شكوى مقدمة لوزارة الخارجية الليبية ضد مسؤول المركز الثقافي الليبي القاهرة وبعض العاملين به ورئيس اتحاد الطلبة

السلام عليكم اعضاء المنتدى في الساحة المصرية..
طبعا الصراحة الواحد تحمل مافيه الكفاية من اهمال وسوء تعامل مع الطلبة في الساحة المصرية من المركز الثقافي في القاهرة لااسلوب لاشي ولاحاسين بمعاناة الطالب الكادح مسكين ولامدايرين اي اهتمام لافي منحة اللي قاعدة تجينا بالتقسيط واللي يدير تمديد يستنى سنة وهو ونصيبه واللي يبي مصاريف دراسية لين يركبه الشيب وغيرها من المشاكل اللي المفروض هما شغلهم هنا لمساعدة الطلبة وتذليل العراقيل لكن للاسف لاحياة لمن تنادي فلهذا نما كنت في مصر درت مذكرة باسمي وبعض الطلبة الدارسين في الساحة المصرية ضد مسؤول المركز الثقافي وبعض العاملين في المركز وشرحت فيها كل شي من عدم اهتمام بالطالب لاتحمل اي مسؤولية تجاه الطلبة ايضا ضد رئيس اتحاد الطلبة اللي مفروض هو يكون حلقة الوصل مابين الطلبة والمركز ويتكلم على مشاكل الطلبة لكن ولاعنده اي علاقة بالموضوع...فلهذا مداما مش قادرين انهم يشتغلوا ويحلوا مشاكل الطلبة اللي هذا هو السبب انهم جابوهم لمصر رحم الله امرئ عرف قدره بنفسه يرجعوا ليبيا وفيه ناس اكثر كفاءة انهم يشدوا مكانهم احسن وان شاء الله يوم الاثنين القادم حتكون الشكوى في وزارة الخارجية وحتوصل لوزيرالخارجية شخصيا بحكم معرفتنا بيه وحنعطو صورة منها لخمسة اعضاء في المؤتمر الوطني باش يشوفنا حل ولوزير التعليم العالي صورة وطبعا مرفقة الشكوى بحالات من تاخر المنحة ودفع رسوم دراسية وتمديد باش يلمسوا شوية من معاناة الطلبة في مصر لان الصراحة تحملنا مافيه الكفاية وصبرنا لكن خلاص اللي ميكونش قد المسؤولية قدام الطلبة الدارسين في الساحة المصرية ميلزمناش احنا كطلبة نمبو اللي يخدم الطلبة بكل ضمير يلقى الطالب مع منو يتفاهم ويتكلم معاه ويساعده في حل المشاكل مش لامنحة في وقتها لاتمديد في وقته لامصاريف دراسية تندفع في وقتها امالا علاش حاطينهم بالك يحسابوا يخدموا في المركز السياحي الليبي مش الثقافي الليبي!!!عموما ان شاء الله ربي يوفقنا واللي عندد اي اقتراح يتفضل يكتبه ورجاء خاص اللي حيدافع عليهم ويقولي عكس كلامي ياخد الوساع لان كلنا عارفين اللي صاير وان شاء الله ربي يوفقنا..والسلام عليكم

احسن شي الواحد يشوف مصدر تاني يعتمد عليه في المصاريف

والله الحمد لله طمنتوني على نفسي لاني من معاملتهم ركبتني حالة نفسية واستغربت اني ماسمعت حد يشكي كل اللي سالتهم قبل ما نختار الساحة يقولولك تمام مفيش اي مشاكل غير جيب وراقيك وامورك تمشي على الكيف
لكن انصدمت واللي زاد عفلقني وطيرهالي اني لما رجعت لليبيا ومشيت للتعليم العالي وشكيت عند مكتب الساحة المصرية تفاجات بالرد الصقع
ما بعدهم جماعة المكتب الثقافي عندهم اكثر من 2000 طالب مش فاضينلك انت بس
وطبعا بش نشد روحي على العراك روحت ومعاش زدت كلمة ومن السنة اللي فاتت لليوم واني مش ناسيتهم بالدعاء
مفهمتش يشوف مصدر ثاني للصرف هما المصريين لاقيين خدمة في بلادهم بش الليبين يلقوا ولا في طريقة ثانية للصرف غير العمل؟

hamkg كتب:

والله الحمد لله طمنتوني على نفسي لاني من معاملتهم ركبتني حالة نفسية واستغربت اني ماسمعت حد يشكي كل اللي سالتهم قبل ما نختار الساحة يقولولك تمام مفيش اي مشاكل غير جيب وراقيك وامورك تمشي على الكيف
لكن انصدمت واللي زاد عفلقني وطيرهالي اني لما رجعت لليبيا ومشيت للتعليم العالي وشكيت عند مكتب الساحة المصرية تفاجات بالرد الصقع
ما بعدهم جماعة المكتب الثقافي عندهم اكثر من 2000 طالب مش فاضينلك انت بس
وطبعا بش نشد روحي على العراك روحت ومعاش زدت كلمة ومن السنة اللي فاتت لليوم واني مش ناسيتهم بالدعاء
مفهمتش يشوف مصدر ثاني للصرف هما المصريين لاقيين خدمة في بلادهم بش الليبين يلقوا ولا في طريقة ثانية للصرف غير العمل؟

اختي للاسف المعاملة هادي ليها فتره طويلة وعانينا منها هلبة والمشكلة كلهم عارفين المركز الثقافي كيف يتعامل مع الطلبة واهمال وتاخير في اجراءات الطالب لكن مافيش حد تكلم انا نلقاهم يشكوا منه ويقولك هما وصفتهم وكل شي لكن ساكتين حتى كتبت هنا في المنتدى قلت نلقى ناس متجاوبة معاي للاسف يخشو ويقروا بس مش عارف لامتا الخوف!!!والله بالنسبة ليا انا اخر سمستر ونتخرج واروح على خير ومش فارقة لكن الواحد بعد اللي شافه منهم اللي يعانوا فيه الطلبة ميقعدش ساكت يتفرج عل العوج اللي يديروا فيه وعدم الاهتمام وكاننا بالجميل يخدموا فينا لكن الشكوى اليوم وصلت للخارجية وان شاء الله ومزال حتوصل لوزير التعليم أعضاء في المؤتمر نعرفوهم باش يشوفو الطلبة في مصر شيني يعانو باش اقل شي تجيهم قرصة كويسة باش يعرفوا ان الطلبة مش ساكتين وحتى لو كملت حنشدها وراهم يايجيبوا ناس تانية عندها ضمير وتخدم الطلبة بكل امانة ولا هما نفسهم اللي قاعدين هنا يغيروا في تعاملهم مع الطلبة في مصر

ان شاء الله يكون في تغيير وتجاوب من المسؤوليين، واني مش عارفة هل الصمت دليل الخوف وغير خليني نكمل قرايتي ولا دليل الرضا وحتى الطلبة بلدياتهم على راي المصريين وحني اللي جينى بالصدفة ففسدنا عليهم التفاهم والانسجام اللي بينهم؟
بالنسبة للتتغير مش حيكون الا لو في قوانين تحترم ولو في محاسبة وعدالة لكن للاسف الوضع الحالي كلهم عويلة مع بعضهم مشيلي ونمشيلك زي ما نشبحوا فيهم في كل القطاعات كان مكتوب على الليبين؟
تصدق اني سمعتهم وهما بكلموا في واحد متعين جديد معاهم منعرفش شن وظيفته بس المهم ان الجملة اللي قالوهاله
" وانت متكسرش راسك مع الطلبة"
هده الجملة قيلت بالحرف فهما وظيفتهم زي معظم الليبين ياخدوا معشات وامتيازات لهم وللي يعرفهم من وظائفهم وميكسروش راسهم في مهام الوظيفة
زعما يا ولد جادو بعد ما تكمل وتخدم في الجامعة حتقري الطلبة بما يرضي الله وتفهمهم ولا مش حتكسر راسك واللي فهم فهم ولي مفهمش كيفه والنتيجة بعدين بالعلاقات ولا بالبركة ؟

الموظفين فى السفارات كلهم واسطات وليسو ناس اكفاء وبصراحه قليل يلى تلاقاه يخدم بضمير
والله الاجراءات هنا بصراحه متعبه وكل ورقة تاخذ من وقتك واعصابك 
حسبى الله ونعم الوكيل

لا حول ولا قوة الا بالله على العظيم
حسبى الله ونعم الوكيل

hamkg كتب:

زعما يا ولد جادو بعد ما تكمل وتخدم في الجامعة حتقري الطلبة بما يرضي الله وتفهمهم ولا مش حتكسر راسك واللي فهم فهم ولي مفهمش كيفه والنتيجة بعدين بالعلاقات ولا بالبركة ؟

اختي انا اول شي مش حنقري طلبة ولاحتى حنخدم في جامعة انا مهندس بحري حيكون عملي على السفن في البحر ولاعندي علاقة بطلبة ولاشي لااصلن حنقري في حياتي لكن اللي انا اللي خلاني اندير الشي هذا لان اصبحت معاناة بالنسبة لينا كطلبة تاخير واهمال في الاجراءات وناس متزوجة مسكينة اتبهدلت واللي يبي تمديد يستنى حتى سنة ومنحة تتاخر نظام تقسيط علاش انا اندهشت الصراحة من السفارة اليمنية والسودانية يعني اقل منا وكل شي وتعالا شوف المعاملة وكيف المصاريف الدراسية تندفع اول باول تقول علاش احنا مش زيهم ولااحسن!!!

اخي ولد جادو ،كلامك صحيح  ونحتاج الى هذه الوقفة الجادة ،ولطالما تكلمنا عليها وخاصة في موضوع تاخر المنحة وتعطيل الكثير من الاجراءات،،،ولكن في كثير من الاحيان تكون ادارة البعتاث ووزارة التعليم في ليبيا مشاركة بشكل كبير في هذه المشكلة والكثير من المشاكل الاخرى ،،وحصلت معي انا في اجراء تعديل الوضع مع انه اجراء بسيط ولا يحكى عليه ولكن اخذ من الوقت ما اخد،،، ولكن مع ذلك نحتاج الى ان نوصل مشاكلنا ومعاناتنا في هذه الساحة ،،،ونحن معك وفي اي اجراء صحيح ، الغرض منه تخليص الطالب من هذه الاجراءات والمشكلات المميتة والتي تعوق دراستنا ،وتسبب الارق لنا،،،وفق الله الجميع

اخي ولد جادو مش قصدي نزعلك وحاسة بيك لان اللي قاعد يصير مهزلة متعمدة اما علاش يصير فالسبب معروف وهو قتل الطموح والبقاء في نفس نقطة البداية ديما والواحد دايخ مش عارف يكمل اجراءاته مرة يقول اني نحس ومرة يصبر روحه ويقول ربي يسهل وهكدا
المهم ديما وهما معاك عارفين انت شن تدير يعني باعتينك تقرا ومضيعينلك وقتك وحارقينلك اعصابك في التخميم بيكملوا الاجراءات امته بينزلولي مرتبي ولا لا بيخلصوا الجامعة ولا بيديرولي عفسة
بحيث انهم ضامنين انه مفيش حد ممكن يتشطر يدير بحث ولا اي نوع من التقدم ديما وهما ورانا بش يوصلونا لحالة الاحباط ونقولو ودرة لا قرايه لا بطاطا ... .. والله الدوة هلبة وباختصار للاسف الشديد
ليبيا حالها يبكي
العالم واصل للقمر واحني ديما غير يخلولنا الميه والكهرباء وينزلولنا معاشنا ما نبوا شئ ثاني
وللاسف رغم ان المسؤولين هم سبب 80% من اللي نعانوا فيه لكن في 20% من المسؤلية تقع على كل ليبي في مكان عمله

وربي يصلح الاحوال ويحفظ ليبيا وسعبها

يحفظ ليبيا وشعبها

شي يخوف ومايطمن ربي معاكم ويكون فيه حل جدري سريع هدا الموفدين مشردينهم هكي امالا الي يقرا على حسابه كيف ربي يستر

السلام عليكم و رحمة الله و بركاته
لم يكن الوضع في السابق هكذا و لكن في السنوات الآخيرة أصبح الوضع يزداد سوء
فأنا لم استلم إلا منحة واحدة للكتب و كذلك لم اتحصل على التذاكر النصفية و التمديد قدمت فيه قبل انتهاء المدة باشهر و مع ذلك لم يُفعّل اكملت الر سالة و لم يات التمديد ..و غيري كثير ممن قدم على التمديد و لم يتحصل عليه إلا بعد فترة من الزمن و عند يأتي التمديد لا يصرف من تاريخ بداية الصرف ..
اشكر ابن جادو على هذه اللفته الكريمة