الاخوة اللي تحصلوا على التاشيرة الامريكية

السلام عليكم

الاخوة اللي داروا المقابلة وتحصلوا على التاشيرة الامريكية ياريت اتقولنا شني الاسئلة اللي سالوها ولو كان عندك رفض من دولة تانية لازم اتقول عليها

شكرا

بانسبة ليا كانت الاسئلة شن بتتقرا علاش اخترت الجامعة هدي بدات شن تخدم ادا كان عندك رفض لازم تقول عليه

السلام عليكم و رحمة الله و بركاته ،

لو سمحتم نبي نستفسر عن المقابلة للحصول عالتأشيرة الامريكية ، هل في حالة الرفض يقوللك انك مرفوض في نفس يوم المقابلة او مرات يقولك راجع موقع السفارة من بعد أسبوعين لشهر و دخل رقم جوازك و تو احني نتصلو بيك لو طلعت التأشيرة و مش لازم تجي انت و المرافق ممكن واحد منكم بس يجي و يجيب معاه الجوازات و بعدها تعرف انك مرفوض ؟؟

amerspace كتب:

السلام عليكم

الاخوة اللي داروا المقابلة وتحصلوا على التاشيرة الامريكية ياريت اتقولنا شني الاسئلة اللي سالوها ولو كان عندك رفض من دولة تانية لازم اتقول عليها

شكرا

بالنسبة لتجربتي كانت المقابلة جدا ساهلة ومدة الاسئلة لم تاخذ اكثر من 5 دقائق ممكن دقيقتين سئل في البداية بالعربي وثم انجليزي سأل
متى تخرج من الجامعة
شنو تعمل واخبرته اني معيد في الجامعة
وين تبي تقرا
ومتى تزوج
واما المرافق وهي زوجتي لم يسالها فقط بصمت

ولكن للمعلومة تسلم الاوراق في الشباك الاول وتدفع ولازم يكون معاك المبلغ دون تصريف وتنتظر وانا يوم المقابلة انتظري واجد ققربي 3 ساعات
وشكرا

وبالنسبة للموضوع الرفض لو ما فيش حاجة باينة في الجواز السفر ,كان تتبع راي ما تحكي عليه كانه ما صار شي دون ان تكذب وشكرا

السلام عليكم جمعيا ،،
سأروي عليكم قصتي مع التأشيرة الامريكية من تونس
في بداية شهر مارس سنة 2013 كان موعدي في السفارة الامريكية بتونس لغرض الحصول على التأشيرة f1 وذلك مع زوجتي وأبني
ما هي الاوراق المطلوبة:-
1 جواز السفر
2 ورقة SEVIS
3 ورقة تأكيد تعبئة النموذج D 160
4 صورة شخصية عدد 1
5 مبلغ 250 دينار تونسي
6 I 20
ملاحظة بالنسبة الي نفسي ترجمت كل الاوراق المتعلقة بي ونقلتها معي بما في ذلك كتيب السيارة والشهادة العقارية وكشف الحساب وكتيب العائلة وغيرها.
ملذا حدث في المقابلة ؟
تم النداء علي من الشباك رقم واحد وطلب مني االمستندات الستة السابقة .
بعد ذلك تم النداء علي من الشباك رقم 2 لأخذ بصمات اليدين
بعد ذلك تم النداء علي من الشباك رقم 3 وسألني الموظف الاسئلة التالية :-
ما هي الولاية التي ستذهب اليها
كم المدة التي ستبقي فيها
طلب مني رؤية دعم التاشيرة الصادر عن البعثات ؟
ثم قال لي أرجع غدا لاخذ الجواز مع التأشيرة
أهم النصائح :-
1 نقل دولار مع عملة البلد التي انت فيها
2 اهم نقطة واعتقد انها السبب في منحي التأشيرة هي الدقة في تعبئة النموذج D160 وخصوصا الخانة المتعلقة بخطة السفر من حيث تاريخ الوصول وتاريخ المغادرة
ولاي استفسارات تفضلوا للاتصال بي على :-
bredanf( عفوا, يمنع نشر البريد الإلكتروني, استعمل الرسائل الخاصة )
0919289358
مع تحياتي ونمنياتي لكم بتخطي هذه المرحلة

السلام عليكم
انا قدمت علي التأشيرة نصف شهر 2 الامور واضحة وبسيطة وسهله جدا جدا اهم شي لما اتعبي الابلكشن امتع الموعد وللعلم عبيتها انا وصديقي ومش مشكله كبيره المهم الاسئله جدا بسيطة وين تشتغل امقدم علي قبول لجامعة اخري غير الي انت امقدم عليها وليش اخترت الجامعه هدي وحاجات هكي جاوب بصراحة ومتكدبش بلنسبه للرفض ادا سألوك قول وخليك صادق وادا مسألوكش مفيش داعي اتقول اي شيء مش مطلوب منك علي فكره في حاجة مهمه جدا الي هي دعم التأشيره دير بالك تنسها هدي ديما يطلبو فيها وعلي اساسها بيعرفو انه الدولة هي الي بتتحمل المسؤلية لمصاريفك لان اخر سؤال ليا كان من بيتحمل مصريفك وكانت اجابتي الحكومه واعطيتهم دعم التأشيرة تمنياتي للجميع التوفيق ومتخافش الامر ابسط مايكون لانك طالب

ســــــــــــــــــــــــــــــــــــلام

السلام عليكم ، في البداية حاول تجي قبل الميعاد المحدد بربع ساعة تقريبا وبعدين أول أول ما تدخل السفارة يتأكدوا من الميعاد ويعطوك رقم ويطلب منك الجلوس في صالة الأنتظار وبعدين ينادوا على الرقم وتذهب للشباك واللي هو عبارة عن الخزينة وفيه يطلب منك:
1. صورة من الأي توينتي ( وليس I20 الأصلي ) 2. صورة من وصل السيفيس
3. 160 دولار 4. صورة شخصية 5. جواز السفر
ويسألك تبي المقابلة بالعربي ولا بالأنجليزي ومع أني طلبت المقابلة بالعربي إلا أن المقابلة كانت كلها بالأنجليزي ولكن كلها كانت أسئلة تقليدية.
وبعدين يقولك تنتظر شوية وبعدها ينادوا عليك في شباك أخر ويطلب منك أنك تبصم ألكترونيا ( البصمة العشرية ) ولو معاك زوجتك تبصم هي الأخرى وبعدين تنتظر لعند ينادي عليك الشخص اللي حيدير معاك المقابلة وبعد ما نادي عليا ، سالني
بالنسبة لي أنا نادى علي الشخص وسئلني عليش ماشي لأمريكا وشنو تشتغل في ليبيا وشنو المجال اللي أدرس فيه وبعدين سئلني عن ما يثبت دعم الدولة لي يعني يقصد رسالة دعم التأشيرة ( VISA SUPPORT ) وبعدين سألني من ماشي معاك من المرافقين ولم يقم بسؤال أي أحد من المرافقين وهذا كل شئ بالضبط من تاحية المقابلة، بعدها قالي تعال تأخذ التأشيرة بكرة ما بين الساعة 1 : 2 ظهرا ، مع العلم بأن المقابلة خدت تقريبا عشر دقائق ومن أول دخولي للسفارة لعند خروجي خدت جميع الأجراءات أخذت ساعة تقريبا والله ولي التوفيق
خلال المقابلة لم يطلب مني أي ورقة مترجمة ولا أي من الشهادات ، فقط دعم التأشيرة

السلام عليكم
هذه تونس كانت متساهلة مع الجميع لكن الله اعلم على المغرب او الحزائر كيف اتكون ؟

حفصه بنت ابي حفص