زيارة وفد من وزارة التعليم العالى ليبيا الى كندا لمعرفه مشاكل الطلبه مكون من 8 افراد وطاهر بن طاهر

الصراحه ما عرفتش شنو السر الخطير جايين فى مهمه وموضوع غامض كيف متواجدين فى كندا سياحه والا شنو وبعدين كيف ما لم يجتمعو بالطلبه واصلا الطلبه ما عندهمش علم بالزياره وعلى اساس يحلو فى المشاكل الخاصه بالطلبه والسفارة والمكتب الكندى عندهم علم ولم يبلغونا
      ياريت اللى عنده معلومه ايفيدنا

بارك الله فيك يا اختى ممكن تنزل صورة من المذكرة حتى الطلبة يناقش المذكرة بالك حد عنده اضافة او ملاحظة بارك الله فيك لان لا علم لنا بهذه المذكرة ولا بالطلبة الذين سوف يحضرون الاجتماع ولا بالوفد ....صراحة انا متابع الموفد ولم ارى اي عنوان يخص الوفد الزائر او المذكرة المطروحه...
بارك الله فيكم على مجهوداتكم واتمنى ان يتوصلوا الى حلول للمشاكل التى تواجه الطلبة في اقرب فرصة

thank u

عدل سابقا من قبل اسمر في الجمعة 13 ديسمبر 2013, 2:08 pm عدل 3 مرات

فى البدايه اشكرك جدا جدا اخت حنان لما قدمته لى من مساعدة ولن انساه تلك المساعده الطيبه جعلها الله فى ميزان حسناتك وهذا ما هو معروف عنك مساعدة لاغلب الموفدين ولكنى كنت وقد انشغلت الفترة السابقه ولم اتواجد على الموفد نهائيا بسبب بعض الظروف ولكنى بكل صراحه ليس لدينا علم بشئ ولا حتى المذكرة واود منك عرض المذكرة لان لدى مشاكل ربما تكون غير مطروحه فى المذكرة وايضا بكل صراحه اجد ان لماذا طالبين فقط  المفروض على الاقل عشرة طلبه لان سياسة المدراء ودبلوماسيتهم تحتاج اكثر من اثنين للمناقشه معهم هذا ما اجده من وجهه نظرى ومن معرفتى لطريقه المدراء
 وان شاء الله نسمع كل ما فيه خير لكل الطلبه وتحل كل المشاكل وشكرا

يا اخوان الي ما يعرفش والا ماعنداش علم هدا لا يعني اي شي غير الي يعرفه غلط او تلخبيط

الاخوان الي اجتمعوا بالطاهر بن طاهر اليوم هما اصحاب المبادرة التي بدؤها من الصفر مشكورين وانا هنا يجب ان انوه الى اني لا اعرفهم شخصيا ولاكن الي نعرفه انهم قام بجمع ما استطاعو من ايميلات الطلبة في كندا وراسلوهم جميعا وعقدوا اجتماعات وناقشوا المشاكل العامة التي يتعرضوا لها.
وبعد دلك قامو بصياغة هده المشاكل وصياغة المدكرة وتم ارسالها لكل من تمكنوا من جمع ايميلاتهم للموافقة او الرفض او لدكر مشاكل اكتر في حال وجودها
وبمجهود فردي تم الدهاب للسفارة والمكتب الكندي واعتقد ان زيارة الطاهر هي نتيجة لهده الجهود
الجدير بالدكر هنا انه وبما ان المبادرة هي مبادرة شخصية بالتالي من الطبيعي ان العدد الدي جمعه من الطلبة ,والدي هو ليس بالعدد القليل, هو ليس كل طلبة كندا وهدا شي طبيعي مع ان في كل ايميل طلبوا ان يتم الارسال لاي شخص تعرفوه .... 
الناس الذين للاسف لم يعلموا بالموضوع هدا للاسف شي خارج عن القدرة والحمدلله الذي تم الوصول لهده المرحلة. وبتفكير منطقي بسيط ف المشاكل التي تواجه الطلبة هيا مشاكل عامة والحلول ستكون عامة ومتل هده الزيارات والمبادرات لم تكن يوما لمسائل شخصية

هده فقط كلمة حق لما اعرفه عن المبادرة وانا هنا لست بصدد الدفاع عن اي شخص انما رأي شخصي مدعوم بحقائق وليس كلام من فراغ

السلام عليكم ورحمة الله وبركاته
الاخ : اسمر
اود ان اعلق على كلامك بخصوص لقاء الطلبة بالطاهر بن طاهر والمكتب الكندي وأقول لك بأنه مردود عليك لأنني  احد الطلبة الذين وقعوا على تخويل هذان الطالبان للقاء السفير الليبي قبل اسبوعين ولقاء الطاهر بن طاهر اليوم الخميس في اوتاوا وهي ليست توقيعات مزورة والله على ما اقول شهيد.
اخي الكريم تم نشر المذكرة التي تضمنت كل مشاكل الطلبة الليبيين في كندا تم نشرها على الانترنت وذلك ليطلع عليها كل الطلبة وقد قمنا بدورنا بإرسال لكل الطلبة الذين نعرفهم عن طريق البريد الالكتروني وقد وصلت هذه المذكرة الى اوتاوا ومونتريال وكالغري وادمتون وتورنتو وعدة مدن كندية. قد تكون احد الطلبة الذين لم تصلهم هذه المذكرة ولكن هذا ما قدرنا الله على فعله. كذلك هناك عدة اعضاء في هذا المنتدى لديهم العلم ولعل احدهم الاخت حنان احد مشرفي هذا المنتدى.
الشيء الاخر لماذا لم يحرك الطلبة الاخرون اي ساكن تجاه ما يعانيه الطلبة الليبيين في كندا إلا في لحظة لقاء هؤلاء الطلبة بالطاهر بن طاهر و غيره .. اين كنتم من تلك المعاناة التي يعانيها بعض الطلبة والله يعلم بهم وللعلم بان الطالبان الذين ذهبا وقابلا السفير الليبي والطاهر بن طاهر هم من الطلبة الذين لم يتقاضوا المنحة منذ شهر 4 الماضي وهم اصحاب عائلات وأنت تعلم كم هي المعيشة في دولة مثل كندا.
فيا اخي الفاضل حاول ان تتأكد قبل ان تظلم الناس بسوء الظن وان قاموا بشي فهو لمصلحة الجميع وليس للمصلحة الشخصية.
اخيرا وليس اخرا هناك مساهمة لإنشاء اتحاد الطلبة الليبين الذي سيساعد في متابعة وحل مشاكل الطلبة في كندا وهذه المساهمة منشورة على الانترنت ليشارك فيه كل الطلبة الليبين في كندا وهذا رابط المساهمة.
https://docs.google.com/spreadsheet/ccc?key=0AqeqaqEMsNMBdGVwTFlVamVoeXZnay1Kb19aSnlVQkE&usp=sharing#gid=0

عدل سابقا من قبل nasser75 في الجمعة 13 ديسمبر 2013, 6:32 am عدل 1 مرات

مش عارفة شن نقول ؟؟؟؟؟؟
الاخ اسمر اظنك عرفت من هما الطلبة و شن القصة بالظبط
الاخ ناصر اني عندي علم بالموضوع و من شهر 6 و اني نحاول اندير شيء لخوتي اللي واقفة عنهم المنحة
اول شيء درته كان رسالة خطية سلمها وزير التربية و التعليم الدكتور عي مفتاح عبيد لكل من وزير التعليم العالي و رئيس الحكومة
و ووعدوه خير و ما صار شيء
بعدين راسلت شانا في المكتب الكندي نبيها ترسل ايميل لكل طلبة كندا علشان انديروا اتحاد طلبة و فتحت قروب ع الفيس خصيصا للاتحاد المشكلة طلبة كندا مش متجاوبين ابدا و اني في النهاية بروحي ما نقدر ندير شيء
لو سمحتوا بدل ما تتهموني بالتقصير شوفوا انفسكم
وينكم اللي يوصل كندا او حتى يحصل تأشيرة ما عاد يندري على باقي الموفدين معقولة !!!! الا من رحم ربي
الباين اني راح نسيب هالمنتدى لان راسي داخ من محاولتي تغيير العالم بس العالم قاعد كيف ما هو

اختي حنان
انا لم اقصد تجريحك بالكلام او اتهامك بالتقصير فقط كنت أوضح للأخ اسمر انا كان عندنا علم بالمبادرة لمقابلة السفير والطاهر بن طاهر وذكرتك على سبيل المثال لأنك احد مشرفي القسم


عذرا للازعاج



عدل سابقا من قبل nasser75 في الجمعة 13 ديسمبر 2013, 6:33 am عدل 1 مرات

اني اسفة لاني عصبت بس حال يقهر طلبة امريكا ماشيين في تكوين الاتحاد و احني نتعاركوا و ما نندرو  على شيء
اني وصلت لدرجة اليأس من بعض او اغلبية طلبة كندا
الله المستعان

السلام عليكم
ارجوا من الجميع عدم الاسراع فى الاتهام الاخر وكل شخص له الحق فى الرد بالاسلوب الراقى لانكم طلبة ماجستير او دكتوراة ولقد لحظة من الردود بعض الطلبة يرددون عبارات اين كنتم وين مشاكلكم وقريب تقولوا من انتم ...واللى دار حاجة يحتسبها لله وارجو منكم عدم التعميم ....نحن نقصد لماذا المشرف على الساحة الكندية بالموفد لم يضع عنوان يطرح فيه المذكرة قبل موعد اللقاء بالدكتور نحن لا نعارض على الاسماء بارك الله فيكم وكلنا يد واحده ان شاء الله ا...نحن نقصد لمذا لم يتم التعميم لكل اطلبة في المنتذى وليس بالارسال عبر رسائل خاصة اخى ناصر المفروض مذكرة موجوده على موفد متاحه لكل الطلبة ...ارجو الرد بهدوء وعدم اتهام الظرف الاخر ...نحن طلبة دراسات عليا....ونحي كل طالب يسعه للخير ولا اتهم احد بالتقصير كلنا مقصرين

بارك الله فيك اخي ناصر على الكلمات الراقية وجزاك الله خير ,,,,,وكل عمل تقومون به خير ان شاء الله  اجعله لله وفي ميزان حسناتكم....اتمنى منكم التقدم للامام  وعدم الرجوع للخلف لان ارى بعض الاحباط من الاخت يجب عليها  الاستمرار في العمل وبالتوفيق  لكل الطلبة وخاصة انت اختى صراحة كلمة حق لك انت دائما نشطة في المنتذى ويجب الاستماع لكل الاراء الايجابية والسلبية   ...ولا يهمكم الكلام المهم الفعل ....بارك الله فيكم

thank u

عدل سابقا من قبل اسمر في الجمعة 13 ديسمبر 2013, 2:11 pm عدل 2 مرات

خوي اسمر معليش لكن ياريت لو اسلوبنا يكون حاضاري اكتر يعني نحن اللي مش دكتوراه ماجستير و بعدين كيف عرفت الكلام اللي قاله بن طاهر وعلى اساس انت ما عندكش علم حتى بالزيارة وعلى ما اعتقد اغلب مشاكل الطلبة مادية فادا تكلم الراجل علي فلوس ليبيا المجمدات مش جريمه والله تبيهن يطلعن صدقة لكندا  بانسبة لاختي حنان يا ريت يكون بالك اوسع لانك مازلتي في البداية انت من الناس اللي تعول عليهم ليبيا لما ترجعي انشالله لانك صاحبة مبادرة وعند حب لمساعدة الغير بدون مقابل

الأخ وليد
( أرجوا من الجميع عدم الاسراع فى الاتهام الاخر وكل شخص له الحق فى الرد بالاسلوب الراقى لانكم طلبة ماجستير او دكتوراة ولقد لحظة من الردود بعض الطلبة يرددون عبارات اين كنتم وين مشاكلكم وقريب تقولوا من انتم ...واللى دار حاجة يحتسبها لله وارجو منكم عدم التعميم ....)

مش عارفة يا خوي وليد شن نقول الحق !!!!!!!

اني ما نتهم في حد زور بالفعل طلبة كندا الا من رحم ربي سلبيين 
بعدين اني ما عممت لاني قلت( الا من رحم ربي)و قلت( بعض او اغبية طلبة كندا )يعني العبارات هادم ما شفتهم مثلا !!!!!!

.(اللى دار حاجة يحتسبها لله وارجو منكم عدم التعميم) 
ما في حد تجمل بأنه ساعد موفد ثاني لا اني و لا غيري تجملنا على اي طالب .... يا ريت انت اللي ما تعمم 


( نحن نقصد لماذا المشرف على الساحة الكندية بالموفد لم يضع عنوان يطرح فيه المذكرة قبل موعد اللقاء بالدكتور)
للأسف المشرف (اللي هو أني )  كان عندي نهائي و عندي مشكلة و ربي يعيني على حلها و رغم هكي اني ندير في جهدي نقدم المساعدة لأي طالب



( نحن نقصد لمذا لم يتم التعميم لكل اطلبة في المنتذى وليس بالارسال عبر رسائل خاصة )


أي رسائل خاصة !!!!!!!

يعني لو عندي وقت نرسل المذكرة علاش ما نحطها ع الموفد علاش بنرسلها ع الخاص بس !!!!!

( فصبر جميل و الله المستعان على ما تصفون )

اختي فطمة

اني وسعت بالي هلبه و نشوف في الانانية و السلبية كل يوم و من هلبه موفدين للأسف  و هذا مش تعميم هذا الواقع
اللي ياخذ التأشيرة ما عاد نشوفوه الا اذا عنده سؤال ع التفويض او التذاكر ( طبعا الا من رحم ربي بيش الاخ وليد ما يقول تعميم و ما تعميم و من أنتم !!!!!)
راجعوا المواضيع و شوفو المشاركات يعني حتى الموضوع اللي حطيته للي قدموا اونلاين و عندهم الرغبة يساعدو الباقي كان المشاركة فيه بسيطة و من قلة من الموفدين ربي يبارك فيهم
وين الباقي و بالفعل للناس السلبية و اللي ما تحب الخير الا لنفسها بنقوللهم ( من أنتم !!!!!! ) يا خوي وليد 
تقبلوا مروري و فائق احترامي لاي شخص يحب يساعد حتى بكلمة

نسيت الأخ (فري ليبيا - المتسرع صاحب اليبرة ههههههه     ) رغم هذا البوست الثاني بين لنا رقي أخلاقك وحسن نيتك تقبل إحترامي .....  والسيد فريد أقدر عقلانيتك وتحليلك المنطقي والسعي للتوفيق.

hanan_canada كتب:

الأخ حنان
(
مش عارفة يا خوي وليد شن نقول الحق !!!!!!!

اوكى بارك الله فيك على الرد ممكن كلامى مش مفهوم او انت لم تفهمى المضمون الرسالة لانها ليست موجهه لك اختى فقط لم اذكر اسمك اولا والرد اتانى من الاخ المحترم ناصر بارك الله فيه 

اني ما نتهم في حد زور بالفعل طلبة كندا الا من رحم ربي سلبيين 
بعدين اني ما عممت لاني قلت( الا من رحم ربي)و قلت( بعض او اغبية طلبة كندا )يعني العبارات هادم ما شفتهم مثلا !!!!!!

والتعميم اقصد هنا ليس للرد على رسالتك التعميم بصورة عامة يا اختى .....لكل الطلبة الموفد

.(اللى دار حاجة يحتسبها لله وارجو منكم عدم التعميم) 

ما في حد تجمل بأنه ساعد موفد ثاني لا اني و لا غيري تجملنا على اي طالب .... يا ريت انت اللي ما تعمم 

اوكي بارك الله فيك لكن العبارة موجهه لكل الطلبة ارجو منكم عدم التعميم هل قلت ارجو من الاخت او الاخ اقصد كلنا بما فيهم انا وانت والكل عدم التعميم 

( نحن نقصد لماذا المشرف على الساحة الكندية بالموفد لم يضع عنوان يطرح فيه المذكرة قبل موعد اللقاء بالدكتور)
للأسف المشرف (اللي هو أني )  كان عندي نهائي و عندي مشكلة و ربي يعيني على حلها و رغم هكي اني ندير في جهدي نقدم المساعدة لأي طالب

اوكي مفروض الواحد يضع الطلبه في الصورة قصدى مش عدر انك مشغوله لانك استلمت الموفد يجب عليك وضع وقت للردود على الاسئلة او الاستفسارات في المنذى لانك المسئولة عن المنتذى الكندي او اترك لمن هو يملك الوقت ......والجهد وبارك الله فيك على كل عمل قدمته للمنتذى

( نحن نقصد لمذا لم يتم التعميم لكل اطلبة في المنتذى وليس بالارسال عبر رسائل خاصة )


أي رسائل خاصة !!!!!!!  هذه كلام الاخ ناصر قال ارسالنا المذكرة للاشخاص الذين نعرفهم بالبريد الالكترونى ,,,,,,,,,

يعني لو عندي وقت نرسل المذكرة علاش ما نحطها ع الموفد علاش بنرسلها ع الخاص بس !!!!!
هذه سؤال مطروح لماذا لم تقوموا بوضع المذكرة وانت قلت من شهر 6 المذكرة موجوده والان نحن في شهر 12 فترة طويلة ؟؟؟؟؟؟ 

( فصبر جميل و الله المستعان على ما تصفون )
من يريد النجاح يجب عليه تقبل النقد او الرأى الاخر ولو كان مخطى ......اتمنى ان يكون الصبر عند كل الطلبة 
ا

الاخوة الاعزاء السلام عليكم ورحمة الله و بركاته و وفقكم الله لما فيه الخير وجعلكم اخوة متحابين في الله
الملف المرفق يحتوي المذكرة المطلوبة مع العلم باني لست من طلبة كندا و لم اعلم بهذا الموضوع اصلا لقد بحث عنها لكم فقط ليس الا

السلام عليكم اخوتي جميعا: انا جديد في الموقع بس للامانة الشباب اللي مشو للسفارة ومشو لمقابلة طاهر بن طاهر اعرفهم جيدا وهم على خلق عالي ويتمنو يخدمو الكل لوجه الله..جعله الله في ميزان حسناتهم.وحد علمي ان معظم المشاكل اللي يعانو فيها الطلبة واللي ممكن يعانوها اللي ما عانوهاش وان شاء الله ربي ما يجيبها المعاناة قد تم تضمينها في المذكرة ومعظمها مساهمات من الطلبة الاخرين..واعقد ان معظم الطلبة يعانو من نفس المشاكل..قد لا تجتمع في واحد ولكن معظمها ما لم تكن كلها. لذلك باركو اللي صار وادعو لكل من ساهم والجايات اهم من اللي فاتو..احنا ولاد اليوم هيا انشطو وخلينا نتكاتف لصالح ليبيا ولصالح صغارنا ولصالحنا فالمصلحة واحدة..حاليا ادعوكم وبشدة للمساعدة باراءكم ومساهماتكم وانضمامكم لاتحاد الطلبة الليبيين في كندا..الموضوع مش ساهل ويحتاج افكار ومساهمات.سواء بالفكرة بالرائي او بالمجهود..اللي عنده جهد ما يدخراش لاننا حنديرو شي للاجيال القادمة وللموفدين اللي بعدنا..عن نفسي ماعادش هلبة ونكمل ونروح وكذلك عن الشصين اللي باذلين مجهود..يعني الللي يدير حاجة للصالح العام ولصالح البلاد وتخدم خوته حتقعدله صدقة جارية باذن الله. توكلو على الله وساهمو بالله عليكم ..اللي ماعنداش مشكلة يساعد خوه اللي عنده مش يقعد سلبي مادام ما طق فيه شي. نعرف اخوة الله يهديهم ما ساهموش حتى بكلمة نعم او لا.ليش؟؟ لانهم ما عندهمش مشاكل للاسف..مش هذي الفكرة اللي نبوها (اخطى راسي وقص) لاننسى الحديث الشريف ( من كان في عون اخيه كان الله في عونه) انا مسرور وممتن من الحوار اللي صار بيناتكم وانتم معظمكم ما حد يعرف الثاني الا باسمه او اسمه المستعار..هكذا هي الديمقراطية نقاش واختلاف حتى تتقارب وجهات النظر لصالح الجميع  ويقتع المخطيء ويساهم في الفكرة الصحيحة. كلام هلبة في خاطري بس نحس في روحي كثرت..ربي يوفقكم وايسرلكم اموركم.
زميلكم في الساحة الكندية

ahmed2222 كتب:

الاخوة الاعزاء السلام عليكم ورحمة الله و بركاته و وفقكم الله لما فيه الخير وجعلكم اخوة متحابين في الله
الملف المرفق يحتوي المذكرة المطلوبة مع العلم باني لست من طلبة كندا و لم اعلم بهذا الموضوع اصلا لقد بحث عنها لكم فقط ليس الا





بارك الله فيك اخي احمد على مجهوداتك مع انك لست من الطلبة كندا كما قلت ولم تعلم بالموضوع اصلا ..