بعد الكشف الطبي تغيرت جوازاتي شو لازم ندير

السلام عليكم
ربما اضطر الى استخراج جوازات جديدة وانا حاليا في مرحلة الكشف الطبي
فما هو الاجراء المتبع في هذه الحالة هل اراسل السفارة ام ماذا

عدل سابقا من قبل الحمروني في الأربعاء 15 يناير 2014, 5:40 pm عدل 1 مرات

وين اهل الخبرة

الاخت حنان كندا رايك في الموضوع

الحمروني كتب:

وين اهل الخبرة

أخي الكريم سامحني نحس فيك لخبطط روحك هكي أنت لما قدمت كان رقم الجواز.......... الي هو الان موجود في ملفك عندهم ولما بتغيره بيطلغ رقم تاني مش نفس الرقم  قصدي الامور هذه المفروض تكون محسوبة من البداية قبل التقديم خير من تلقى روحك في دوامة وقصة طويلة تانية وأنت عارف الاولى أني ننصحك لو جوازك مدته 6 شهور أو أكثر خلي الامور ماشية, ونزيدك حاجة تانية الاستيكر متع التأشيرة الي بيركب في جوازك فيه رقم الجواز وأنت قلت درت الكشف الطبي يعني ممكن تكون التأشيرة جاهزة واسمك ورقم الجواز فيها

المشكلة يا اخي ان سيارتي سرقت مني وبداخلها جوازت السفر 
ما فيش حل عندي الا استخراج جوازات جديدة
بصراحة كلامك اشعرني بالاحباط

لاحول ولا قوة الا بالله...

الحمروني كتب:

الاخت حنان كندا رايك في الموضوع

سامحني يا خوي كيف شفت الموضوع و الحق اول مرة تفوت عليا قصة زي هذي و ربي يعوضك في السيارة و اللي فيها ودفع الله ما كان اعظم
نصيحتي تستخرج جوازات بسرعة و تحصل ورقة من جهة رسمية ان جوازاتك انسرقت و تمشي للسفارة او مكتب التأشيرات و تحكيلهم ع القصة و تعطيهم الورقة اللي تدعم كلامك و ان شاء الله راح يتفهموا الوضع
اهم شيء فوض أمرك لله و توكل عليه و هو رحمن رحيم
بالتوفيق

انشالله ربي يعوضك خير ودفع الله ما كان اعظم . وندعولك يارب تلقي السيارة والخوازات ويسرلك ربي الامور .

ربي يعوضك خير، و يسخر لك الامور

ربي يعوضك خير إن شـاء الله

السلام عليكم 
اخي الكريم اولا  ربي يعوضك خير في السيارة ودفع الله ما كان اعظم 
بخصوص الجوازات انا رأي مادام التاشيرة ماصدرتش مازال معناها عندك  وقت تتدراك الموقف اول شي اكيد انت درت بلاغ على السيارة والجوازات عند مركز شرطة   ،  ترجمه وتسرع في اصدار جوازات جديدة ويكون نفس الاسم عربي وانجليزي بدل فاقد ممكن يعطوك نفس الرقم  او يصدرولك من الجوازات الجديدة  خوذ معاك قرار الايفاد بيش يتفهموا  وضعك لان انت عارف النظام ،الجوازات لما يريح منك تبي سنة بيش يصدروا جديد  
اهم شي تسرع بابلاغ السفارة ان جوازاتك راحت بيش يديروا اللازم يعني يوقفوا اجراءك مؤقت
وانا راي إن شـاء الله راح يتعاونوا معاك الكل ويقدروا ظرفك 
واحيرا انقولك هذا اجتهاد مني وراي  لكن توكل على الله  وراح اتشوف النتائج 
وعسى ان تكرهوا شيئا وهو خيرا لكم 
تحياتي  خوي

بارك الله فيكم كلامكم شجعني

الحمروني كتب:

بارك الله فيكم كلامكم شجعني

اخي الحمروني سامحني انت من البداية مقلتش جوازاتي سرقت هذا السبب الي خلاني نصحتك متغيرهمش المهم إن شاء الله خير وزي منصحوك الزملاء أسرع في إبلاغ السفارة إن الجوازات سرقت وبإدن الله مفيش مشكلة أمس مشيت للسفارة في البرج مع صديق عنده التأشيرة الكندية وصغاره مزقوا الصفحة الي فيها التأشيرة شوف الحظ أيدهم جت علي صفحة التأشيرة وكانت الصفحة يرتى لها طبعا حني ماشيين ومتوقعين إن معندهمش حل لان الصفحة مشركة بالكامل المهم لما وصلنا حكينالهم القصة وعطيناهم الجواز شافوه لغوا التأشيرة الاولى وداروله وحدة تانية وخلص 40 دينار وروحنا أني نتوقع إن سرقة جوازتك قبل متاخد التأشيرة موضوعهم اسهل من لو ان فيهم التأشيرة طبعاً اني نتكلم من ناحية المعاملة مع السفارة و إن شاء الله يديرولك حل يارب

بارك الله فيك اخي طارق
انا طبعا اتممت اجراءات الجوازات الجديدة
بعد التبليغ ومشيت للمنظومة والعديد من الاجراءات
وحصلت موافقة استخراج جوازات جديدة
في خلال اسبوعين تصدر ان شاء الله

اليوم مشيت للسفارة في البرج وحكيتلهم عن قصتي وسرقة جوازاتي
كلمولي مارغريت وبصراحة كان جوابها مفرح ومحزن في نفس الوقت
قالتلي انهم ماعندهمش مشكلة في تغيير الجوازات يبو صورة من الجوازات الجديدة فقط
هذا الخبر المفرح
أما المحزن فانها قالتلي أن الجوازات الجديدة كندا لم تعترف بها حتى هذه اللحظة

اليوم قدمت على الجوازات الجديدة والحمد لله
اتوقع ان اتحصل عليها مع قرب حصولي على التاشيرة باذن الله

نسأل الله ييسر امورك،وعوضك الله خيرا في ماسرق منك، وبالنسبة للجواز الجديد أتمنى من حكومتنا تنوض 5 دقايق تعمم الدول ع الجواز الجديد وبعدين ترجع ترقد

فعلا والله يا ريتهم يعممو بس

السلام عليكم، بالله طمنا اخ حمروني شن صار معاك طلع جوازك ولا ماطلعش والسفارة زعما يقبلوه منك ولا كيف؟

جوازي قالولى اسبوع ويطلع
والسفارة طمنوني بصراحة وقالولى ان موضوع اعتراف كندا بالجوازات الجديدة مسألة وقت ليس إلا

ان شاء الله خير, ربي يوفقك

فكرة ممتازة اخت حنان, وان شاءالله السفارة يقولوا ان ها الشي عادي وجائز

hanan_canada كتب:

الاخ الحمروني عندي سؤال و يا ريت تسأله بالنيابة عني في السفارة او مكتب التأشيرات
هل لو طالب موجود بكندا و جوازه قريب تنتهي مدته يقدر يقدم على التأشيرة اونلاين من داخل كندا و يستلمها في ليبيا بالجواز الجديد ؟؟؟ يعني مثلا اني بنجدد تاشيرتي اونلاين من داخل كندا بس بندير اني نبي نستلم التأشيرة من طرابلس و نروح نغير للجواز الجديد هل يعطوني التأشيرة ؟؟
ممكن هكي يكون حل لبعض الطلبة اللي عندهم مرواحة لليبيا و جوازاتهم قريب تسقط و بالتالي يضمنوا انهم يحصلوا التأشيرة بسرعة و قبل ما يروحوا ليبيا و يرتاحو من قصة تشحوير التأشيرة

ربي يفتح عليك

حسب ماهو منشور في موقع الجوزات و الهجرة الكندية:
canadainternational.gc.ca/austria-autriche/visas/FAQ.aspx?lang=eng#c6




عدل سابقا من قبل أبو ذر الغفاري في الخميس 30 يناير 2014, 4:21 pm عدل 1 مرات

حسب كلامك أخي ابوذر انك يجب ان تقدم على التاشيرة بالجواز الي انت بتجي بيه لكندا
الا في حالة احيط بكم زي حالتي وسرقت جوازاتي وحيث انني قدمت بالجوازات القديمة التي سرقت مني
وبالتالي انا جبتلهم افادة من مركز شرطة بتبليغي عن جوازات مسروقة
وهما طلبو مني فقط صور الجوازات الجديدة حال صدورها