رسالة بداية الصرف

السلام عليكم..

صاير معاي موضوع!! على قولة خونا عزالدين

الموضوع باختصار ان الكورس امتاعي كان يبدا في شهر واحد وليا 6 شهور نجري ع الاجراءات لاكن نظرا لان لاحترام وقتنا الزايد في اجراءات الدولة اضطريت اني انأجل على شهر 4

طبعا لما قدمت على التفويض قدمت بتاريخ شهر واحد وتوا طلعت في تفويض 23 وتاريخ رسالة بداية الصرف 01-01-2013

طبعا اني بعد ما اجلت متوقع اني نمشي في بداية شهر 3 بيش انظم اموري وانتعود ع الجو غادي قبل الكورس وعندي بليسمنت تست يوم 25-03-2013

الفكرة توا انه من شهر واحد واني بنمشي شهر 3 اكتر من شهريين ضايعيين ومش عارف شنو الاجراء الصحيح بالنسبة لوضعي

هل نمشي على هكي وغادي انسوي مع الملحق الثقافي او انه ربما ايكون في اجراء تغيير بداية الصرف من هنا قبل نمشي


ارجو من كل من مر بظرف مشابه ان يفيدنا


وبارك الله فيكم

باهي خوي حصلت التذاكر منهم؟ لو ماحصلتهمش تقدر تسنثمر الوقت وتحصلهم

ايه اختي اني مادام الكورس مازال عليه اكيد بنأخد التداكر منهم بس علامة الاستفهام هي في تاريخ بداية الصرف وفي موعد سفري المتوقع حيث ان في من يقول ان المفروض اتسافر واتم اجراءاتك في حدود شهر من تاريخ بداية الصرف

ما عليشي حتى تكون الأمور واضحة ،،، الرسالة اللي عندك متع الخزانة وإلا البعثات ؟

البعتاث اكيد خوي بحكم ان تفويض 23 مازال ماوصلش للخزانة

ياريت أخي الكريم تزيد توضح باش تحصل إجابة واضحة من الأخوة الأعضاء ،،،

أنت قلت أنك في تفويض 23 ، وقلت أنك استلمت برقية بداية الصرف من البعثات ،،، وبعدين قلت أن تفويض 23 ما زال ما وصلش للخزانة ، وهذا الكلام يتنافى مع بعضه ،،، لأنك ما تقدرش تاخذ برقية بداية الصرف متع البعثات إلا بعد ما يتحول التفويض للخزانة وتجيبلهم برقية الخزانة (أقصد البعثات) ...

لا يا خوي اني لما شفت اسمي في القوائم فيه من ظمن البيانات تاريخ بداية الصرف وتقدر تتأكد من القوائم في المنتدى

باش ترتاح اكثر تاريخ بداية الصرف يكون بالنسبة ليك من 1ّ يناير او من تاريخ الوصول .. ارجو ان يكون الرد واضح

ياخوي وضح الله يستر عليك "او" هدي صعب تأويلها!!!!

يعني هل بداية الحساب تبدأ من الوصول غادي فقط؟ بمعنى ان الشهرين الي بيضيعو هنا ما ايأتروش على المدة الكلية ؟؟

نعم أخي الكريم ،،، حسب ما فهمت من كلامك أن القوائم اللي تعلقت مكتوب فيها بداية الصرف 1/1 ، إذا كان فهمي صحيح ، فالموضوع عادي وما فيش أي مشكلة ، والتاريخ اللي في القوائم ما ياخذوش عليه ، وأنت حالياً وضعك كويس وما عندكش مشكلة إن شاء الله ،،،

الإجراء كما يلي ... لما تسمع بالتفويض وصل للخزانة ، إمشي استلم النسختين متعم من برقية الحزانة احتفظ بالنسختين ، لما تقرر السفر إمشي للبعثات قبلها بأسبوعين وأعطيهم نسخة من برقية الخزانة باش يديروالك برقية بداية الصرف ،،،

فمثلاً ،،، لو أنت قررت تسافر في بداية شهر 3 القادم ، عندها برة للبعثات يوم 17 أو 18 من شهر 2 وارفعلهم برقية الخزانة ، وقوللهم أنك نبي تاريخ بداية الصرف من 3/1 ، بعدين هما يديروا البرقية بالتاريخ اللي طلبته وما فيش مشكلة إن شاء الله .

هذا الكلام حدث معي شخصيا ،،،

بالتوفيق أخي الكريم !!!

كلام منطقي جدا وحل سليم اخي

بارك الله فيك وسدد خطاك ويسر امورك

تحياتي

وفيك بارك الله أخي الكريم ،،،

ومرة اخرى نقولك موضوعك ساهل وبسيط وما فيش مشكلة إن شاء الله ,,,

موفق إن شاء الله !!!