منقول من صفحة 17 فبراير سبها
يقال من علمني حرفا صرت له عبدا بس اللي صار معاي من علمني حرفا سرق مني حلما....بنتكلم بالفلاقي باش نفهمو بعض (
اسمي اروى الحاجي خريجة سنة 2009-2010 جامعة طرابلس كلية الصيدلة .. مشروعي كان في قسم الكيمياء الطبية تحت اشراف د ابراهيم مريمة .. تحت عنوان
Isoniazid Metabolism Monitoring in Libyan patients using HPLC Method
... كان عبارة عن دراسة ما اندارتش في ليبيا بكل و أنا درتها كأول دراسة و بفضل الله نجحت في تطبيقها .. لما نجحت الدراسة عشموني دكاترة القسم بأنها بتنزل في بيبر و بيعتمدوها عشان يكملو عليها بعدد اكبر من العينات .. و صارت الثورة و تحررت البلاد و فات وقت على الكلام هدا و بعد التحرير تفاجأت أنهم نزلو المشروع من غير كتابة اسمي و حطو اسماءهم ( د عمران فهيد , د طارق المق , د ابراهيم مريمة , د عبد الفتاح قاباج , علي التواتي ( دكتور باطنة في مستشفى بوستة ) ) للاسف الشديد ( سُرق ) من نفس الدكاترة اللي شاهدين على شغلي و تعبي على المشروع و هما عارفين ان هدا كان حلم ليا مش مجرد مشروع تخرج . ... لما شفت الدراسة نزلت من غير اسمي مشيت للكلية تلاقيت مع د طارق المق و د صلاح بن صابر كنت نبي نعرف علاش مانزلش اسمي و انصدمت الصدمة التانية لما لقيت د بن صابر واقف معاهم ضدي على الرغم ان اسمه مش مكتوب معاهم بس هو كان اكتر دكتور شاهد على شغلي في المشروع ..و ايضا نكرو ان أنا خدمته كله و تعبت فيه .. بس ربي شاهد عليا انه أنا كنت بروحي نجري بين مستشفى بو ستة للامراض الصدرية و سحبت عينات دم و فصلتها لبلازما و رفعتها من طرابلس للزاوية في مركز الابحاث الطبية و درت اتش بي ال سي بمساعدة التكنيشن و بعدها خدمت في الاسيتايلاشن في معامل الكلية .. المشروع خدي مني وقت وجهد لمدة شهور تقريبا 6 شهور و كان الضغط كله عليا تقريبا و ما حد منهم تعب ربع اللي أنا تعبته و للأمانة هما ساعدوني بس باشياء بسيطة جدا جدا جدا و في الاخير ينزل من غير اسمي و يقولولي لا المشروع عبارة عن تخرج و خلاص مليكش علاقة حتى كلمة طيبة تمص غضبي و حرقة دمي ما سمعتها منهم بالعكس كان كل كلامهم اتهام و تسفيه شغلي و تقليل من قدري ... المشروع كان زي الطفل اللي حلمت بيه و ربيته و كبر و خدوه مني من غير وجه حق !!!!
هادي قصتي باختصار
