عاجل ومهم بخصوص السفاره ..

اني قدمت على الفيزا من تونس وكانت اوراقنا كلها كاملة اني و زوجي حصلنا الفيزا في تاني يوم لكن على مااعتقد في مصر لازم تحجز موعد من مصر مش من ليبيا .انحس في السفارة التونسية افضل من المصرية اقل تعقيد

موعدي كان شهر 5 اللي فات كان يوم 3 الاجراءات نوعا ما عادية لكن فيها رعب لشخص اول مرة ايدير موعد في السفارة و طبعا كانوا ايركزوا على رسالة الدعم المالي من المكتب الكندي وماشافو رسالة الدعم من البعثات لكن حسب كلام اعضاء المنتدى معاد يطلبوا فيها رسالة الدعم امتاع المكتب الكندي وهلبة ناس ماشية بتقرا على حسابها رفضوهم لانهم مش رافعين معهم كشف حساب واكثر شي ايركزوا عليه موضوع الهجرة لازم اتبينلهم انك تبي ترجع لي ليبيا و بتخدم فيها لانهم خايفين من موضوع الهجرة ويسالوك تبي المقابلة بالعربي والا بالانجليزي احني اخترنا بالعربي جابونا مترجم لكن انت لازم اترد بالانجليزي المترجم ايترجملك الاسئلة سالوني في اما جامعة بنقرا و شن بنقرا وعلاش اختارت كيمياء وقداش ليك متزوجة وعندك اصغار والا لا اسئلة عادية
اهم حاجة ايكونوا اوراقك كاملة ولما اتجاوب تقوللهم اجابة منطقية واتبينلهم انك مش خايف
لان في واحد ليبي دار مقابلة قبلنا ماشي بيقرا على حسابه قالوه من بيصرف عليك قاللهم بوي سئلوه بوك شن عنده قاللهم مزرعة وطانطات المترجمة سالته شن هما الطانطات قالوه روح مافيش فيزا وكشف درجاته كان ضعيف و ايركزوا حتى على الدرجات في الكشف
انسيت سالوني اقريتي في ليبيا انجليزي قولتلهم شوية قالولي الكيمياء قريتيها بالعربي والا بالانجليزي
وفيه حاجات هي بسيطة لكن لازم الواحد ايديرها في باله احني امشينا قبل يوم الموعد شوفنا مكان السفارة هي قريبة على المطار جهة البحيرة وقريبة على الملاهي ولما امشينا يوم الموعد الطريق زحمة لين خلاص والسفارة كانت تبعد علينا ربع ساعة احني امشينا قبل الموعد بساعة اوصلنا قبل الموعد بربع ساعة وخوفنا ايفوتنا الموعد