انا من طلبة الدبلوم اللي ما صارلهمش كندا

الله يبارك فيكم ممكن تنصحوني انا نقرى بريطانيا او ماليزيا  معادش عرفت كيف اندير بصراحه دماغي تبرمج على اساس كندا بس الله يسامح اللي كان السبب
ارجوا سرعة الرد مع التوضيح لانه فترة القرار قريب تنتهي

اني ماعنديش خلفيه علي تخصصك يا اختي .. لكن راي شخصي بريطانيا انشوف فيها احسن ومزاياها هلبه ..القرب من اهمها ..ان اللغه الانجليزيه هي اللغه الام وهادي ميزه للطالب وللي عنده صغار ياخدوا اللغه من الشارع استثمار في الصغار يعني ... الجاليه الليبيه كبيره في بريطانيا وهادي تخفف من الام الغربه للعنصر النسائي لان قلوبهم رهيفه شويه .. بعدين انجوا للجانب العلمي .. خيارات الدراسه اكثر واوسع سواء في مرحلة اللغه او الاكاديمي نظرا لوجود عدد كبير جدا من المعاهد والجامعات .. هذا بالنسبه للايجابيات .. اما السلبيات .. عندك مثلا كثرة الرفض من السفاره واني شخصيا رفصوني مرتين الانجليز والكنديين قبلوني ..( قريب كتبت في الموفد اللي يبي ايدير افاري بتاشيره كنديه مقابل تاشيره انجليزيه ^^ .) وعندك جودة التعليم في بريطانيا متفاوته تلقي جامعات عالميه وتلقي جامعات مشي حالك بمعني فيه اللي يروح بشهاده وكانه ماقراش حرف ... هادو ملاحظات نظريه مش عن تجربه شخصيه وتوا باقي الاخوه يشاركوك برايهم وعينك ميزانك .

أنا من رأي تجي يوم الاربعاء 8/1/2014 للبعثات والا لوزارة التعليم العالي وتشاركي في الوقفة الاحتجاجية والاعتصام

أني رأيي لو إنك مزال مقدمتيش على التأشيرة غيري بريطانيا أفضل لان المشكلة مش معروف أمتى تنحل ومرات أطول

انا ارى ان تختاري تركيا وذلك للاسباب الاتية:
         1- سهولة الحصول على التاشيرة وبالتالي اتمام باقي الاجراءات ، خصوصا وان الزمن مهم بالنسبة لك.
         2- توجد بتركيا جامعات امريكية، اي الدراسة باللغة الانجليزية .
         3- يمكنك الحصول على قبول اكاديمي دون تعقيد كما هو في بريطانيا وكندا وغيرها  بالنسبة للدبلوم العالي.
         4- تركيا في الفئة الرابعة بالنسبة للمنحة الدراسية اي مثل كندا واعلى من بريطانيا .
         5- تستفيدي من الوقت وتتمكني من تقوية لغتك الانجليزية ، ويمكنك تغيير بلد الدراسة اذا  اردتي  التغيير ، وربما
           تتغير الامور بالنسبة لكندا  من حيث اجراءات القبول فتتاح لك الفرصة في التغيير.
         والله ولي التوفيق.

أخت فطمة عبدالقادر ننصحك اتغيري من الساحة الكندية لأنه مش معروف ترجع الأجراءات زي قبل او لا وحتى لو رجعت مش معروف متى وبالنسبة لبريطانيا وماليزيا لكل منهم مزايا بس عن تجربتي وتجربة عدد كبير من الطلبة بالنسبة لبنت مسلمة رح تتريحي وتتأقلمي في ماليزيا أكثر .... وجهة نظر ولكل منا رأيه

انى حسب معلوماتى ان تركيا فيها مشكلة بالنسبة للحجاب لانى انى شخصيا كنت نبى الساحة التركية اول ما طلع ايفادى (عام 2010) وسالت كويس عالحجاب فى الجامعات قالولى ممنوع. . لكن انت شوفى مرات عادى توا. . المهم قبل ماتنفذى على تركيا اسالى على الموضوع هذا كويس. .. موفقة يا اختى. .

الله يبارك فيكم الجميع و يعطيكم حسنات قد الحروف اللي كتبتوها و اضعاف مضاعفه مشكورين جدااااااااااااااااااااااااااا والله
 

السلام عليكم
أختى فاطمه الموضوع ادرسيه جيدا والاهم من كل شى أستخيرى  ومن رأى تركيا مش خيار جيد مع احترامى الخوة يلى ينصحو بتركيا أنى انحبد الدول يلى العلم عندهم ليه أساس اقوى لأنك ابترجعى لبلادك ويتعلموا عل ايديك اجيال خودى الموضوع من عدة جوانب اللغة والقبول الأكاديمي  ومصاعب الحياة اليوميه وتعليم الأطفال والفرص المتاحة للمرافق وبعد المسافة حتلقى أحسن وحده بريطانيا وإنشاء الله ربى ايقدملك يلى فيه الخير ليك

مع احترامي للا خت dr.aida  ، الا انها على مايبدو لم تقرا جيدا ما كتبته الاخت فطمة ، لان الامر لا يتعلق بافضل مكان  وانما افضل بديل للحل اخذا في الاعتبار الظروف المتعلقة بكل شخص طبعا .
 اما اذا تعلق الامر بافضل بلد للدراسة من الناحية العلمية بفرض ثبات باقي العوامل الاخرى فانني اقترح الاتي :
   1- كندا
   2- امريكا
   3- المانيا
   4- بريطانيا
واخيرا اذكر بالمثل الشعبي التالي ( عيش كيف ماتلقى مش كيف ماتبي).

ابحكم امجرب وكيف ايقول المثل اسأل امجرب ولا تسأل طبيب
بالنسبة لي سبق وان درست الماجستير في بريطانيا والان وادا سخر الله بنرجع للدكتوراة خدي كل الايجابيات التي دكرها الاعضاء في الاعلى واضيفي عليها انك في بريطانيا كل الخيارات متاحة
و بالنسبة للرفض من خلال مراجعتي لمعظم اسباب الرفض اتضح لي انة غالبيتها لعدم خبرة من يقوم بتعبئة الابليكيشن للطلبة او لعدم اخد بتفاصيل التأشيرة الانجليزية او محاولة بعض المتقدمين للتأشيرة من عدم تحري الصدق في بياناتهم ومستنداتهم 
والله الموفق