مساعدة بخصوص بطاقات الائتمان

السلام عليكم ورحمة الله وبركاته .... في البداية تحية للجميع المشاهد والمساعد
الجميع يعلم ان حجز فندق في بلد الدراسة(بريطانيا مثلا وهي بلد دراستي) عن طريق النت قبل الوصول افضل وارخص وانا هكذا قررت .
طبعا اني اجراءاتي باذن الله تعتبر قريب تكمل ........ واليوم قررت ناخذ بطاقة من مصرف التجارة والتنمية... اخبرني الموظف ان المطلوب صورة الجواز وطلب و50د.ل وتنتظر من عشرة ايام الى اسبوعين كحد اقصى.
المساعدة المطلوبة:اني ربما اسافر خلال اسبوعين والوقت المتاح للحصول على البطاقة طويل ولايساعد ...... فهل يوجد حل اخر في نظر اخوتي الاعضاء يساعدني ويحل مشكلتي بشكل اسرع في حجز الفندق.
تحياتي للجميع

خوي محمد لو سمحت انت تبع اين تفويض ؟ وياريت عندي معلومة عن موضوع الأئتمان راني كنت ساعدتك وربي يوفقك والجميع

بارك الله فيك خوي الحكم...... اني تفويض 17 ...لكن متفاءل خير هلبة بعد مطر يوم الجمعة ....... لاني توقعت اسبوعين على الاقل طبعا مش على الاكثر

يا اخ محمد انا نتعامل مع موقع Booking.com خش عليه وشوف الهوتيل اللي تبيه المهم يكون الحجز Free Cancellation ممكن نحجزلك ابعتلي الاسم واللفب والايميل وانشاء الله بس يقبلوا بطاقتي

اللهم يسر امرنا وحتى اوخيك متفائل وبادي نشري في الحوايج ليه ليه مازال الشناطي وحاجات تانية بسيطة وإنشاء الله انسافروا في ضرف اسبوعين آآمين

مشكور خوي البلعزي ......... باذن الله اول ماناخد اذن الصرف من البعثاث حنراسلك ونعطيك اسم الفندق

يا حكم رد بالك تنسى الحداد او المكواه قالوا مهم حتى هوا...... واي بلد ماشي انشاء الله

ماشي لبريطانيا بإدن الله

يا كراخلي الموعد حتى تقريبيا عادي لان ال Free Cancellation ممكن تغير موعد الحجز او تلغيه قبلها ب24 ساعة المهم توا دور على هوتيل يناسبك عالموقع الل قلت عليه Booking.com وقت واخر حاجة ياكراخللي بطاقتي اتطيح في نهاية شهر 11 وطبعا خوك في ليبيا والبنك فبريطانيا يعني باش تتجدد تبي شهور يعني ياريت اليومين هادوا باش ما نتحشمش معاك وان شاء الله بالتوفيق

انشاء الله خوي البلعزي نشوف الفندق المناسب ونراسلك..... وعمي الحكم اني نفس بلدك بريطانيا ... مرات نفس الطائرة...موفق انشاء الله

اللهم لا حسد وانا مازال

ربي يسرلك حتى انت يامحمد جنتل

ياخوي البلعزي اني شفت الموقع .....لكن في فرق كبير بين الاسعار في موقع الفندق والاسعار في الموقع .......فمثلا ايجار غرفة بفندق oak vill hotel وهو فندق بمدينة ليدز في موقعه مكتوب من 30_45 وفي الموقع 69......... نتمنى منك توضحلي لاني خلفيتي ناقصة نوعا ما............. وهذا الفندق هو وجهتي باذن الله لانه الاقرب لمعهد اللغة الخاصة بي.

السلام عليكم أخي محمد كراخلي . بالنسبة لموضوع بطاقات الأتمان فعليك الذهاب الي مصرف الأمان الرئيسي الموجود في منطقة قرجي و تأخذ معك صورة من جواز السفر و عدد 2 صور شخصية ورسالة من جهة العمل أو القوى العاملة التى في مدينتك . ثم تدخل المصرف وفي الدور الأرضي تسأل عن شخص اسمه "فيصل أبو فارس "وهو شخص خدوم بارك الله فيه واحكيله على ظرفك الخاص . وستحصل على البطاقة في اليوم التالي ان لم أقل أنك ستحصل عليها في نفس اليوم . أنا عن نفسي قال لي هذا الأستاذ اصبر عند نهاية الدوام أو تأتي غدا و تأخذها . وبالفعل جئت اليوم التالي و أخذتها وشكرا ....

شكراً على المعلومة ، والله شجعتني حتى آني بنمشي نديرها ، مع آني مجهز الآوراق منذ فترة ، وربي يكثر من هادوا الناس الخدومة الطيبة زي السيد فيصل أبوفارس جعل الله له ذلك في ميزان حسناته !!!

بارك الله فيك خوي عبد الله

ان شاء الله موفق خوي محمد وتوصل بالسلامة

-----------------

مشي بالكارطة لين يوصلك البلي ستيشن

ههههههههههه

ِAbu Mohamed كتب:

لا كراخلي مش لازم تجيب معاك مكواة عير تدخل عليك راهو فيه ورخاص هنا كثر بس من القديد والزميطة.

اييييييييه بالله.....الله يرحم ايامات الزميتة والقديد يا خوي محمد

ياشباب كيف نعرف مواعيد الصلاة والقبلة لما نمشي لبريطانيا إن شاء الله من عنده فكرةعن الموضوع وشكرا

الحكم كتب:

ياشباب كيف نعرف مواعيد الصلاة والقبلة لما نمشي لبريطانيا إن شاء الله من عنده فكرةعن الموضوع وشكرا

http://www.almofad.com/t13001-topic

ان شاء الله الموقع يفيدك

جعله الله في ميزان حسناتك

خوي كراخلي و قالحكم حتى اني متفائل هلبا وعندي قصة القبول لأنه آخر موعد 1/12/2012 وكلمتهم معهد اللغه قلتلهم نبي نغير17/12 قالولي حاضر لكن مبعتوليش ما يفيد وفي اللي قالي ضروري القبول ساري المفعول للدخول لبريطانبا .. اللي عنده معلومه بفيديني جزاكم الله خير
شباب امش شوفت في النت ان الخطوط الليبيه بيديرو اضراب من يوم 12/1 .. مالقصه؟؟؟
عسل النحل في فبريطانيا؟؟ ورخيص؟؟ والا نرفعو من ليبيا؟؟

اللهم لا حسد ههههههههههههههه سامحوني فيها لكن سفهتوني شوية وان شالله كل شي بالبركة