك أني نقدر نجيب قبول من معهد لغة من غير ما نتصل بالمكتب الكندي ,,, في هذه الحالة هل ندفع رسوم تسجيل اللي هما (500 دولار) ؟؟ وبعد ما نجيب القبول هل نقدر نتواصل مع المكتب بعد ما نتحصل على رسالة الدعم للتأشيرة من البعتات ونبعتها للمكتب الكندي بحيت نتحصل منه على رسالة دعم تانية للتأشيرة بحيت يدعمني في السفارة ؟؟؟
بارك الله فيك مسبقا

وعليكم السلام خوي المهندس و ربي يبارك في الجميع

زي ما قلت حضرتك تقدر تجيب قبول لغة من غير ما تتصل بالمكتب الكندي و هذا أسرع لأن المكتب عنده طلبه هلبه و ممكن يعطلك شوية ....بخصوص الرسوم في معاهد لازم تدفع رسوم التسجيل عندهم مسبقا و غالبا تكون 500 دولار بس في معاهد لا و انت وحظك انا المعهد اللي حصلت منه قبول دفع صديق لينا في كندا عني الفلوس و احني عطيناهم لأهله في ليبيا ومشت الأمور و لله الحمد و عل فكرة لما تجي لكندا المكتب الكندي ملزم يردلك فلوس التسجيل لذلك اذا عطوك مدرسة اللغة اي ايصالات خليهم عندك و طبعا بعد ما تحصل قبول تقدر تكمل اجراءاتك مع المكتب الكندي و السفارة .... هذا و الله أعلم ... بالتوفيق