السلام عليكم
المفروض على الوزارة حاليا تفكر في الطلبة اللي قاطعين عليهم المنحة لمدة شهرين بدون سبب مش كيف اتدير استبيان
انا عن نفسي قراري صادر من التعليم العالي مستمر في دراستي للدكتوراة وتقديري ممتاز ومازال عندي الحق في تسعة شهور مع تمديد لمدة سنة لكن للاسف الوزارة قطعت عني المنحة بالظلم
قبل ما تفكرو كيف تتخلصوا من المكتب الكندي واختلاساته فكرو في حال الطلبة واصغارهم وفي الايجار اللي مش قادرين يدفعوه
ياناس والله العظيم حرام عليكم حسبنا الله ونعم الوكيل فيكم
باهي كان تبوا تقطعوا المنحة على الاقل قولولنا على السبب ليش اقطعتوها ياسيدي اعطونا علم مسبق على الاقل اندبرو روحنا رانا في غربة رانا ابعاد عن ليبيا حتى الرجوع بصغارنا ماهو بالامر الهين صغارنا وراهم قراية لعند نهاية شهر يونيو
باهي لو سلمنا وقلنا ان المكتب الكندي مخانب ويسرقوا في ليبيا وثرواتها ونصدقوا انكم ياخبراء التعليم العالي انكم تفكروا في مصلحة الوطن اوكي على الاقل ادرسوا الموضوع وشوفوا تبعياته قبل ما اديرو هالخطوة المباركة وتقطعوا المنحة
الان حوالي 58 ظالب في كندا ويعلم الله قداش منهم في امريكا من غير منحة ومش معروف ليش
خاطبنا المكتب الكندي قالوا ما نعرفوش السبب اوارقكم عند الوزارة واحنى ماعد نعرفوكم وما عندكم شئ عندنا لين الوزارة ترد علينا بخصوصكم ياعليك حالة حتى الكندين فسد طبعهم لما عاشروكم, اللي نعرفه على الكندين والقانون الكندي حتى الموظف لما يتسغنوا عن خدماته يعطوه نسبة 60 في المية من مرتبه لمدة سته شهور باش ايدبر روحه مش ايقولوه دونك والشارع
يا أخ احمد ويا وزير التعليم اتقوا الله راكم مسلمين المفروض انتم قدوة وليس من الائق مقارنة افعال الكافر بالمسلم لكن الله غالب انتم اللي خليتونا انقارنوا
بدل ما تفكروا في الناس اللي شردتوهم في كندا وامريكا وبدون وجه حق جاين تقولوا نبوا انشوفوا رأي الطلبة في المكتب الكندي وانديروا استبيان انا من جانبي مستعد نحلف ان المكتب الكندي اكبر امخانب واحسن مكتب قادر ايمشي امور الطلبة الليبين واحسن من السفارة لكن بدل ما تشدوا الخانب اقطعتوا المنحة على المخنوب منه وزدتوا معاناته
سبحان الله دائما الموزين مقلوبة عندكم درنا ثورة وحمدنا ربي وقلنا تخلصنا من الظلم والظالم وتوا انتم جاين باش تمارسوا علينا فنون الظلم شنو هربنا من الغولة طحنا في سلال القلوب
ياوزارة التعليم والله العظيم رانا شعب مظلوم شعب شاف 42 سنة ظلم اللي شافه شعبنا المسكين ما شافه حد في الدنيا المفروض تعالجوا مشاكلنا وترسبات الماضي البغيض تقدموا حلول استثنائية للطلاب القدمى لانه مافيش حل الا انك تمشي موضوعهم وبس خلي اللي قادر يتخرخ يتخرج واللي فاشل توقف منحته وفي نفس الوقت تقدر الوزارة تسن قوانين جديدة للمعيدين واللي جاي جديد اما الطلبة القدامى فهم حالة خاصة مستعصية تنتهي ان شاء الله بتخرجهم او بموتهم
لو انكم تفكروا في حالنا اوكي مش قطعتوا المنحة من حقنا حسب اللوائح في تذكرة عودة لينا ولصغارنا شنو تحسابنوا عايش في مناخ زي ليبيا نقدرو نرقدو قدام الحوش راهوا كندا صقع ياناس
والله العظيم العجب اللي شفناه منكم دارنا مضحكة للي يسوى واللى ما يسواش شنو تبونا نشحتوا
انا عارف بتقولوا انه فيه ناس فاشلة وناس امتع واسطة وناس ما عندهاش الحق في منحة كلامكم صحيح باس حرام ايضيع فيها المظلوم في حرت الظالم المكتب عنده كل شئ عن الطالب وسيرته من يوم وصوله لكندا او امريكا اوكي اطلبوا منهم ال يعطيكم هالمعلومات وادرسوها وخوذوا وقتكم في الدراسة شهر شهرين ثلاثة مع الدقة في التحريوتقوا الله وبعدين ان شاء الله ايبان الصالح من الطالح عندها اقطغوا عليه المنحة او اقطعوا حتى رأسه وبدون شوشرة ولا فضائح كان حق انتم ناس تفكروا في مصلحة الوطن والمواطن الليبي ومشاكله اما عير اقطع المنحة على القرارات القديمة واعطوا الفلوس لاصحاب القرارات الجديدة اللي فيها اولادكم واحبابكم هذا كلام ما يقبله لا ربي ولا العبد
والسلام على من اتبع الهدى
