عبدالسلام الفلاح كتب:
السلام عليكم
اخوتي في المنتدى...انا متابع جيد للمنتديات السعودية والله حالهم كيف حالنا في الحصول على القبولات وادخلوا على اي موقع للمبتعتين السعوديين وشوفوا....الميزة اللي عند السعوديين انه الطلبة الموجودين في كندا هم اكبر دعم للطلبة الموجوديين في السعودية وايسعدوا فيهم في كل شي وليس الدولة اما بالنسبة للطلبة الليبيين بعضهم وليس الكل على سبيل المتال اول مايحصل التاشيرة اينزل موضوع "تحصلت على التاشيرة" ويختفي وجرب اسأله كيف درتها او كم اخدت منك...اما بالنسبة للسكن فابسط الطرق هي البحت في الانترنت وهي الطريقة التي اعتقد ان حتى الكنديين نفسهم يستخدموا فاها يعني كيف السوق المفتوح عندنا.
على الطالب ان يتعب وان شاء الله ربي حيسعده والبكاء على الانقاض لا ينفع هذه وجهة نظري والله اعلم.
شكرا يا اخى على رايك بارك الله فيك ,, وكلامك صح ولكن زى ما قولت البعض , تقدر تراجع مواضيع المنتدى وكل واحد وقدرته على أن يفيد غيره وليس فرض ,, بس معليشى كأنك ما فهمتش الموضوع المعروض هنا ,, كونك متابع جيد للمنتدى السعودية ما يلغيش ان القرار هذا ضد مصلحة الطالب اللى انت ما دكرتاش الكلام هذا فى مشاركتك ولم تشر له بكلمة ! مع احترامى لك الباين انك غير معايش لواقع الطلبة هنا وفى امريكا . عموما انا متابع للواقع وليس المنتديات فقط ,, السعوديين فتحولهم مطعم خاص بيهم حلال هنا ,, السعودين اللغة سنتين ,,, السعودين اوفات العطلات فى المنتزهات وفى الحدائق ومدن الالعاب مستمتعين بالقراية وبالحياة ,, وغيره من الميزات , اما الليبين من يوصلو وهما فى المشاكل والتخميم نرجع لكلامك ان فى بعض الليبين للاسف وين يحصل حاجة خلاص معاش دخله فى التانين ,, فيه سلبية ,, فمتلا القرار هذا قد لا يؤثر على المنتظمين فى الدراسة الاكادمية ,, ادا مالى ومالهم يوقفوهم ولا يمنعوهم المهم انا امورى ماشية ,, والله تفتقد حتى الكلمة الطيبة فى بعض الحالات متلا يقولك انشط روحك ! رغم ان عارف ان الموضوع ماليشى علاقة بالنشاطة ولكن اهو تجريح وخلاص مادام مش واصل فيه .
بالنسبة االبرازيليين عندهم اتفاقية مع الجامعات وقبولهم موجود قبل ما يجو ,, الليبين يبعتو فيهم تاريخ بداية الصرف 1-5- متلا ,, والصرف الفعلى 1-7 ,, ومرات شهرين على حسب الظروف والحالات ,, نهيك على ان المكتب الكندى اصبح مجرد وسيلة توزيع المنحة فقط ,, تبى تقرأ فى معهد باهى ,, تبى تقرأ فى جامعة باهى ,, بتغير بعد شهر من معهد لمدرسة اوكى ,, وفى الاخير بدير امتحان الايلس يطلع ما ليشى علاقة بكل اللى قريته , المهم الاتفاقية ماشية وفلوسهم وصلوهم وفخار يكسر بعضه , بينما الطلبة الاخرين يديرولهم فى استبيان ونصائح وتوجيهات ووين مفروض يقرأ وعلى شن يركز , الكثير من العراقيل التى لا يسع الان دكرها يعانى منها الطلبة هنا يبدو انها غائبة عنك , وهذا واقع اخى الكريم وليس كلام منتديات فقط والله على ما اقوله شهيد .
شكرا مرة تانية على رايك بارك الله فيك .
