مانصائحكم لتطوير الانجليزية قبل السفر ارجو التفاعل

مرحبا عندي موضوع شاغلني هلبة نبي ناخذ رايكم فيه ماهي احسن وسيلة لاستغلال وقت انتظار التاشيرة لتحسين اللغة الانجليزية هل تنصحون بالاشتراك في معاهد وماهي احسن الدورات وانسبها ام تنصحون بالاستفادة من استاد خصوصي ام السفر فترة لمالطا ام ان مدة سنة كافية في كندا لاجتياز الامتحان خصوصا لمن هم مثلي وراهمphd!,!!الرجاء التفاعل خدمة للجميع

والله يا اختي نفس الشي حتي انا. ماشي لكندا وسنه لغه نشبح في من راي الشخصي ان سنه كافيه واكتر وباخل ع كورس مكثف في مده الاجرائات لكن ننصحك تاخذي. وموفقه إن شـاء الله

باهي هل سمعت بكورس مكثف وكويس قولنا عليه وبارك الله فيك

رأي المتواضع يأختي لو ان مستوى لغتك متوسط قدمي على كورس الايلتس واستفيدي من تكنيك واستراتيجية الايلتس حتى تكوني فكرة تستفيدي منها مستقبلا

للاسف مستواي بري انترميديت وجربت كورس تحضير ايلتس ووقفته لاني لقيته قوي عليا

اهلين خوي تقدر ادير اختبار تحديد مستوى في اي معهد او مدرسة لغة مثل توباكتس في النوفليين او اليت في قرجي او نيوكاسل في النوفليين او حي الاندلس تقريبا اسعارهم اربعين دينار او خمسين نسيت وربي يوفقك

السلام عليكم
والله اللي عنده كيف يسجل في مدرسة كويسه مافيش باس لان هذا يرجع اعليكم بالفائدة لما تبدأ الدراسة وياريت تركز على السمع والبحث على الاسئلة لان في هلبه موضيع شيقه في النت للاستفاده منها بالنسبة لتجربتنا ان و زوجتي استغلنا الفرصة وسجلنا في نيو كاسل ودارت level test وحدد لها المستوى وسمينا باسم الله ومشت الامور والحمد لله كل يوم في تحسن .

nano2800 كتب:

اهلين خوي تقدر ادير اختبار تحديد مستوى في اي معهد او مدرسة لغة مثل توباكتس في النوفليين او اليت في قرجي او نيوكاسل في النوفليين او حي الاندلس تقريبا اسعارهم اربعين دينار او خمسين نسيت وربي يوفقك

فيك بارك الله خوي وربي يوفقك. ...
اخ mmssبالله بنسالك انتو توا تقروا في المدرسة والا كملتوا وفي اي لفل واصلين وشكرا لتفاعلك
ننتظر في تجارب الاخرين افيدونا افادكم الله

بانتظار التفاعل ارجوكم ماتبخلوش علينا بتجاربكم بالك نكتفوا طرق جديدة لتحسين اللغة

السلام عليكم

فعلا موضوع رائع

وعن تجربه شخصيه قمت بعدة كورسات انجليزيه قبل التقديم للتأشيره بأشهر

وعلى فكره لم أتعلم في مدراس مشهوره ولكن في مدراس بالكاد كانت معروفه في منطقتي وبجد استفدت استفاده كبيره وعلى الفكره

على من يريد تعلم الانجليزيه وهو على ابواب سفر يسجل في أي مدرسه أو معهد مهما كان بسيط لكن الاستفاده ستكون ملحوظه

ولا زلت مسمتره في الكورسات حتى تأتي من علمتني الصبر الــتأشيره الكنديه

ان شاء تجيك التاشيرة باسرع وقت وتتسهلك كل الامور الف شكر لتفاعلك وبالتوفيق ومازلت بانتظار اللي يشاهدوا ويغيروا في الصفحة ديروا الخير وانصحونا ههههه

ياختي لاتضيعي الوقت مادام ناوية كندا ماتستنيش سنة اللغة  حددي مستواك ويمكن دلك في اي مركز لغة اصلا بمجرد تقديمك للكورس توماتيكيا يعملولك امتحان تحديد مستوي


وابدي وتوكلي وياريت ماتعتمدوش علي الكورس فقط كتفوا دراستكم خلي القنوات الي تتفرجي عليها كلها اجنبية ......... اخلطي بين نشرات اجنبية ومسلسلات واواواواو......
اسمعس . ثم اسمعي. ثم اسمعي علي قد ماتقدري اسمعي
ادخلي علي النت وحتلقي برامج رائعة جدا وممتعة تعلمك  ........ فيه منها علي هيئة اغاني مكتوبة تسمعي وتقري في نفس الوقت. عودوا انفسكم قرائة النشرات علي النت باللغة الاجنبية علي الياهو مثلا........ زودي نفسك بالمفردات الاجنبية حاولي علي الاقل كل يوم تاخدي كلمة اوكلمتين تحفظ تماما
رجاء ياخوتي لاتعتمدوا علي سنة اللغة
اصلا لو الواحد يفكر فيها  مفروض ياخد التوفل او الايليت ويقدم في جامعة وبعدين يمشي علي الاقل مايضيعش سنوات الايفاد في الانتظار وهده مصيبة الموفد الليبي
لما تشوفوا خوتنا السعوديين والخليج تلقيهم مجربين التوفل والايليت علي الاقل مرتين او ثلاث في بلادهم وبعدين يجوا لبلاد الافاد جاهزين  مجرد وضع نقاط علي الحروف ياريت نتعلموا منهم 
هده نصيحة لكل الموفدين من اول يوم دخلت فيه علي المنتدي ومازلت اكررها واسفة علي التكرار ولكن فقط نظرا لاهمية الموضوع كما اني اتمني ان الانسان لما يقع في خطأ يحاول ينبه اخوته الاخرين علي شان لايقعوا في نفس الخطأ وهدا واجب

السلام عليكم, احسن مكان لتحديد المستوى هو المعهد البريطاني في السياحية 30 د.ل 

اما توباكتس فكان الامتحان مهرلة

اختي حلا الف شكر ليك ان شاء الله بناخد بنصيحتك بس لو تعرفي احسن مكان نبدو بيه قولينااخي جوي للاسف المعهد البريطاني موقف لو تعرف مكان مميز قوللنا احنا ندورو ونحاولو نستفيدو من تجارب لعض ارجوكم حاولو تنصحونا بقدر الامكان من خلال تجاربكم

اخي  شوف معهد ايليت في قرجي يشكروا فيه 

و كان مستواك مبتدي ادرس هلبة , يعني مش تمشي فقط للكورس 

موفق

شكرا اخي وانا اخت مش اخ ههههه مشيت لمعهد ايليت لكن كل مستوى ياخذ حوالي 8شهور AوB انا مستواي بريانترميديت

nano2800 كتب:

شكرا اخي وانا اخت مش اخ ههههه مشيت لمعهد ايليت لكن كل مستوى ياخذ حوالي 8شهور AوB انا مستواي بريانترميديت

ههههههه الحال من بعضه حتى اني اخت

انت تبي فترة قصيرة؟؟؟؟
اقري قضض بسيطة باش تزيدي مفراداتك

ههه اسفة اختي جوي انا بنقدم ع التاشيرة ن شاء الله اون لاين وانراجي في ورقة دعم التاشيرة قالولي تعالي الاحد وبعدها بنقدم طول ونتمنى نحصل كورس مكثف في مدة انتظار التاشيرة في ناس اقترحوا هليا الاستاذ الخاص لكن انا مانحبش الدروس الخصوصية نحب نقرا في جو تنافسي هههه بالله لو حد عنده اقتراح عملي يقولي عليه