ما سبب التأخير من المكتب الكندى لرسائل الدعم المالي لغرض الفيزا

السلام عليكم ورحمة الله وبركاتة

كل عام وانتم بخير

لقد قدمت رسالة الدعم المالي لغرض الفيزا الى المكتب الكندي من تاريخ 3 أكتوبر وحتى الان لم أحصل على الرد

مند اسبوعين مضت بعث ايميل الى Anan المسئولة في المكتب الكندي على الطلبة الليبين الراغبين في الدراسة بكندا ولم اتلقى سوا Auto Reply

مند اسبوع مضت بعث بايميل أخر اليها وحاولت الاتصال بها بالهاتف فلم أجد الا اسطوانة ترد فبعت الى زميلتها Shanna ورد علي وقالت سوف تبلغ Anan وبعد حديت مطول مع Shanna قامت بالاتصال بـAnan بشكل مباشر ومن تم أرسلت Anan الي ايميل وفية طبعاُ اعتدار وانها يصلها مئات الايميلات يومياً من الطلبة الليبيبن. ولكن حتى الان لم أتحصل على شي.

سوالي هوا هل هناك طلبة مرو بنفس المرحلة فيى الوقت الحالي ولهم فترة طويلة على تقديميهم لرسالة الدعم لغرض الفيز والمكتب لم يرد عليهم حتى الان فقط اريد أن أطمئن انة لا توجد أية مشكلة معى ورقتي فقط.

السؤال الثاني هل يمكن التقديم على الفيزا بدون ورقة الدعم من المكتب الكندي مكتفياً فقط برسالة الدعم الصادرة من البعثات

مع جزيل الشكر

المكتب الكندي لا يعتد برسالة الدعم المالي إلا إذا كانت مرسلة من إدارة البعتاث مباشرة لكي يرسلوا إليك الدعم المالي...فالمفروض تمشي لإدارة البعتاث و تطلب منهم من شباك الصادر رسالة الإبراق اللي تخصك للمكتب الكندي ...فإن وجدت الرسالة قم بإعادة الإبراق في الدور الثاني ....و إن لم تجد الرسالة إمشي لمكتب الدعم المالي و أعطيهم صورة من الدعم المالي للتأشيرة و إيميلك و أطلب منهم رسالة الإبراق

السلام عليكم ورحمة الله وبركاتة

شكراً أخي العبسي ولكن الرسالة عندي منها نسخة وايضاً قمت بأرسالها الى المكتب الكندي

أم لازم تنبعث من إدارة البعثات

وشكراً

زاي ما قال الاخ المشكلة ان المكتب لكندي لا يعتد الا بالرسائل اللي جايينه عن طريق ايميل البعثاث الصبح تمشي لمشرف الساحة الكندية والافضل انك اتكلمي الموظفة هاجر واحكي الها باش تتأكد هل الرسالة وصلت انان او لا .. ولو انك اتصلتي بالتلفون والقيتي الاسطوانة جيبي حد لغته الانجليزية اكويسة وايتبع الخطوات اللي اتقول عليهم الاسطوانه راح اتحصلي انان بكل سهولة ... وعلى فكرة انان عربية

السلام علييكم ورحمة الله

شكرا أخي awity انا لغتي الانجليزية جيدة واتصلت بها وسبتلها رسالة وردت علي بالايميل ولكن لم تقل لى ان الرسالة لم تاتي من البعثات بالرغم من اني سالتها اذا كان هنالك مشكلة مع البعثات تخبرني وانا بامكاني الذهاب الى البعثات لحلها

هل هنالك اخرون قدمو ورقة الدعم المالي لغرض الفيزا خلال الشهر الجاري ولم يتحصلوا على رد



وشكرا للجميع

السلام عليكم ورحمة الله وبركاته
أخي انا بنعطيك الملخص لأني من شهر مريت بنفس المشكلة امتاعك
اولا وقبل كل شي يمكن الان التقديم بورقة الدعم المالي الصادرة من البعثات ومن تم الحاق الدعم الصادر من المكتب الكندي عند حصولك عليه

تانيا بالنسبة للمكتب الكندي التأخير مش منه تحديدا لانهم يرسلوا للبعثات يطلبوا منهم في كونفرميشن بانك موفد من عندهم (حتى ولو بعثت ورقة الدعم من البعثات للكندي) وأل ما يستلوموا الكونفرميشن من غدوا تلقا الدعم وصلك من المكتب الكندي ... طبعا اني تأخروا البعثات في ارسال الكونفرميشن ف اضطريت اني نمشي شخصيا وقعمزتلهم غادي لعند وصلوني في الشخص الي ارسل كونفرميشن مباشرة للكندي واليوم التالي القيت الدعم وصلني

ما تنساش تنقل معاك صورة من الدعم الصادر منهم


تحياتي

السلام عليكم ورحمة الله وبركاتة

شكراً أخي fared على هذة المعلومة وان شاء الله في ميزان حسناتك وكل عام وانت بخير



والسلام عليكم

اي تاخير يكون سببه البعثات يا ريته يحولوا البعثات ويحطوا مكانهم المكتب الكندي صراحة مرتبين وتهمهم مصلحة الطالب مش زي البعثات اني المنحة اخروها شهر بسبب البعثات مابعتش التاكيد للمكتب الكندي لين كلمنا بوي امشي للبعثات وبمجرد ماوصلهم التاكيد نزلولي المنحة

السلام عليكم ورحمة الله وبركاتة

شكراً يا أختي حوحو وان شاء يوم الاثنين سأذهب الى أدارة البعثات ونتاكد من Confirmation و أن شاء الله خير

شكراً للجميع

والسلام عليكم

كل عام وانت بخير اخيabkfx
انصحك انك تمشي تشوف وكالة وتجيبلك قبول لغة وتريح راسك خير ما تقعد تستني في الرسالة اللي ميش راح تجيك من المكتب الكندي لان المكتب الكندي راح يدزلك رسالة علا الساس ان وراقك تحول للمدير وسوف يتم ابلاغك بالمستجدات
شوف قدام لابعتات اكيد تلقي وكالة قبولات وربي يوفقك

القبول مش مشكلة ... حتى ابروحك تقدر اتديرة ولما توصل الى كندا اذا ما عجبكش المعهد تمشي لأي مكان اني القبول امتعي درتة ابروحي وحصلت من 3 جهات قبول ... المشكلة ان المكتب الكندي ما يعتدش الا بايميلات البعثات واول ما تبعث انت حاجة هما ايحولوها للبعثاثا هل هالكلام صحيح او لا ....صديقي قعد هنا اكثر من شهر بدون المنحة وكلمت انان بشكل شخصي قلن الها بعثنا الكم برقية بداية الصرق ورقم الحساب وختم الدخول وين المشكلة قالت اذا ما بعتتش البعثاثت البرقية فأن البرقية اللي احنا بعثناها لا قيمة لها اضصرينا نبعثو حد للبعثاثت ومشت الامور بسلام والحمد لله ... دير بالك تطلع من ليبيا بدون ما اتفهم حد بعدك شن ممكن ايدير

يعني الواحد ما يطلعش من هني الا ما يتاكد ان اوراقه وصلت غادي



بالنسبة لرسالة الدعم لغرض التاشبرة , نعرف زميل ليا قعد شهرين يستنى فيها من المكتب الكندي

السلام عليكم ورحمة الله وبركاتة

بالنسبة الى الفيزا الى كندا يمكن التقديم عليها بالرسالة المتحصل عليها من إدرة البعثات + صورة من رسالة الابراق وممكن فيما بعد الحاق رسالة الدعم المالي لغرض الفيزا المتحصل عليها من المكتب الكندي.

بالنسبة الى الانتظار الطويل للحصول على رسالة الدعم من المكتب الكندي يعتمد على رد التأكيد من إدارة البعثات(يعني لازم تمشي الى البعثات باستمرار وتطلب منهم الرد على المكتب الكندي ).

بالاضافة الى ذلك بمجرد حصولك على رسالة الدعم المالي من البعثات عليك تعبيه نموذج طالب من خلال موقع المكتب الكندي https://web.cbie.ca/sm/app_nominee.html

وذاّا تعثر ارسال الملفات الملحقة بمكان تعبة وارسال الابليكشن ثم ارسال الملفات الي Nominee.ca@cbie.ca ونسخة اخري الى انان aterhi@cbie.ca لفتح ملف خاص بك في المكتب الكندي

هذا للفائدة والله أعلم

وشكراً

زي ما قالوا الاعضاء , هذا يعتمد على التاكيد من البعثات , اني وصلني الدعم من المكتب الكندي و لم اتحصل على رسالة الدعم لغرض التاشيرة بعد


راسلتهم من قرابة شهر لعدة امور, ما جاوبوش عليا , الا بعد ما ما جاهم التاكيد من البعثات , و توى لما راسلتهم جابوني على طول



بالتوفيق

لو سمحتو في السفارة هل رسالة الدعم المالي من المكتب الكندي لازم اتكون الاصلية و الا حتى صورة اوكي ؟؟؟

اختي هيفاء هما راح يبعثو هلك عالايميل بالتالي مافيش صورة اصلية اصلا بتسحبيها عادي و تقدميها

لعلمك هما يبعثو لك صورة وللسفارة صورة والسفارة عندها صورة حتى من القبول امتعك ... لما اتجي للمقابلة تلقى اسمك قدامك ... سأله صديقي قال شن المعلومات اللي عندكم عني ضحك وبأمانة قال له اللي تتوقعه واللي ما تتوقعاش موجود عنك اهني في السفارة

اتا الحمدلله مافعدتش اسبوع من مراسلتي ليهم وتعبئة التموذح وبعت الاوراق بعتوها طول واي استفسار يجاوبو

بارك الله فيكم عالمساعدة .... اني سألت لان في سفارات بعض الدول تطلب فـ ورقة السبونسر ليتر الاصلية ...

الدعم المالي من المكتب الكندي اطبعيها من الايميل بس الدعم المالي للفيزا يلي من البعثات ارفعي الاصلية