ياريت اللي قدم عالتأشيره لأمريكا من تركيا يدخل للموضوع

السلام عليكم ورحمة الله وبركاته

في الفتره الأخيره بقيت نستفسر عن موضوع إجراءات التأشيره لأمريكا
فقالولي ناس إن لازم تدفع رسوم التأشيره قبل ما ناخذ موعد
يعني ما نقدرش ناخذ موعد المقابله إلا لما نكون دفعت رسوم التأشيره فهل الكلام هذا مزبوط وأكيد؟؟
وهل عادي ممكن تندفع رسوم التأشيره عن طريق النت أو بأي طريقه ثانيه زي إنها تنبعث على المصرف مثلا من مصرف من هنا من ليبيا
واللي قدم من تركيا معناها وين مشى في تركيا بش دفع الرسوم
أنا توقعت بصراحه يكون دفع رسوم التأشيره يوم المقابله وإني نقدر انحدد موعد المقابله حتى قبل دفع رسوم التأشيره
ياريت لو حد ايأكدلي الموضوع
وايقولي شن الإجراءات اللي طلبوها منه بالزبط
نتمنى المساعده وبسرعه
عشان نقدر انقرر هل نستمر في موضوع أمريكا أو لأ
لأن بصراحه حسيت الموضوع كل ما له ايزيد يتعقد
خاصة وإن يسلتزم موضوع التقديم عالتأشيره سفر لدوله ثانيه وهكي
وعندي استفسار بخصوص مكان المقابله في تركيا هل هوا في القنصليه الأمريكيه في اسطنبول وإلا في السفارة الأمريكيه في أنقره؟؟
نتمنى نلقى إجابات دقيقه من ناس مجربين

وبارك الله فيكم

السلام عليكم
بالنسبة لدفع رسوم التأشيرة فهذا أكيد ولابد من الدفع أولا كي تتحصل على موعد وطريقة الدفع ممكن تكون عن طريق شخص تعرفه وتوثق فيه في تركيا لأن لما تعبي الأبليكشن تطلع ورقة لازم تكتب فيها رقم الورقة يلي خلصت بيها وطبعا الشخص بعد ما يدفعلك يبعت تلك الورقة على الإيميل