السكن مع عائلة

السلام عليكم
اني راسلت معهد كابلان بيش ايتمولي في سكن مع عائلة لمدة شهر بس و قالولي المبلغ 1180 دولار و حاير نقبل ولا نفوتهم ... بالله يلي قاعدين في كندا حاليا شني تنصحو انتم معاهم و لا يعتبر سعر غالي

الحق نحس فيه غالي لان نذكر صديق زوجي كان ساكن مع عائلة ب 600 او اكثر شوية لو مش غالطة

ماهو حتى اني قلت هكي السعر هدا مقارنة مع يلي انشوف فيه في المواقع نار يعتبر .... الا اذا كان ماستر روم و حمام خاص و نت و 3وجبات هكي ممكن غيرها يبقى ضحك

اني عندي صديق يدرس في معهد في اجلينتن تورونتو ساكن مع عائلة ب 800 مع وجبة الفطور والعشاء وجدا الراجل مرتاح ويشكر في المعاملة والنظافة

اليوم ردو علينا اني و صاحبي و قالونا 1180 هدا اجار سكن فقط .... تي هديما انصابة بالرسمي ..... مش عارف الحق نبي نسكن مع عائلة في البداية بس سعر هكي يعتبر هلبة الحق .... مش عارف شني رايكم ناخد في فندق لين نحصل و قديش اسعارها الفنادق ... اني لقيت كم عرض في النت بس ما نقدرش انتم في ليبيا ... اذا كان حد يقدر ايعاونا يبقى مشكور جدا

اتفضل يا خوي شن تبي اندير لك حاضر .. ان شاء الله اذا جاي تورونتو انساعدك قدر ما نستطيع ... خود فكرة اهني كل شي بالفلوس بس توصل واتعامل الناس تبصم ان الليبيين شعب مختلف

الله ايبارك فيك و شفت الشي هدا لما كنت في بريطانيا الليبيين يوقفو مع بعض واجد ,,,,,,, بالنسبة للفلوس مافيش مشكلة بكل بنجيب معاي مبلغ ان شاء الله .... لكن ما نقدرش انتم في سكن من هنا لان زي ما انت عارف لازم السكن ينشاف و المكان و القرب علي المدرسة....... القيت فندق قريب عالمدرسة انخمم نحجز فيه 7 ايام لين انرتب اموري اسمه Hilton Garden Inn Toronto Downtown
,لا شني تنصح انت يا خوي
اني طيارتي يوم 6 الشهر الجاي و يوم 7 نكوت غادي ان شاء الله

قداش الفندق قالو لك في الليلة ... وثاني حاجة بالفعل ما اتكملش لعند ما توصل اهني ... بعدين ممكن اتغير حتى المعهد واتشوف لك معهد ثاني ايوفر لك اقامة مع عائلة والسعر ايكون ممتاز اني بالحق ما نعرفاش معهد كابلان بس سامع بيه ... انت بس ربي ايوصلك بالسلامة وبعدين لكل حادث حديث

خشيت ع الفندق توا اعتقد ان غالي اشوية بس فعلا هو في قلب البلاد ... المهم فكر اذا تبي مساعدة مستعد انجيك حتى في المطار ... فكر وقول لي

تسلم يارب بارك الله فيك خوي .... خلاص بكرة انشوف كيف ايصير مع الوكالة و نقولك كيف ايصير
مشكور واجد

بالنسبة للسعر مش قصة اني جاي اني وصاحبي ناخدو غرفة بسريرين كبار و تمت تطلع مهناك شي التكلفة

ربي ايعينك ان شاء الله

تسلم الله ايبارك فيك

السلام عليكم اخوتى الكرام اريد نصائحكم
ايهما احسن سكن مع العائلة منسقة من معهد القبول ام سكن فى الحرم معهد او الجامعة ام اجار شقق ؟ وهل توجد شقق فنادق او ابارمنت قريب من معهد اللغة بجامعة تورنتو ؟
وايهما ارخص

السلام عليكم اخي الاتيوش ربي يوصلك لكندا بالسلامة معليش بتسالك هل بتمشي على حسابك التذكرة والا عحساب التعليم العالي ولو عحساب التعليم هل عقدوك وعطلوك في الاجراءات وشكرا

الافضل السكن مع العائلات التي يختارها المعهد ... لآن في اي وقت ما تعجبكش العائلة اتغير بس بالنسبة لتورونتو فيها 50 دولار اكثر من انك اتأخر بنفسك ... هذي معلومات اخديتها من طالب ليبي امعاي في المعهد في تورونتو