يا فرحة ما تمت !!!!!!!!!!!!!!

السلام عليكم ..صراحة اول مرة مانفرحش بمسج يجينا من السفارة !! اومش أي مسج .المسج يلي جانا عدو استلموا التاشيرة .لان المشكلة نحن لدينا جوازات سفر الاكسباير امتاعهم يناير 2015 قلنا انغيروهم افضل من التشحوير بعد تالي لان سفرنا حيكون باذن الله في شهر 8 وفعلا بدانا في الاوراق وغيرنا الجوازات وبالامس استلمت الجواز الجديد اوجانا مسج السفارة  لكن فوجئت بان بيانات الجواز الجديد كلها اخطاء في الاسبلنق اسمي كامل مش نفس الجواز الاول وكذلك اللقب زيدها يا زايد مكان وتاريخ الميلاد مثلا بدل 16 يكتبوا 26 في الاخير قالولنا تدفعوا 100 جنيه ثانية بش نصدروا واحد ثاني !!!!!! نصيحة لوجه الله أي واحد بيغيرالجواز يقرا كل بياناتة وياكد عليهن انهن صح بالعربي والانجليزي لان نحن سالناهم هل تطلع نفس بيانات الجواز الاول خصوصا الانجليزي قالوا نعم ....لكن اكدوا عليهم قبل مايدير صاحب المنضومة برنت

لا حول ولا قوة إلا بالله
لو أي موظف في ادارة الجوازات او البعثات او اي مصلحة حكومية او غير حكومية يضع نصب عينيه قول رسولنا الكريم صلى الله عليه وسلم (إن الله يحب إذا عمل أحدكم عملاً أن يتقنه) لكانت البلاد في ألف خير نسأل الله لنا ولهم الهداية
والله ياأختي لا أعرف الإجراء المطلوب في هذه الحالة وأتمني ممن يستطيع إفادتك أن يفيدك والله المستعان

السلام عليكم 
انا نبي نستفسر ، انا واقع في نفس المشكله وهي ان اللقب يختلف ، عادي جوازات يقدرو يغيروهلك. لان لقبي الاول يختلف علي في الرقم الوطني.

السلام عليكم: انى صارتلي نفس المشكلة درت جواز جديد وقعدت شهور نستنى فيه ولما طلع لقيتهم غالطين في السبلنق بالانجليزي مش زي جوازي القديم . اضطريت ندفع على واحد جديد ولعند توة ما استلمتاش. والمشكلة ان قرار الايفاد متعي صادر في شهر 4 \ 2013 ولعند توة ما بديتش في الاجراءات بسبب تاخير الجواز. وربي يستر ما يضيعش عليه الايفاد

منظومة الجوازات مرتبطة بمنظومة الرقم الوطني لذلك لما بتطلع جواز جديد اعطيهم اسمك زي ما موجود في الرقم الوطني والجواز الجديد يكون بالاسم الي عطيتهولهم مش الموجود في الجواز القديم . يعني الاسم المدرج في الجواز الجديد حيكون زي ما تعطيهولهم بالعربي والانجليزي.

السلام عليكم ..اخت احلام تقدري تاكدي على كل البيانات لما تصوري الصوره اﻻلكترونية والبصمة فيه توقيعة قبلها بيقرا عليك اسمك كامل من المنظومة اوحسب بيانات الرقم الوطني هنا اكدي على كل بياناتك والمشكلة زي ماقلت كلها في بيانتنا بالانجليزي ﻻزم ماتشوفيهم ابروحك وتملي عليه الاسبلنق الصحيح ﻻنه يقدر يغير فيهم ويعدلهم قبل مايدير برنت والمشكلة الاخرى هو يقدريغير اﻻسماء فقط اما التواريخ ﻻزم تمشي لجماعة الرقم الوطني يعدلولك من المنضومة الرئيسية وهدا بروحة يبي اسبوع باش ينزل التعديل من منضومة الرقم الوطني .اسفة على اﻻطالة لكن منتمناش حد ايصيرلة زي ماصار معي

sun light كتب:

   السلام عليكم ..اخت احلام تقدري تاكدي على كل البيانات لما تصوري الصوره اﻻلكترونية والبصمة فيه توقيعة قبلها بيقرا عليك اسمك كامل من المنظومة اوحسب بيانات الرقم الوطني هنا اكدي على كل بياناتك والمشكلة زي ماقلت كلها في بيانتنا بالانجليزي ﻻزم ماتشوفيهم ابروحك وتملي عليه الاسبلنق الصحيح ﻻنه يقدر يغير فيهم ويعدلهم قبل مايدير برنت والمشكلة الاخرى هو يقدريغير اﻻسماء فقط اما التواريخ ﻻزم تمشي لجماعة الرقم الوطني يعدلولك من المنضومة الرئيسية وهدا بروحة يبي اسبوع باش ينزل التعديل من منضومة الرقم الوطني .اسفة على اﻻطالة لكن منتمناش حد ايصيرلة زي ماصار معي

صحيتي إضافة مهمة الله يرحم والديك يعني التركيز التام عند الصورة والبصمة والتأكد من الإسم والتاريخ