بخصوص الربع الثالث والطلبه الغير موجود اسمائهم في القائمه

السلام عليكم ورحمة الله وبركاته,
 
[rtl]إخوتي الطلبة  حبيت نوضح لكم امر مهم جدا بخصوص الربع ولماذا بعض الأسماء سقطت من الربع. أولا الطالب لما يجي لكندا الدولة تسيله في ثلاث اشهر ومرات شهرين بالإضافة إلي الرسوم الدراسية و1000 دولار حق جهاز حاسوب. في الحالة هذي الطالب مليشي علاقة بربع حيث يدخل الربع التالي أي بعد 3 اشهر من بداية الصرف ,بمعني لو الطالب جي لكندا في شهر واحد معناها الوزارة محولته 3 اشهر ألي هما 1,2,3 وبالتالي يدخل في الربع الثاني من السنه وهو شهر 4,5,6.بالله ركزوا معاي وين المشكلة تصير؟ المشكلة أن الطالب يقدم أوراقه للبعثات  وبعد ما يجيب لهم ورقة المالية (الورقة الحمراء-برقية الصرف) يعطوه ورقة 25% والتعريف يظن الطالب انه خلاص موضوعه تم في البعثات. المفروض الطالب يسافر ويستريح لاكن ألي يصير العكس.  البعثات تعطي في الأوراق لطالب بدون ما يدخل للمنظومة متع الصرف باعتبار أن هناك وقت كافي للإدخال ولان العدد كبير علي إمكانيتهم في الإدخال , أثناء ادخال بيانات الطالب فيه ناس تدخل وأمورها طيبه وفيه ناس لا , لما تراجع  يقولوا لك ملفه راح,ناقص ولا مهناش!!!!!!! مفيش طالب يحطوا اسمه في تفويض مالي بدون ما يجيب ملفه كامل!! اذا فيه شيء غلط ليش الشي هذا ما يصير قبل .علي الطلبة التأكد من أسمائهم في المنظومة وعلي إدارة البعثات التأكد ليش ملفات دون ملفات تريح.هل المقصود ان فيه ناس تبينا انقول النظام السابق خير, الله اعلم. المهم بعد 3 اشهر يسحبوا الربع من المنظومة واي واحد مهناش اسمه ليه الله وإن شـاء الله  ربي يصبره.[/rtl]
[rtl]ملاحظه: كذلك المكتب الكندي عندا كثير من الخبث فيه أسماء موجود ومتحولا من ليبيا والمكتب بعث لهم ايميلات علس أساس ان أسمائهم مجتش ,انا متاكد من الكلام هذا.ارجو من قسم التفويضات في وزارة التعليم عرض الأسماء المحالة لان المكتب الكندي يلعب بأعصاب الطلاب وهما مش ناقصين.والله من وراء القصد[/rtl]

 

عدل سابقا من قبل abubaker.sasi في الجمعة 02 أغسطس 2013, 6:20 am عدل 1 مرات

بارك الله فيك علي الايضاح وياريت الناس كلها تفكر زيك بمعني انها تفيذ الغير وتساعدهم لوجه الله سبحان وتعاله
ونتمني من الجميع ان يشكر من يقدم له المساعدة او العون بكلمة شكر ونتخلصوا من قصة ناخذ مصلحتي وفوت راه الدنيا مش هكي

لا أله الا الله محمد رسول الله 
يا الله وفق الجميع لما تحب وترضي

اقوى لقطة بداية الصرف متلا 1 - 9 - 2013 والمكتب يصرفلك من 1-11-2013 ,, وربع المرتب ينقص من يوم 1-9 ,, صراحة يعجز اللسان فى وصف هدا الابداع .

السلام عليكم .... والله اني تعبت من الانتظار ليا اكثر من ثلاثة اشهر في كندا ولم اتقاضي منحتي والامر من هذا ان اسمي لم ياتي في القوائم الاخيرة  رغم اني استلمت رسالة بداية الصرف من شهر 5 وبداية الصرف 1/ 6   وانا اعول في اسرم من اربعة اشخاص  ..... قبح الله الحكومة وادارة البعثات والله اني كرهت الافاد وكرهت اليوم الدي خرجت فيه من البلاد  ...... رسالتي الي وزير التعليم العالي وادارة البعثات ... ما ذنب ابنائي يتشردون و يعيشون على الخبز والماء واطفال يعيدون بلا عيد  ...... الهم ياربي ان كنت تعلم اني عبدك  لا اشرك بك وان صيامي هذا لك وحدك فجعل عيد ابناء وزير التعليم لعالي وموظفي ادارة البعثات كعيد ابنائي  هنا في كندا لا اكل ولا ملبس ولا هناء  اللهم لا تنزل عليهم وعلى ابنائهم السرور  في هذا العيد .... اللهم استجب لي  اللهم استجب لي  اللهم استجب لي

لاحول ولا قوة الا بالله ,, ربى يفرج عليك يا اخ تميم والله مش عارف حتى شن بنقول , المشكلة لو الواحد حتى بروحه مش مشكلة لكن عيلة واطفال ,,يا ريت نقدر نساعدك بأى شىئ, بس الحال من بعضه حتى انا ليا شهرين وما استلمت شى رغم ان اسمى وصلهم هنا وقاعد اهو نستنى لا حسينا بعيد  لا برمضان لا بإيفاد لا قراية ,, حسبى الله فى اللى كان السبب .نسأل الله ان يفتح لك أبواب الفرج فى نهاية هذا الشهر الكريم .

يارب فرج على عبدك

يارب العرش العظيم فرج له كربته
فانه لا يفرج الهموم غيرك
وصلي اللهم علي سيدنا محمد رسولك الكريم