دراسة المرافق

السلام عليكم شن برنامج المرافق ودراسة اللغة  انى قريت فى الموفد انه لازم ايكون عنده رسالة من المكتب الكندى وبعض من الاعضاء قال لابد من رسالة من البعثات يريت اتوضلحولنا قبل ما واحد ايسافر

وعليكم السلام ورحمة الله وبركاته
اختى برنامج المرافق مفروض ايكون موحد لكل الساحات وانا اغلب الساحات لقيتها تاخد فى ورقة برقية المرافق 
لكن الساحة الكندية ماعنديش عليها خلفية 
ممكن لو وحدة بكندا  مرافقها يقرا معاه اتبلغنا
الاخ يحتاج ورقة تبين انه مرافق وهى برقية المرافق والزوج بعد توصلو بلد الدراسة ايديرها وفيه من ايقول الزوج حتى هو ايقدم على برقية المرافق 
تركيا-بريطانيا - ماليزيا -مصر -هضوم الساحات تاخد فى برقية المرافق اتقدم عليها فى البعثات وترفعها معاك 
وربى يسهل لك امورك

راجية رحمة ربى كتب:

تركيا-بريطانيا - ماليزيا -مصر -هضوم الساحات تاخد فى برقية المرافق اتقدم عليها فى البعثات وترفعها معاك 
وربى يسهل لك امورك

السلام عليكم 
مرحبا اختى راجية والحمد لله على سلامة وصولك بريطانيا نسألك  الله لكى ولكل الموفدين التوفيق 

فقط استفسارى عن برقية المرافق هل هى تعطى من البعثات  بدون ان نركز لهم عليها بعد التفويض   او هى نموذج خاص يسلم للبعثات ومن ثم يعطونا البرقية

موضوع مهم بالله الى عنده معلومه يخبرنا بيها

السلام عليكمو   المعلومه اللى عندى ان اجراءات المرافق تبدا من المكتب الكندى فى كندا بحيت يقوم بفتح ملف وبعدهار ارساله للبعثات ليتم الموافقه عليه واعطائه اذن بالصرف  وانا عارف طالب حاليا متواجد فة كندا وزوجته تريد الدراسه وهى حاليا تدرس اللغه على حسابها الخاص فى انتظار اتمام اجراءاتها من المكتب

الصراحة نبى نلخص الموضوع باش يستفيدو منه اغلب المرافقين 
انا مرت عليا  المرافق بمصر وتركيا وماليزيا  وبريطانيا وكان الاجراء كالتالى 

المرافق كان يضن انه الامور تمام بمجرد حصوله على تعريف مرافق  او انه الاجراء يكون من بلد الدراسة لما يوصلها 
وبعد وصلو بلد الدراسة اتضح انه الامر يتطلب تعبئة نمودج وارساله للبعثات بليبيا ومن ثم  تاخد وقت ان لم يدحل الاسم الموفد للمنظومة  فقد يستغرق الامر شهر او شهور 
وبعدها ترسل البعثات لملحقية البلد رسالة اسمها ورقة دفع رسوم دراسية 

لكن 
انا فى الساحة البريطانية  لما عرفت القصة هادى  طبعا كان الامر متاخر بعدحجزت الرحلة 
والورقة هادى لما نسال مشرف الساحة ايقولى برقية مرافق نفسها تعريف مرافق ولما توصل غادى ادير ورقة تانية  اى بمعنى نفس سريب اللى قبلى 
ولما سالت الساحة التركية قالو احنا نعطو فى برقية ضم مرافق  والورقة هادى مايستدعى المرافق ايدير شئ بعدها 
وبنت قبلى ببريطانيا نفس الشى رفعت تعريف مرافق ودرات اجراءات ورقة دفع الرسوم 

هنا انا احترت كيف الخلبطة هادى المفروض الاجراء واضح لكل الساحات  والقصة انه حتى المشرف امتع الساحة البريطانية كان متاكدد انه الشخص مجرد مايوصل يقدم على ورقة دفع رسوم لمرافقه 
الكلام هضا بعد شهر واسبوعين وانا فى جرت ورقة كل واحد شن ايسميها 
خلاصة الامر كنا قد قدمنا على برقية مرافق  وطلعناها 
وجينا لبريطانيا 
بعد شافها المشرف قال هادى ورقة ضم مرافق ؟؟؟؟
انا سكتت وماحاولت انجيب سيرة ورقة دفع الرسوم لانه الباين ماهم عارفين معنى الورق او ماعرفو كيف يشرحو لنا لانى الصراحة لما قريت ورقة برقية المرافق 
لقيت مفادها انه الشخص فلان يسمح له بان ييكون مرافق لاخته فقط لاغير وماجابو سيرة الدفع فى الورقة بكل 
مع العلم اطلعت على ورقة ضم المرافق بالساحة التركية ومفادها انه الدولة تتحمل مصاريف دراسة الاخ المرافق  
واطلعت على ورقة دفع الرسوم ومفادها انه الدولة تسمح بدفع رسوم اللغة لمدة سنة فقط اى بمعنى  هنا ورقة ضم المرافق بالساحة التركية اشمل من ناحية المعنى 
الخلاصة 
افى الساحة البريطانية انت والمشرف اللى بطيح فيه فيه من مشرفين ايكرهوك بعيشتك وفيه اللى ماشاء الله اينورك فى اغلب الامور اللى غايبة عليك ويسهلها لك 
وهلى انشوف فيه 
لازم تسال مشرف الساحة اللى انت تابعها  وتطلب منه اجراء ورقة برقية المرافق او ضم المرافق وياريت لما تسال  اتشدو فى ورقة الضم  اكثر 
فلو كان اخ ربما الامر يستدعى انك اتجيب معاك ورقة ضم مرافق  باعتبار الاخت عندها اكثر من اخ  وتطلبها من المشرف وماتخليشى ايقولك امشى غادى وقدم عليها لانها بجد   رح تتعب  لازم تبدا فيها من هنا ادا كنت اخ 
ولكن الزوج فالاغلب يبدا الاجراء فى بلد الدراسة الا انى انشوف فيهم زى بعض 

مع انه لو الشخص اطلع على لائحة الايفاد ولائحة العمل يجد انه المرافق المفروض الاجراء متساوى الا انه احقية الزوج اكثر والمفروض مايطلع ورقة متعلقة  بكونه مرافق 

وان شاء الله انكون افدتكم بشئ 
لانه بالفعل ورقة ارهقتنى

جزاك الله خيرا ... المشكلة إن في البعتات قالوا تعريف المرافق مش مهمة تعطى لجهة العمل فقط. شكلهم مش عارفين شئ وايضيعوا فينا معاهم.

السلام عليكم باهى شن الاوراق يلى ممكن يطلبها منك المكتب الكندى بيش يقدر المرافق يقرا ياريت لو فى حد فى الساحة الكندية معاه مرافق ايرد علينا

انا ايضا يهمنى الموضوع هذا وسألت وتعبت واجد بيش انحصل الجواب الشافى ،، وكان اقرب شيء هوا ان المرافق "الزوج" لايتم منحه ورقة مفادها ان الدولة تتحمل تكاليف الدراسة الا بعد سفر الموفد الى بلد الدراسة وفتح ملف فى المكتب الكندى هو والمرافق ومن ثم يقدم المرافق على طلب ضم للمكتب الكندى الذى يقوم بدوره بإرسال هذا الطلب الى بعثات ليبيا التى بدورها ترد بالموافقه على الضم هذا اذا ربي راضى عليك وكاتبلك الضم!! . العملية هذى تأخذ وقت قد يصل الى 6 اشهر .
واذا عندك معرفة قويه "واسطة وفساد ادارى" فى البعثات فى اللى سافر لكندا وامريكا ومعاه رساله رسمية تفيد بأن فلان مرافق وان الدولة تتكفل بمصارف دراسته وبدا فى الدراسة على نفقة الدولة طول.
بالتوفيق للجميع

السلام عليكم:

دراسة المرافق موضوع مبهم جداً جداً جداً؟؟؟ وبكل ماتحمل هذه الكلمة من معنى وللأسف حتى اللى يعرف معلومة ساكت عليها وماحدش يقوللك شن الاجراء الفعلى اللى لازم يصير.
في ناس تلقاها تقراء ولما تسألها تقولك مانعرفش؟؟؟المكتب الكندى احرف من الليبين ماتعرفش شن ايدير في الخفاء علاش لازم يراسل البعثاث واغلب المرافقين عندهم الدعم من ليبيا وقبل التأشيرة وكلهم جايين تأشيرة طالب؟؟؟؟ وبعدين علاش كلمة الضم؟؟؟ الضم موضوع مختلف هلبة على المرافق. الضم للناس اللى جاية تقراء على حسابها وتبى تنضم للدولة , لكن المرافق جاي اصلاً بالدعم المالى مع الموفد.
المهم بالنسبة ليا انى على ماقد ماسألت بصراحة مافهمتش لا المكتب الكندي يفهمك شن مفروض واحد ايدير هل يبعث احد من اهله للبعثاث والا يستنى رحمة ربي؟؟؟؟ ولا الاخوة الليبين اللى مرافقينهم يقرو يقولولك شن الاجراء بالزبط؟؟
ولكن يبقى الامل ^-^

السلام عليكم انا مرافق لما كنت فى ليبيا دهبت الي البعتات  مشرف الساحة الكندية قتلة انا مرافق ونبي ندرس شنى الاجراء من اين نبدا هل فى اوراق منكم قالي لا البداية من كندا بلد الدراسة تراسل المكتب الكندي وهو يقولك شنى المطلوب وبعد  السفر و وصول الي كندا رسلت المكتب الكندي نتفاجئ انة من البعتات موقفين على المرافقين بي العربي امصكرين على المرافقين الدراسة وبعد المراسلات لي المكتب الكندي بخصوص المرافق قالك البعتات لم تعطي الادن لي المرافقين بالدراسة و فى الايام الماضية ارسلو لنا ملف و تعبية و طلب تقدمة بخصوص السماح بالدراسة و رد المكتب انة تم الموفقة من المكتب بس الوزارة او البعتات لم تعطي الموفقة بعد ممكن فى2014 هدا ما جاء فى الرسالة وبعد مرور مدة يقولك انت لا تنطبق عليك الشروط اسفين ما فيش دراسة تيتيتي كيما رحتي جيتي و اخيرا ربنا على الظالم

safwan كتب:

السلام عليكم انا مرافق لما كنت فى ليبيا دهبت الي البعتات  مشرف الساحة الكندية قتلة انا مرافق ونبي ندرس شنى الاجراء من اين نبدا هل فى اوراق منكم قالي لا البداية من كندا بلد الدراسة تراسل المكتب الكندي وهو يقولك شنى المطلوب وبعد  السفر و وصول الي كندا رسلت المكتب الكندي نتفاجئ انة من البعتات موقفين على المرافقين بي العربي امصكرين على المرافقين الدراسة وبعد المراسلات لي المكتب الكندي بخصوص المرافق قالك البعتات لم تعطي الادن لي المرافقين بالدراسة و فى الايام الماضية ارسلو لنا ملف و تعبية و طلب تقدمة بخصوص السماح بالدراسة و رد المكتب انة تم الموفقة من المكتب بس الوزارة او البعتات لم تعطي الموفقة بعد ممكن فى2014 هدا ما جاء فى الرسالة وبعد مرور مدة يقولك انت لا تنطبق عليك الشروط اسفين ما فيش دراسة تيتيتي كيما رحتي جيتي و اخيرا ربنا على الظالم

السلام عليكم
إخوتي الكرام كل عام وانتم بخير بمناسبة عيد الاضحى المبارك
بخصوص دراسة المرافق فالبداية تكون من المكتب الكندي وهو يرسل برقية للبعتات

طارق الغنيمي كتب:

السلام عليكم
إخوتي الكرام كل عام وانتم بخير بمناسبة عيد الاضحى المبارك
بخصوص دراسة المرافق فالبداية تكون من المكتب الكندي وهو يرسل برقية للبعتات

كل العام والجميع بخير
المشكلة ماذا بعد برقية البعثاث؟؟؟؟؟ ولماذا الساحة الكندية فقط؟؟؟ ولماذا لايتم هذا الاجراء في الساحات الاخرى؟؟؟