hello777 كتب: ما هي أفضل معاهد اللغو لو سمحت؟
Portland State University
فيها معهد - ينصح بيه لأنه معهد متع جامعة حكومية يعني حتلقى تعليم ممتاز و ليس تعليم تجاري ، مشكلة معاهد الجامعات نظام فصلي يعني يبدوا كل 3 شهور فلو فات عليك فصل بتستنى 3 شهور ثانيات و هذا ممكن يعطلك في ليبيا لو التفويض أو التذاكر تأخروا شوية
ELS
إي ال أس معهد معروف و عنده فروع في أمريكا و لكن يظل معهد تجاري و مستواه أقل من معاهد الجامعات ، ميزة معاهد ELS أنها تبدأ كل شهر يعني لو فات عليك شهر 10 مثلا تقدر تغير على شهر 11
Kaplan
زي اللي قبله
Oregon State University
فيها معهد ، لكن الجامعة ليست في بورتلاند و لكن موجودة في كورقاليس و هي مدينة جامعية صغيرة تبعد على بورتلاند حوالي ساعة بالسيارة.
لا أنصح بهذا الخيار لأن الواحد في فترة اللغة يبي يشوف أمريكا مش يبي يدفن روحه في حوازة
، إلا إذا حصلتي قبول في الجامعة فيمكن تمشي غادي و تجري على أوراقك و تحاول تأكد القبول متعك.
University of Oregon
موجودة في يوجين و هي حوالي 3 او 4 ساعات من بورتلاند
لو أوراقيك تمام و متخافش من التأخير ننصحك بالمعهد الأول ، لو تبي معهد يبدا كل شهر أعتقد معهد كابلان خيار كويس ، بس زيد تأكد من الكورسات الموجودة عندهم.
ملاحظة مهمة جدا : جامعات أوريغون لا تعطي قبول عند إنهاء مستويات اللغة ، أنت مطالب بإجتياز إمتحان التوفل بدرجة 550 أو الأيلتس 7.
يعني لو الإنجليزية ضعيفة زيد فكر شوية ممكن تحصل جامعة أخرى تعطيك قبول عند إنهاء مستويات اللغة. هذه أعتقد السيئة الوحيدة اللي خلت الكثير من الليبيين يرحلوا من أوريغون.
خيارات أخرى ممكن تفكروا فيهم في الساحل الغربي
سياتل - ولاية واشنطن - خصوصا جامعة واشنطن University of Washington - حتقرى انجليزي في جامعة من أفضل 10 جامعات في العالم
مشكلتها أغلى من بورتلاند شوية و أزحم
سكرامنتو - كاليفورنيا
أغلى من بورتلاند شوية لكن فيها جالية ليبية على ما أعتقد
الساحل الغربي كله يعتبر خيار كويس ، طبيعة خلابة و ناس متفتحين مثقفين و ما عندهمش العنصرية و أمان عالي.
