تثبيت معلومات بخصوص رسالة CAQ وكذلك confirmation من البعثات للمكتب الكندي

السلام عليكم ورحمة الله وبركاته

اود تثبيت معلومتين كنا قد طرحناهم للنقاش دون التأكيد على النتيجه النهائية

الاول بخصوص رسالة CAQ وهي quebec acceptance certificate وهي انه اي طالب بيقرا في كيبيك لازم يتحصل على الرسالة هدي من حكومة كيبيك وليس من السفارة الكندية
طبعا هده الرسالة مطلوبة ويفضل التقديم عليهم مع التقديم على التأشيرة لان بعد اتصالي بالسفارة قالولي يمكن انك اتقدم ع التأشيرة من دون هده الرسالة بشرط انك اتجيبها لاحقا ولن تستلم التاشيرة ما لم تحضر هده الرسالة

الموضوع التاني بخصوص المكتب الكندي وهو لما تبدأ اتراسلهم احيانا ايقولولك انهم يستنو في كونفرميشن من البعثات طبعا المفروض العملية اتم روتينية وبسرعه لاكن للاسف عندي تأخر الموضوع فقلت نمشي شخصيا للبعثات ونشوف طبعا خديت معاي صورة من الدعم المالي للتأشيرة واخير وصلوني للمكتب الي ايجاوب على المكتب الكندي وقالي توا سنرد عليهم بالتأكيد والفكرة انهم ما ايردوش بروحهم لو ما مشيتش شخصيا لان من خلال كلامي معاهم الموضوع جديد عليهم

تحياتي

شكراً يا أخي
من كلامك إنه الساحة الكندية تعتبر مفتوحة!!!!
مش عارفة ليش مندوب جامعتنا يقول مسكرة ورافض ياخد منا نماذج الدعم المالي لغرض القبول؟؟؟؟

مفتوحة يا اختي بس بالنسبة للتخصصات الطبيه ماعنديش معلومة تابته بس في مواضيع ف القسم اتناقش الموضوع

اخي ماجد اني مبدئيا مشيت لمكتب مشرف الساحه امتاعي وهو قالي انه موضوع المراسلات مع المكتب الكندي مش تبعي وقالي امشي لمكتب الإبراق والمكتب هدا في نفس الدور الي فيه مكاتب مشرفين الساحات

اني اخروا عليا المنحة شهر بسبب تسيب جماعة البعثات لين كلمت بوي امشالهم للبعثات قالوله قاعدين مانزلوش اسمي في المنظومة مع اني ماجيتش لي امريكا لين كملت كل اوراقي في ليبيا و بعدين نزلوا اسمي في المنظومة وبعتوا التاكيد للمكتب الكندي ونزلونا المنحة
المفروض اللي بيجي لي امريكا وكندا ايخلي اهله ايراجعوا البعثات للتاكيد للمكتب الكندي بانهم اينزلولك المنحة

فعلا حوحو تسيب وعمل مش منظم ومافيش احترام لوقت الناس

الله المستعان

السلام عليكم اخي Fred بنسالك لاني بنحضر دكتوراة في تقنية المعلومات وان شاءالله بنتخصص قواعد بيانات واخترت كندا؟ هل انت بتحضر ماستر او ادكتورا بعدين هل حصلت قبول اكاديمي وشن الجامعة اللي متجهلها

أختي ام كلثوم ربي ايسهلك ان شاء الله اني ماستر ناوي ومعاي قبول لغة بس اما قبول اكاديمي بعد الواحد يوصل غادي ويبدأ في اللغة بعدها يمكن البحث عن قبول اكاديمي بصراحة هكي ناوي اني بإدن الله

بالنسبة للجامعة ع النصيب وين ما الواحد ايحصل قبول يستقر مع العلم ان اخر ترتيب لأفضلية الجامعات في تخصص الحاسوب بشكل عام هو كالتالي :

- جامعة تورنتو ( قسم الحاسوب عندهم الترتيب الاول على مستوى كندا والعاشر على العالم. المصدر موقع قسم علوم الحاسوب بجامعة تورنتو)

- جامعة ميجل وجامعة برتش كولومبيا (أعتقد انهم متقاربات جدا في قوة قسم الحاسوب عندهم)

- جامعة وترلو وجامعة كونكورديا

هدا التصنيف الي ماشي بيه

ربي ايوفق الجميع

تحياتي

لو سمحت بالله التخصص هذا طب ولا حاسب
كان طب يعني الساحة مش مفتوحة و كان حاسوب اول مره ايمر على !!!!!! بس فيه واحد واخد تقنية المعلومات من ماليزيا
و قال مافيه هذا التخصص في كندا
و الله اعلم

السلام عليكم
اللى تخصصه تقنية المعلومات يقدر ايكمل فى علوم الحاسوب .... اللى ما عنداش معلومة على تقنية المعلومات : توجد فى ليبيا 3 كليات
واحده فى بنغازي والاخرى فى مصراته والاخيرة الان التى لازالت تعاني مخاض الولادة ... فى طرابلس
اما على مستوى الجامعات بالخارج
فان هذا التخصص يوجد بالجامعات البريطانية وجامعات اسيا.
والجوجل موجود .....

السلام عليكم جميعا

بالتسبة لموضوع التأكيد من المكتب الكندي , هذا يوصلك مجرد المراسلة من البعثات, اني وصلتني من قيل ما ناخذ رسالة دعم التأشيرة . باريت الواحد يتأكد من ايميله اللي كاتبه.



اختي ,,, بالنسبة لصيدلة مفتوجة في الساحة الكندية,




بالتوفيق للجميع

الاخ dnon
يبدو انك قاعد فاضي وماعندك شغل وقاعد تفلسف عالفاضي تفنية معلومات سامع بيها في الطب قبل
ولما قلت تخصصي مايعني نتكلم بشكل خاص عن تقنية المعلومات واعتقد ان اخي alhusain
كفا ووفا بالرد عليك
لاحول ولاقوة الا بالله

Assalam Aleykum

Dear brother Naser you can study IT in canada Department of Computer Science and Software Engineering I guess.

Check this link for details

http://www.canadian-universities.net/Universities/Programs/Information_Systems_and_Technology.html

Good luck

You are welcome, sure if you need any help contact me.

Regards,