نصيحه لوجه الله بخصووص الطلبه القادمين الي كندا

السلام عليكم
في مثل يقول (اسئل المجرب ماتسئلش الطبيب)
توصلوا بالسلامه
اللي يبي يجي الي كندا لازم يجي بعد عشرين في  الشهر اقل شيء لان اول ماتوصل لكندا سوف تسكن في فندق اسعاره معروفه بالليله وغاليه وتوجد شققه فندقيه رخيصه بالاسبوع هذا لو في تورونتو لان ايجار الشقق يبدا من بدايه الشهر وبالعاده يكون الايجار لمده سنه وادا تحصلت علي شقه في بدايه الشهر سوف يطلبوا منك شهرين مقدم الاول والاخير والشقه يكون فيها (الغاز +الثلاجه+الغساله+المجفف +غسالة الصحون+دوىب المطبخ ) وانت تشتري الباقي غرفة نوم مثلا واهم شيء لما توصل ابدا بمراسله المكتب الكندي وبالعاده اول منحه سوف تاخدها بعد شهر او شهر ونصف المعني من كلامي بعد ماتتوكل علي الله وتنوي السفر الي كند دير في جيبك اقل شيء 10000$دولار ولو إن شـاء الله مايصيرش زي ماصار لينا توه في المنحه تلقي روحك تتصل باهلك وتقول نبي فلوس والله في عون العبد مادام العبد في عون اخيه وتمنياتي بالتوفيق والنجاح لكل الطلبه الموفدين واللهم احفظ بلادنا وجميع بلاد المسلمين................

بارك الله فيك اخى ويجعله فى ميزان حسناتك

جزاك الله خيرا

بارك الله فيك      باهي الواحد من وين بيجيب 10000 $ صعبااااااااااااااااااااات

إن شـاء الله خير

بارك الله فيك يا طارق
باهي اللي بيسكن عند عائله هذا كيف حتمشي اموره بمعني يقدر يسكن في اي وقت وكيف بيكون الاتفاق معاهم بالزبط يا ريت يا طارق تعطينا شوية معلومات علي السكن مع عائله - امتي المفروض نوصل - قداش قيمة الايجار في المتوسط - هل نقدر نسكن عندهم شهر ولو ما عجبتنيش العيله انغير من غير تكاليف اضافيه ... واي اصافه تثري الحديث بارك الله فيك .

بارك الله فيكم

ياخوي علي اهلا وسهلا بيك لوجاي لتورنتو اي خدمه اتفضل نعطيك حتي رقم الهاتف ونتلاقي معاك ماعندكش مشكله لاكن فيه طلبه ساكنين مع عائلات مفيش مشكله واهل الخير موجودين حتي من غيري وشكرا

10000 دولار رقم بصراحة........... أني طالب ولا تاجر؟ الموضوع هذا المفروض يشوفولنا فيه حل بصراحة

شكرا ياخوى كارق على النصيحة، وياريت تبعثلى ايميلك على الخاص باش نتواصلوا، لأنى جاى لتورونتو فى المدة القريبة الجاية.

ياطارق ماتزعلش مني هذا الرقم للمتزوج واللي عنده صغار واللي عازب حتي نصف المبلغ ولااقل وانسيت حاجه ضروريه وهي جيب ادويه (لان الدواء في كندا لاياخد من الصيدليه الا بوصفه من الطبيب والطبيب يبي 70 ولا80$) مبدئيا للصداع والحراره والزكام وخاصه اللي عنده اطفال لان اول ماتوصل بتغير عليكم الجو واتوقع كل شيء وماتزعلوش في البدايه وبعدين تتعودوا علي الجو
والسلام

شكرا يا أخي على المعلومه فعلا أسأل مجرب أعانكم الله

السلام عليكم،
شكرا علي المعلومات القيمة..
اعتقد اقل من عشرة الف يمشي الحال،،، اهم شي انشوف ايجار موقع ارخيص،،، لان مرات ماتحصلش ايجار وتبي اتمدد.. 
بالنسبة للعلاج في walk clinic تدخل من غير موعد وتكليف 40 دولار،،،،وفي محلات drug موجود فيه الادوية والمضادات 
في منطقة سكاربور ارخص من الداون تاون
بالتوفيق للجميع

انى اليوم كيف وصلت كندا بعد رحلة طويلة

الحمد لله على سلامتك وربي يوفقك

الحمد لله على سلامتك

علي اي خطوط كانت رحلتك يا ناجي وياريت تعطينا حتي لمحات سريعه عليها لاننا علي ابواب السفر وربي ييباركلك سفرك هذا.

على الدين الديب كتب:

علي اي خطوط كانت رحلتك يا ناجي وياريت تعطينا حتي لمحات سريعه عليها لاننا علي ابواب السفر وربي ييباركلك سفرك هذا.

على الخطوط الانجليزية
برتش ايروس

الحمد لله علي سلامتك ياأخي ناجي ان شاء غير ماتعبنش هي احني مسمينها رحله عذاب

الف الحمدلله ع السلامة، واخيرا يا اخي والله فرحتلك،تريح ونظم امورك وتعالى احكيلنا عن كندا وعن السفر وانطباعك اول ماوصلت

السلام عليكم
افيدونا بالله عليكم:
كيفية الاشتراك ف التامين الطبي؟
وهل هناك شركة واحدة او عدة شركات؟
وايهم احسن شركة لتشترك بها؟

بارك الله فيك اخ طارق ع الموضوع لان فيه هلبه مايعرفوش المعلومه هادي وهي انه الايجار صعب تحصله الا في بدايه الشهر وهدا الي صار معاي وصلت لفانكوفر يوم 29 نوفمبر وماحصلتش شقه واجبرت نقعد ف فندق 17 يوم الى ان حصلنا شقه يوم 15 ديسمبر والحمد لله اولا ومن تم الليبين الي هنا ساعدونا هلبه وكان هدا راهو قعدنا شهر كامل ف الفندق وتعرفو مصاريف الفندق شي خيا

tark gharab كتب:

ياطارق ماتزعلش مني هذا الرقم للمتزوج واللي عنده صغار واللي عازب حتي نصف المبلغ ولااقل وانسيت حاجه ضروريه وهي جيب ادويه (لان الدواء في كندا لاياخد من الصيدليه الا بوصفه من الطبيب والطبيب يبي 70 ولا80$) مبدئيا للصداع والحراره والزكام وخاصه اللي عنده اطفال لان اول ماتوصل بتغير عليكم الجو واتوقع كل شيء وماتزعلوش في البدايه وبعدين تتعودوا علي الجو
والسلام

بارك الله فيك خوي tark

أخي محمود لو معلوماتك دقيقة مشكلة كبيرة خصوصا الي معاه عائلة 5500 دولار أكثر حتى من المنحة الي يعطوا فيها في البداية الواحد يجيب معاه مبلغ مش مشكلة لكن مستقبلاً لاسمح الله تتأخر المنحة ؟؟؟؟؟؟؟؟؟

طارق الغنيمي كتب:

أخي محمود لو معلوماتك دقيقة مشكلة كبيرة خصوصا الي معاه عائلة 5500 دولار أكثر حتى من المنحة الي يعطوا فيها في البداية الواحد يجيب معاه مبلغ مش مشكلة لكن مستقبلاً لاسمح الله تتأخر المنحة ؟؟؟؟؟؟؟؟؟

المبلغ هذا يكفيك لمدة شهر ونص ومن ضمنه مقدم الشقة لأنك عندما تقوم بتوقيع عقد شقة حيطلبو منك إيجار نصف شهر أو شهر مقدم ومع المقدم حتدفع إيجار أول شهر لأن الايجار يتم دفعه في بداية الشهر من أول يوم  وفوق هذا كله المبلغ اللي كتبته أنا يشمل شراء أثاث للشقة لأن الشقة في العادة فيها بساط أو لوح للأرضية وتحتاج لسرير لك وسرير للأطفال 


وأنا كنت واقعي معاك ومتأكد من معلوماتي وكتبت الأرقام بالتفصيل للتسهيل علي الإخوة ومثلا  الأخ طارق قال أن لازم تجيب معاك 10 ألاف  وأنا رددت عليه وقلت أن 5.5 الاف كافية لمدة شهر ونص  "مرحلة التأسيس" للشقة 
ربي يوفقك يا خوي

tark gharabالسلام عليكم
في مثل يقول (اسئل المجرب ماتسئلش الطبيب)
توصلوا بالسلامه
اللي يبي يجي الي كندا لازم يجي بعد عشرين في  الشهر اقل شيء لان اول ماتوصل لكندا سوف تسكن في فندق اسعاره معروفه بالليله وغاليه وتوجد شققه فندقيه رخيصه بالاسبوع هذا لو في تورونتو لان ايجار الشقق يبدا من بدايه الشهر وبالعاده يكون الايجار لمده سنه وادا تحصلت علي شقه في بدايه الشهر سوف يطلبوا منك شهرين مقدم الاول والاخير والشقه يكون فيها (الغاز +الثلاجه+الغساله+المجفف +غسالة الصحون+دوىب المطبخ ) وانت تشتري الباقي غرفة نوم مثلا واهم شيء لما توصل ابدا بمراسله المكتب الكندي وبالعاده اول منحه سوف تاخدها بعد شهر او شهر ونصف المعني من كلامي بعد ماتتوكل علي الله وتنوي السفر الي كند دير في جيبك اقل شيء 10000$دولار ولو إن شـاء الله  مايصيرش زي ماصار لينا توه في المنحه تلقي روحك تتصل باهلك وتقول نبي فلوس والله في عون العبد مادام العبد في عون اخيه وتمنياتي بالتوفيق والنجاح لكل الطلبه الموفدين واللهم احفظ بلادنا وجميع بلاد المسلمين................