الحمد لله واخيرا السفر يوم الاثنين من طرابلس الى المانيا ومنها في اليوم التالي الى فانكوفر كندا

السلام عليكم
الحمد لله رب العالمين
واخيرا بعد معاناة تفويض 23 طلعن التذاكر وحجزت على يوم الاتنين عالخطوط الالمانية يعني ترانزيت على المانيا والوصول لكندا يوم التلاتاء صباحا
المهم نبي النصيحة يعني اول مانوصل شنو الخطوات المهمة الاولى
اي مصرف كويس نفتح فيه حساب واي شركة اتصالات ناخد منها شفرة ومن وين تصريف الفلوس نرفع دولار امريكي او كندي معاي والكندي وين نلقاه وهل موجود في مطار طرابلس زي ما قالولي او نمشي نتأكد قبل
نحجز فندق من هنا او بعد الوصول لان اني كلمت المدرسة الي ماشيلها ردو عليا قالولي الوقت ضيق وصعب نلقولك حجز كويس بس ممكن يبعتو حد يستقبل في المطار ومعاش ردو عليا
المهم يا ريت لو في حد ينصحني بأي حاجة
وبارك الله فيكم جميها وفي المشرفين عالى منتدى الموفد وان شاء الله ربي ايقدرنا وانا انساعدو اي شخص زي ما ساعدنونا اعضاء المنتدى

ان شاء الله بالتوفيق حتي انا انتظر في التاشيرة وماشي لفانكوفر
معليشي يا خويا نبي نسئلك علي المدة يلي خداها التفويض بيش طلع وكذلك التداكر ؟؟؟
وبالنسبة للتذاكر هل انت تحدد الخطوط والدراجة ولة هما يلي يحجزولك بمعني هل ممكن تتواصل معا مكتب الحجز مسبقا بيش يغيرولك الدرجة من عادية الي اولي وتدفعلهم الفرق ؟؟
ولك جزيل الشكر

السلام عليكم
مرحبا خوي moh_te
بالنسبه لوقت التويض بيش طلع من لما حطيت ملف التفويض عتد المندوب خدي تقريبا 50يوم بس في العادة ما يخدش الوقت هذا لان اني في تفويض 23 وهذا صارت فيه مشكلة نهاية السنة والميزانية وان شاء الله الخير في الي جاي
وبالنسبة للتذاكر تحجز انت عالخطوط الي تبيها والدرجة لو تبي اتعدلها ماعندهمش مانع بس في حاله الفرق انت تدفعه وحاجة تانيه التذاكر هما يصدرو ذهاب فقط لو انت تبي الاياب ايقولولك عالفرق وانت تدفع
يعني كانك انت ماشي لاي مكتب سفر وسياحة وتحجز انت كيف ما تبي بس في حالة زيادة الفلوس اكيد انت الي حتدفع

ربي ايوصلك باسلامة ... احسن مصرف هو TD والشركات امتع الاتصالات خود يا اما شركة chater او شركة wind او شركة mopilicity هذي شركات صغيرة وممكن تستخدم ولما ما تعجبكش ترميها ... والافضل انك تحجز من غادي لآن الحجز اولاين ارخص ... اما الدولار جيب امعاك الامريكي وبمجرد تفتح حساب حط فيه الامريكي يتحول لك كندي على طول والمصرف يطلب في رسالة القبول خلاها امعاك باش تفتح الحساب ... للعلم هذي المعلومات اللي اني نعرفها في كل من مونتريال وتورنتو ارجو ان تكون فانكوفر كذلك وفيه شركة اتصالات ثانية هي puplic ممكن تجد اخطاء في الحروف بس قريبة جدا ... اخر نصيحة اقرأ في معهد الجامعة

اضافة ما اتصرفش هلبة لما توصل للمطار يكفي 200 او 300 لحتى تفتح الحساب

السلام عليكم
بارك الله فيكم خوتي وان شاء الله في ميزان حسناتكم شكرا جزيلا
وربي ايعاونكم في دراستكم و امتحاناتكم وان شاء الله بالتوفيق للجميع