الحمد لله بعد رحلة طويلة وشاقه جداً وصلنا الى كندا ولاادرى لماذا جانى شعور شديد بالغربة في كندا ولم اشعر به في بريطانيا لربما شعورى بفرق التوقيت او بعد المسافة. ولكن لايفوتنى ان اشكر الاخت basmalibya التى قامت بتوصيلى بأخت اخرى حجزت لى الفندق ودفعت عنى العربون فبارك الله فيهم ووفقهم الله.
بالنسبة للوكالة تحجزلك على الخطوط اللى انت تبيها والانجليزية ارخصها يعنى تزيد مبلغ بسيط اقل من 50 دينار تقريباً للتدكرة بش اتغير على البزنيس ولازم اتغير على البزنس كان هذا تقعد في المطار وغير مسموحلك بالدخول حتى للفندق وهذ ماصار لاخت ليبية معانا للاسف. وفى اب مرافق لبنته حتى هو ماكانش بزنس والامازون على اساس حجزلوله فندق ودفعلهم فلوس ولكن خلينا في الاميقريشن الله اعلم شن صار معاه وطلبو منه تأشيرة فلازم تغيرو على البزنس والمبلغ بسيط جداً مقارنة بالخطوط التركية.وبعدين حتى الكراسي والخدمات احسن بهلبة من التذكرة العادية.
بالنسبة للخطوط الانجليزية عند الوصول الى لندن يجب عليكم الدهاب الى مكتب الخطوط الانجليزية لأخد الفوتشر متع الهوتيل.الهوتيل راقى هلبة 5 نجوم مع العشاء و الفطور . تعشينا كويس(سمك ..ووووو) وعصائر وسلاطة فواكه ولله الحمد مع وجبة للأطفال بطاطا مقلية وبيتسا لو يحبو. في الصباح الفطور طبعاً بوفيه مفتوح ولكن اللى عنده اطفال زى ماتعرفو الصغار ياكلو فى اوقات مختلفة يعنى وقت الفطور مااياكلوش وبعدها يقولو جيعانين تقدرو تأخدو كيسة منهم متع تيك اوى بش ايولو عليها الصغار بعدين لان هذى اخر وجبة كويسة وبعدها شد روحك لان الرحلة على الانجليزية الى كندا يعيبها فقط الاكل فنحن لم نأكل شئ على الاطلاق مع ان الرحلة طويلة وقداختارنا اكل الحلال من الموقع ولكن للاسف حاجة ماتعرفهاش شئ ههههه تتفرج عليها وتردها سواء كان في صالة الانتظار في الهيترو والا في الطيارة شربنا ماء وعصير فقط وخدينا فواكه فى الانتظار بما ان من ليبيا الى لندن كان الاكل كويس.
انا على استعداد للأجابة على اسئلتكم واخدت نسخة من النموذج اللى مفروض تعبوه في الطيارة لما قريب توصلو كندا تو انحطه بش اللى عنده مشكلة في اللغة يقدر يوتى ويترجمه.
طبعاً واهم اهم معلومة قريب نسيتها في الاميقريشن زوجى مالقوش الملف الصحي ليه في المنظومة تخيلوا ؟؟؟؟؟ سئلونا هل دار الكشف الطبى فقلنالهم مستحيل نأخدو التأشيرة من غيره قالوا لا عادي تصير ولكن لحسن الحظ ولله الحمد كان معانا نسخة في الشنطة اللى معانا في الطيارة خدينها من فترة بسيطة من مصحة السلام لنا جميعا لان احد الاخوة قال لما تجدد الاقامة من كندا قد تحتاجها فمشينا للمصحة وخدينا نسخة كان هذا قالت الموظفة ترجع لليبيا ولا يمكنك الدخول وبعدها الحمدلله عطوه الاقامة زينا بالزبط الى 1-11-2014 بإذن الله.
