مهم جدا لكل موفد او موفدة الي الساحة الكندية

السلام عليكم ورحمة الله وبركاته؛؛؛

نحب نبه كل من هوا قادم للدراسة في احدي الجامعات الكندية ان يجيب معاه رسالة من جامعته اللي قاري فيها تبين نظام تقيم الدرجات المتبع بتلك الجامعة Grading Scale لان معظم الجامعات هني يطلبو فيها مش يحسبو معدلك GPA لاني حاليا نعاني من هدي المشكلة وكشف الدرجات مش كافي ضروري من نظام تقيم الدرجات فالافضل انه يكون معاك من قبل ماتجي لان فيما سبق مكانش عندي فكرة انهم يطلبو فيه ...بالتوفيق للجميع

يضاف لقائمة المستندات المطلوبة .... شكرا على المشاركة

لم أفهم اختي

كل استاذ و عنده طريقة في التقييم وممن نطلب هذه الورقة هل من عميد الكلية او الدراسة والامتحانات .

انا في انتظار التفويض ، هل المطلوب رسالة تقول ان كيف الاستاذ قيم الطالب يعني الجزئي كذا والاعمال والنهائي ؟؟؟؟؟؟؟؟؟و أنا شهادتي من 2002 يعني حتى اغلب اللي درسوني تغيروا وحتى المواد تغيرت في الكلية

السلام عليكم
الحقيقة أختي أم رغد ربي يبارك فيك حتى انا ما فهمت شن هيا الورقة اللي تتكلمي عليها بالضبط رغم اني في كندا و قدمت على جامعات بس ولا جامعة طلبت مني ورقة زي اللي تحكي عنها يعني باختصار نظام النسبة المئوية الموجود في ليبيا و في كثير من دول العالم معترف بيه في كندا و ما يحتاج الموضوع لأي أوراق اخرى بس إفادتك و كشف درجاتك تحوي نسبة تخرجك وهما يعرفو كيف يحولوها ل جي بي أي ....و أصلا غالبا تلقي في متطلبات القبول الأكاديمي وهذا حسب اللي شفته ف مواقع الجامعات أقل نسبة قبول طالبينها بيش تقدري تقدمي على الماجستير او الدكتوراة لبرنامج معين و تكون بالنسبة المئوية يعني قليل ما يستخدموا في جي بي أي
مثلا في جامعة واترلو اذا تحبي تقدمي لدراسة الماجستير في الهندسة يجب أن تكون نسبتك في الجامعة لا تقل عن 75% او 3 بنظام ال جي بي أي بس اللي مذكور في الموقع بس نسبة 75%
هذا و الله أعلم

السلام عليكم؛؛؛

اني معاك اختي حنان نظام التقيم المئوي هو معروف عند اغلب الجامعات بس هني في اتاوا كل من جامعة اتاوا وكارلتون طلبوه عليا واني استغربت زيك وقلتلهم كشف الدرجات يبين كل شئ... واصلا قبل مانجي لكندا حاولت نجيب كل الاوراق اللي ممكن يطلبوها بس مكانش فيه الطلب هدا ..ولكن توا لما صارت معاي وخشيت علي الموقع نتاكد من انهم داكرينها من ضمن الركوايرمنت لقيت انهم بالفعل طالبين القريدنغ سكل ..طلب غريب شوية بس هدا اللي صار معايا وفي نفس الوقت جامعة كونكورديا قبلوني من غير مايطلبوها ! يمكن الجامعات الاخري ميطلبوش فيها .. بس حبيت ندكرها من باب الاحتياط

اختي فاطمة الورقة هادي مليهاش علاقة بالدكاترة اللي درسوك لما تطلبي كشف درجات اساليهم يعطوهالك ..يعني توضح نظام الدرجات المتبع في الكلية او المعهد او الجامعة اللي تخرجتي منها ...بالتوفيق

بالنسبة لجامعة بنغازي مذكور في آخر الكشف كل تصفية تبدأ من كم الي كم
بالنسبة للنقاط هل هذا كافي
ااو تقصدي المطلوب هو تقسيم الدرجات يعني الجزئي كم والنهائي كم والاعمال ؟؟؟؟؟؟؟؟
وبارك الله فيك ياريت كل واحد يتعرض لحاجة ينبه عليها الاخرين
شكرا على تفكيرك في غيرك وربي يوفقك
عندي سؤال اخر:
بالنسبة لرسائل التزكية هل ضروري نسخة أصلية مطبوعة وموضوعة في ظرف مختوم من الجامعة ؟؟؟؟

بالنسبة لرسائل التزكية اغلب الجامعات تطلب اسماء الدكاترة وايميلتهم وارقام تلفوناتهم وهما ايراسلوهم ويسالوهم عليك وفيه فقرة نبهوني عليها لما تبعي الابليكيش للقبول الاكاديمي يسالوك تبي تتطلعي شن قالوا عليك مدرسينك والا عندك ثقة في كلامهم الافضل تختار عندي ثقة فيهم لانها مرات تتسجل ضدك النقطة هده .

السلام عليكم؛؛؛

اختي فاطمة بما انه مدكور في كشف الدرجات كيفية حساب الدرجة فاتوقع هدا يكفي لان بالنسبة لوضعي مش مدكور في الكشف من كم الي كم تحسب النقاط ..فانتي في السليم .. اما بخصوص رسائل التزكية فحاولي تطلبي من كل دكتور 3 نسخ او اكتريكون افضل ويكونو في اظرف مسكرة وختومة بس اني مقدمتش الاصليات لانه مرات ميقبلوكش ويضيعو عليك الرسائل الي قدمتيهم ... فالافضل انه تطلبي من المكتب الكندي يديرلك نسخ من كل رسالة ويعتمدوها وتستعمليهم للتقديم ...ولو انهم(الجامعات) طلبو الاصليات توضحيلهم في ايميل انك رح تقدمي الاصليات في حالة انهم بيقبلوك لان رح تقدمي علي اكتر من جامعة وفي نفس الوقت كل دكتور يعطي علي الاقل 3 نسخ من رسائل التزكية ...في الحالة هادي مش رح يكفوك واستخدام النسخ المعتمدة من المكتب الكندي هو افضل حل ..اتمني اني نكون اجبت علي سؤالك ...بالتوفيق

أخت أم رغد بارك الله فيك على هذا الطرح الجيد وأود أن أضيف شيئ هو أن طريقة التغير المتبعة عندنا في ليبيا تعطيك معدل منخفض بينما هناك مكاتب في امريكا متخصصة في معادلة الدرجات ولو تمت عن طريقهم يزيد المعدل لأنهم ميدخلوش في كل المواد في التقييم هذا ماحدث مع صديقي والله أعلم