ان شاء الله توصل بالسلامة يا خوي محمد . والامور بعون الله ساهلة . وحنقولك شن ادير خطوة خطوة . ولو تبي رقم هاتفي نبعتهالك عالخاص . للاسف اني دنفر بعيدة عليا ومانقدرش نمشي نستقبلك . اني نسكن في ديتون في ولاية اوهايو . ولو كنت في دنفر ماكنتش حنقصر معاك . المهم توكل على الله وتو تمشي امورك مية مية
نبدوا القصة وانت في الطيارة . في الطيارة يعطوك نمود تعبيه اللي هو i_94 . ولو ماعطتهالكش المضيفة اطلبه منها . مرات تكون راقد انت لما وزعوه . ولدلك ماتنزلش من الطيارة اللي بتنزل بيك في امريكا الا بيه .
وبعد ماتوصل بسلامتك تطلع من المطار وتتوجه لاي فندق تحجز فيه تحط شناطيك وتكلم اهلك اطمنهم بانك وصلت . وبعدها ترقد وترتاح ويامن عاش لتاني يوم .
تاني يوم ادور سكن ولو ماتعرفش حد ليبي حتكون صعبة شوية واحسن حاجة اديرها انك تسئل على اقرب جامع وتمشي تصلي فيه وتكلم اي حد تلقاه في الجامع يساعدك .
وبعد ما اتاجر حوش اعتبر روحك استقريت وتميت 80% من مشوار الاستقرار . وطبعا بتقعد ساكن في الفندق 3 او 4 ايام لين تجهز الشقة امتعك . تبي اتات واول حاجة تشريها من الاتات سرير والباقي امتى ما تشريه باهي .
وبعد ماتسكن بتمشي لاي مصرف تفتح حساب اني ننصحك بمصرف chase
وبعدين بتمشي تشترك في النت وتشري هاتف
وبعدين بتبدا تراسل في المكتب الكندي وتقوللهم اني وصلت بسلامتي . وتو هما ايقولولك شن يبوا منك وبيبعتولك نمودجين اتعبيهم وتبعتهالهم
وتمشي للجامعة اللي محصل منها قبول واسئلهم على امتحان تقييم المستوى امتى . وبالنسبة لاجراءات الجامعة مافيش ابسط منها . هما ايوروك كل شي ايدروا بيك جولة في الجامعة كلها وايوروك كل شي ووين بتقرا اللغة وايديروا بيك دورة في كل قسم
وبالنسبة لسؤالك على السلطات الليبية والسلطات الامريكية ما عندكش معاهم اي اجراء . اجراءاتك كلها مع المكتب الكندي والمعهد والا الجامعة اللي بتقرا فيها
وبالنسبة لموضوع التامين الصحي ينزلهولك مع المنحة والا بعد ما تنزل المنحة باسبوع .
نصائح من خوك موفد فاد
1 تبحت على اي ليبي يسكن في دنفر . مرات تلقى حد من اعضاء موقعنا الرائع ( الموفد ) يسكن في دنفر . ولو حصلت حيسهل عليك 50% من مشوارك
2 مادا بيك اتجي قبل ما تبدا القراية
3 انسيت انقولك انه في امريكا اي اجراء تبي اديره بيطلبوا منك i_20 ( اهم ورقة من اوراقيك ) جيبه معاك من ليبيا واختمه اهني في الجامعة
4 جيب معاك فلوس لانه مرات المكتب الكندي يعطل عليك في المنحة . اني نزلتلي المنحة بعد شهر واسبوع بسبب التسيب اللي في ادارة البعتات
5 ومش لازم تجيب معاك هلبة ملابس . لانه اهني اللبس ماركات ورخيص . وكان معاك زوجتك جيبلها لبسها من غادي لانه لبسهم ما يمشيش مع انساوينا وكتر من الاوشحة
لاي استفسار راسلني عالخاص . وتوا اني انشوف الناس القدم اللي اهني بالك يعرفوا حد من دنفر
وربي يوصلك بالسلامة
_______________________________مـــــــــــــــــــــــــوفد فـــــــــــــــــــــــــــــــــــاد
